నాదారి తీరు -20 మళ్ళీ ఉయ్యూరు –నాలుగవ బదిలీ

  నాదారి తీరు -20

                మళ్ళీ ఉయ్యూరు –నాలుగవ బదిలీ

    మొత్తం మీద నా కాటూరు ఉద్యోగం ఏమంత ఆనందం గా లేక పోయింది. వెళ్లి నప్పుడున్న ఉత్సాహం మధ్యలోను చివర్లోను లేదు .ముళ్ళ మీద ఉన్నట్లే గడిపాను .ఒక ఊరట ఏమిటంటే ఉయ్యూరు నుండి ఉదయం వెళ్ళేటప్పుడు సాయంత్రం కాటూరు నుండి ఇంటికి వచ్చేటప్పుడు రెండు పూటలా మా పొలం చూసే వీలు కలిగింది ..అదో‘’తుత్తి’’.ఉద్దండయ్యఅనే ప్యూన్ కాటూరు స్కూల్ లో పనిచేసేవాడు మంచివాడు .కాఖీ నిక్కర్ తో ఉండేవాడు నెమ్మది మనిషి అలానే ఆ ఊర్లో ఆర్.ఏం .పి.డాక్టర్ ఫణి భూషణ రావు ,ఆయన అన్న డ్రాయింగ్ మేష్టారు (కడవకొల్లు )లతో పరిచయం జరిగింది .కాటూరు పి.హెచ్.సి డాక్టర్ కూడా ఆచార్యులు గారు.మంచి పేరు తెచ్చుకొన్న కుర్రాడు అందరికి తలలో నాలుక గా ఉండేవారు ఒక సారి ఫామిలీ ప్లానింగ్ కాంప్ ను గొప్పగా నిర్వహించారు .అప్పుడు మేమందరం వెళ్లి చూశాం ..వేసవి కాలం లో మా పొలాలకుపంటకాలువల ద్వారా నీరు రావటానికి తవ్విన్చేవాళ్ళు .దానికి అయిన ఖర్చు అంతటిని ఎకరానికి ఇంత అని వేసి వసూలు చేసే వారు కాటూరు ఆయనే వెల్లంకి ఇంటిపేరున్న ఆయనే ఉయ్యూరు వచ్చి వసూలు చేసుకొని వెళ్ళే వారు నీరుకావి పంచె మీసాలతో ఉండేవారు .ఇప్పుడు ఉయ్యూరు లో డాక్టర్ విశ్వేశ్వర రావు గారిది కాటూరు .ఆయన తండ్రి గారు పెద్దమనిషి .విశ్వేశ్వర రావు గారూ పేరున్న డాక్టర్ .ఈ అనుభవాలే మిగిలాయి

                  రెండో సారి ఉయ్యూరు –హెచ్.ఏం ఎస్.కే.

    కాటూరు హైస్కూల్ లో 12-12-69 ఉదయం రిలీవ్ అయి ఆ సాయంత్రమే ఉయ్యూరు హైస్కూల్ లో చేరాను .అప్పుడు హెడ్ మాస్టారు నూజివీడు నుంచి వచ్చి పనిచేస్తున్న ఎస్.కే.వెంకటేశ్వర్లు గారు .ఆస్కార్ వైల్డ్ రాసిన ‘’సెల్ఫిష్ జైంట్ ‘’కధలో లాంటి భారీ పర్సనాలిటి నల్లగా బాగా ఎత్తుగా ఉండేవారు .మంచి మాటకారి .పెద్ద స్కూల్  నుంచి వచ్చారు స్కూల్ డబ్బు అంతా’’ నాకేస్తారనే’’ పేరున్న వారు .ఆయన కంటే ముందే ఆయన ‘’కీర్తి’’ ఇక్కడికి చేరింది .అప్పుడు ఉయ్యూరు లో మాతోబాటు ఆంజనేయ శాస్త్రి కాంతా రావు రామకృష్ణా రావు జ్ఞానసుందరం పిచ్చి బాబు వగైరాలు పని చేశారు .ఆటలు బాగా ఆడే వాళ్ళం .కారంస్ ఖాళీ పీరియడ్స్ లో పోటీలు పెట్టుకొని ఆడేవాళ్ళం శాస్త్రిగారు  కాంతా రావు , పిచ్చిబాబు మంచి ప్లేయర్స్ నేనూ బానే ఆదేవాడిని ఫ్లాస్కులకు ఫ్లాస్కులు కాఫీ లు తెప్పించుకొని తాగే వాళ్ళం .భలే సరదా గా గడిచింది డ్రిల్ మేష్టారు వై రామా రావు గారు నాకు గురువు .ఎస్.వి.సుబ్బారావు గారు కూడా .వై పూర్ణ చంద్ర రావు కనుమూరు నుండి వచ్చేవాడు ఆయన డ్రిల్ మేస్టారే .యెన్.డి.ఎస్.రహమాన్ ఉండేవాడు .సుబ్బారావు అనే ఇంకో డ్రిల్లు మేస్టారూ ఉన్న జ్ఞాపకం మేమందరం వాలీబాల్ బాద్మింటన్ ప్లేయర్సుమే ,స్కూల్ వదల గానే చాలా సేపు ఆడి ఇంటికి వెళ్ళే వాళ్ళం నేప్పల్లె గాంధి అనే కుర్రాడు ఈ రెండిటిలో ఎక్స్పర్ట్ .ఇంటి దగ్గర ట్యూషన్ మామూ లే ..

      హెడ్ వెంకటేశ్వర్లు గారు వింత మనిషి .కాపురం స్కూల్ లోనే .హెడ్ మాస్టర్ రూమ్ లోనే ఉండేవారు .ఉదయం లేక సాయంత్రం ప్యూన్ ఆంజనేయులు లేక నర్రా కృష్ణ మూర్తి ద్వారా ఒక చీటీ ఇచ్చి ఇంటికి పంపేవారు /‘’ప్లీజ్ ఈ రోజు భోజనం పంపండి ‘’అని .అంతే మా ఆవిడ వెంటనే ఏర్పాటు చేసి కారియర్ ప్యూన్ కిచ్చేది ఒక్కో సారి ఆయనే మా ఇంటికి వచ్చే వారు భోజనం చేసి వెళ్ళే వారు అలాగే సూరి రామ శేషయ్య గారినీ ‘’బాదారు ‘’చాల కాలం .దాదాపు ఆయన ఉన్న కాలం లో నెలకి ఏ నాలుగు రోజులో హోటల్ భోజనం చేశారేమో మిగిలిన రోజులన్నీ ‘’ఊరి మీదే’’.వారానికో సారి నూజివీడు వెళ్లి వచ్చేవారు .వెళ్ళేటప్పుడు ఎవర్నో ఒకర్ని బాదుకొని స్వీట్లు హాట్లు పొట్లాలు కట్టించుకొని తీసుకొని వెళ్ళేవారు .ఆయన పాదాలు ఏనుగు పాదాలలా నల్లగా గజ్జి గా ఉన్నట్లున్దేవి .మా సైన్సు రూమ్ కు కావలసిన వసతులు కల్పించారు .రేడియో కొన్నారు ఇనుప బీరువాలు మాకు ఆఫీస్ కు డ్రిల్ మేస్టార్ల కు కొన్నారు దీనితో స్కూల్ లో ఉన్న నిలవ సొమ్ము అంతా స్వాహా అయిందని గోల పెట్టేశారు .డ్రిల్ మేస్తర్లతో ‘’సున్నం పెట్టుకో కుండా’’ వాళ్ళనూ‘’సంతృప్తి ‘’పరచే వారు .

                         బ్రహ్మా నంద రెడ్డి పాస్ –అనే నాన్ డిటెన్షన్ స్కీం

   అప్పుడు ఇంకా డిటేన్షన్ విధానం ఉంది .అందుకని వార్షిక పరీక్షలు అవగానే స్కూల్ లో పరీక్ష పేపర్లు దిద్దే కార్య క్రమం ఎర్పాటు చేశారు .ఇంతవరకు ఎవరు ఇలా చేయలేదు ఈయనే అలా చేసింది .కస్టపడి అందరం చెమటలు కక్కుతూ అక్కడే ఉండిపేపర్లు దిద్దాం. ఫ్లాస్కులతో టీ లు తెప్పించి అందరికి ఇప్పించేవారు .మా మేనమామ గారి అమ్మాయి లక్ష్మి ఇంగ్లిష్ లో తప్పి నట్లు తెలిసింది .క్లాస్తొమ్మిది అని గుర్తు .  .ఈ విషయం ఆయనకు చెప్పాను .ఆ పేపరు దిద్దిన మేస్తార్ని పిలిపించి ‘’యిదేం దిద్దటం ఇంత బాగా రాస్తే ఇన్ని తక్కువ మార్కు లేమిటి /’’అని కోప పడినట్లు గా నటించి పాసు మార్కులు తానే వేసి పాస్ చేయించారు .అంత డేరింగ్ అండ్ డాషింగ్ హెడ్ మాస్టారు ఆయన .చేయ్యాలనుకొంటే అడ్డగోలుగా ఏ పనైనా చేస్తారు దేనికీ వెరవని మనిషి ..వాల్యుయేషన్ అంతా అయి పోయిన తర్వాత ప్రమోషన్ లిస్టు లన్ని తయారయాయి .ఇంతలో ముఖ్య మంత్రి కాసు బ్రహ్మా నంద రెడ్డి డిటేన్షన్ విధానాన్ని రద్దు చేసి అందరు పాస్ అయినట్లు డిక్లేర్ చేయమని ప్రభుత్వ ఆర్డర్ పాస్ చేశాడు దీన్నే ‘’బ్రహ్మానంద రెడ్డి పాస్ ‘’అన్నాం .’’మార్కుల కోసం కక్కూర్తి పడాల్సిన అవసరం తప్పింది .అవినీతికి ఒక రకం గా చెక్ పెట్టి నట్లే ఏడవతరగాతికి మాత్రం కామన్ పరీక్షలున్తాయని ప్రకటించారు .మేము ఇంత కస్టపడి చెమటలు కార్చుకొంటు చేసిన శ్రమ అంతా వ్యర్ధం ని బాధ పడ్డాం .

          అప్పుడు స్కూల్ లో ఒక చిన్న కుర్రాడు పని చేసే వాడు .వాడిని మాతో బాటు క్లాస్ రూములకు తీసుకొని వెళ్లి, పిల్లల దగ్గరున్న కాపీలు తీయించియేరించి బుట్టల్లో మోయించి బయట పారేయించే వాళ్ళం .వాడిని హెడ్ మాస్టారు‘’టేస్టికిల్ ‘’అని సరదా గా పిలిచే వారు సంజీవ రావు అనే అయోమయాన్ని నైట్ వాచర్ గా ఏర్పాటు చేశారు .మేము పరీక్షలు చాలా స్ట్రిక్ట్ గా జరిపే వాళ్ళం .ఎవర్నీ కాపీలు కొట్ట నిచ్చే వాళ్ళం కాదు .ఇదంతా మాకే వదిలేశారు హెడ్ గారు రామ కృష్ణా రావు గారు నేను ఆంజనేయ శాస్త్రి చాలా స్ట్రిక్ట్ మేస్తర్లని పేరు పొందాం .మేము పిల్లల్ని కొట్టినా ఎవరూ ఎదురు మాట్లాడే వాళ్ళు కాదు .వెంకటేశ్వర్ల గారి సంతకం ‘’జిలేబి చుట్ట ‘’లాగా తమాషా గా ఉండేది .ఆయన మీద  స్కూల్లోనే కాపురం ఉంటున్నాడని పిటీషన్ పెట్టారు ఆయనకు ఎవర్ని ఎలా మేనేజ్ చేయాలో తెలుసు ..సాయంత్రం వేల స్కూల్ అవగానే ఎవరో ఒక మేష్టారు లేక ఇద్దరు ముగ్గురు మేస్తర్లతో కలిసి హోటల్ కు వెళ్ళే వారు .అక్కడ కడుపు నిండుగా లగించే వారు బిల్లు కట్టి మేస్టార్లు జేబు చిల్లు పదేయించుకొనే వారు ఇలా ‘’కాటా దెబ్బ’’ తిన్న వాళ్ళలో నేనూ ఉన్నాను ఏమైనా మాటల్లో బురిడీ కొట్టించేవారు .అదో ఆర్ట్ ..స్కూల్ వార్షి కొత్సవం జరపకుండా అన్నితరగతుల విద్యార్ధులకు మార్కులను బట్టి ఫస్ట్ సెకండ్ థర్డ్ లను నిర్ణయించి పుస్తకాలు  కొని బహూకరించారు ఇదో ముందడుగే ..మంచి పుస్తకాలేకొన్నారు కొనటానికి నన్ను ,పంపేవారు .నవోదయ ,విశాలాంధ్ర షాపుల్లో ఉపయోగ పడే పుస్తకాలను కోన్నాం .స్కూల్ తెరిచే సమయానికి వెంకటేశ్వర్లు గారు మళ్ళీ నూజివీడు కు ట్రాన్స్ ఫర్ అయారు .ఆయన స్తానం లో మంటాడ నివాసి శ్రీ కోడె బోయిన సూర్య నారాయణ గారు హెడ్ మాస్టర్ గా వచ్చారు .

                       ఉపాయం మేస్టారు

    కోడె బోయిన వారు ‘’చిక్కడు దొరకడు ‘’లాంటి మనిషి చేతికి మట్టి కానివ్వరు .’’ఉపాయం ‘’మేస్స్టారనే’’ పేరు పొందారు .ఘర్షణ ఇష్టపడే వారు కాదు సాదుస్వభావం మల్లెపువ్వు లాంటి పంచా ,తెల్ల చొక్కా ఉత్తరీయం గొడుగు తో వచ్చేవారు .నెత్తిమీద నాలుగే పోచలు ఈచివారి నుంచి ఆ చివరికి ఉండేవి .ఏదో కస్టపడి అలసి పోయి నట్లు బస్సులు విడుస్తున్దేవారు. సీనియర్ హెడ్ మాస్టారే .లెక్కల మేష్టారు గా పేరుండేది .

                       హిందూ ముస్లిం కొట్లాట 

అప్పుడు ఆయన మెతక తనానికి స్కూల్ లో హిందూ ముస్లిం విద్యార్ధుల కొట్లాటలు జరిగాయి .అప్పుడు నేను పిచ్చి బాబు రామకృష్ణా రావు ఆంజనేయ శాస్త్రి ఒక బృందం గా ఏర్పడి ,స్కూల్ డిసిప్లిన్ దెబ్బతిన కుండా చూడాల్సిన బాధ్యత ను మీద వేసుకోన్నాం .హెడ్ మాస్టార్ని ఒక రకం గా పక్కకు పెట్టి ఏ సమస్య వచ్చినా మేమే డీల్ చేసి పరిష్కరించాం .ఒక నెల లోనే మేమంటే ఏమిటో అందరికి తెలిసి. అందరు చక్కని సహకారం అందించారు .అంతే మళ్ళీ వర్గ ,మత పోరాటాలు రాలేదు .ఒక రకం గా ఇది మా కృషే అనుమానం లేదు .తలిదండ్రులు కూడా మమ్మల్ని మెచ్చుకొని స్కూల్ కు వచ్చి అభి నందిన్చేవారు ముస్లిం పెద్దలు కూడా జరిగిన దానికి చింతిస్తున్నామని ఉయ్యూరు ఎప్పుడూ మత సామరస్యానికి నిలయమని మళ్ళీ అటువంటి అవాంచనీయ సంఘటనలు రాకుండా తమ పిల్లల విషయం లో శ్రద్ధ తీసుకొంటామని చెప్పారు అందరం హేపీ ..’’

                  తాగుబోతు సుబ్బారావు

      స్కూల్ పక్కనే సుబ్బారావు అనే తాగు బోతూ ఉండేవాడు అతనికి అమ్మా తమ్ముడు ఉన్నారు తాగి వచ్చి స్కూలు జ రిగే సమయం లోనే మేస్తర్ల్ని బూతులు తిట్టే వాడు .ఏ మేష్టారు కల్పించుకొనే వాడుకాదు మనకెందుకులే అని ఊరుకొనే వారు .ఇది సహించలేక మా బృందం ఒక సారి సుబ్బారావు మీద తిరగబడి ఎదిరించాం. మళ్ళీ స్కూల్ లోకి అడుగు పెడితే కాళ్ళు విరగ్గొట్టి పోలీస్ కంప్లైంట్ ఇస్తామని చెప్పాం .మేము స్తానికులం అవటం తో కిక్కురు మనకుండా వెళ్లి పోయి అప్పటినుంచి తాగి రావటం మానేశాడు అంతకు ముందు అనేక ఏళ్ళు గా స్కూల్ కు అతను ఈ రకమైన గొడవ తో ఇబ్బంది కలిగించాడు దీనితో ఫుల్స్టాప్ .ఇప్పుడతను వేదాంతి అయాడు వీరమ్మ తల్లి గుడి దగ్గర రూమ్ లో ఉంటూ తత్వాలు పాడుకొంటు సాధువుల వేషం వేసుకొని ఉంటున్నాడు గొంతు మంచిది బ్రహ్మం గారి తత్వాలు బాగా పాడుతాడు ..

         సశేషం –మీ—గబ్బిట దుర్గా ప్రసాద్ –29-3-13- ఉయ్యూరు

About gdurgaprasad

Rtd Head Master 2-405 Sivalayam Street Vuyyuru Krishna District Andhra Pradesh 521165 INDIA
This entry was posted in నా దారి తీరు and tagged . Bookmark the permalink.

స్పందించండి

Fill in your details below or click an icon to log in:

వర్డ్‌ప్రెస్.కామ్ లోగో

You are commenting using your WordPress.com account. నిష్క్రమించు /  మార్చు )

గూగుల్ చిత్రం

You are commenting using your Google account. నిష్క్రమించు /  మార్చు )

ట్విటర్ చిత్రం

You are commenting using your Twitter account. నిష్క్రమించు /  మార్చు )

ఫేస్‌బుక్ చిత్రం

You are commenting using your Facebook account. నిష్క్రమించు /  మార్చు )

Connecting to %s

స్పామును తగ్గించడానికి ఈ సైటు అకిస్మెట్‌ను వాడుతుంది. మీ వ్యాఖ్యల డేటా ఎలా ప్రాసెస్ చేయబడుతుందో తెలుసుకోండి.