నాకు గాడ్‌ఫాదర్‌ పెద్దయ్యగారే! (యెన్ టి ఆర్ )అన్న మణిమాల అనే గీతాంజలి

నాకు గాడ్‌ఫాదర్‌ పెద్దయ్యగారే!

Published at: 21-07-2014 16:15 PM

తెలుగు ప్రేక్షకులను తన నటనతో మరిపించి, మురిపించిన నాటితరం నటీమణులలో గీతాంజలి ఒకరు. హీరోయిన్‌గా ప్రవేశించి హాస్యనటిగా స్థిరపడిన గీతాంజలి తన నట జీవితంలో ఎన్నో ఎత్తుపల్లాలు చూశారు. నాటి జ్ఞాపకాలను ఓపెన్‌ హార్ట్‌ విత్‌ ఆర్కేలో నెమరువేసుకున్నారు…

ఆర్కే : మీరు హీరోయిన్‌గా చేశారు, కమెడియన్‌గా చేశారు? ఎందుకలా కెరీర్‌ జిగ్‌జాగ్‌గా వెళ్లింది?
గీతాంజలి : మా నాన్నగారే కారణమండి. మంచి టైంలో ఎల్వీప్రసాద్‌గారి ఇల్లాలు సినిమా చేశాను. ఆ టైంలో పద్మనాభంగారు దేవత సినిమా తీస్తున్నారు. అందులో హీరో రామారావుగారు, హీరోయిన్‌ సావిత్రి. పద్మనాభం పక్కన నన్ను అడిగారు. మా నాన్నను ఒప్పించడంతో కాదనలేకపోయాను. అది నా పెద్ద డ్రాబ్యాక్‌. అక్కడి నుంచి డైవర్షన్‌ మొదలయింది. కొన్ని చిత్రాల్లో వ్యాంప్‌ క్యారెక్టర్‌లు కూడా వేశాను. కామెడీ పాత్రలు చేశాను. దాంతో మంచి పాత్రలకు నన్ను తీసుకోవడం తగ్గిపోయింది.

ఆర్కే : మీకు బాగా బాధ కలిగించిన సంఘటనలు ఏమైనా  ఉన్నాయా?
గీతాంజలి : చాలా ఉన్నాయి. మా ఆయన చనిపోయినపుడు శోభన్‌బాబు వచ్చారు. గీతాంజలి చాలా జాగ్రత్తగా ఉండమ్మా, నువ్వు సెలయేరులాంటి దానివి. నీకు కష్టమంటే తెలియదు. ఎవ్వరైనా హర్ట్‌ చేస్తే తట్టుకోలేవు. నువ్వు హైదరాబాద్‌ వెళ్లొద్దు అన్నారు. ఏంటి శోభన్‌బాబు గారు అలా అంటారు అనుకున్నాను. కానీ అలానే జరిగింది. కష్టపడి సంపాదించుకున్న డబ్బులు పోయాయి. అయినా మీకేంటమ్మా సంపాదించిన డబ్బులు బాగా ఉన్నాయని అనే వారు.

ఆర్కే : బాలనటిగా మేకప్‌ వేసుకుని సినిమా రంగంలోకి అడుగుపెట్టి దాదాపు ఐదు దశాబ్దాలు అవుతోంది. ఎలా అనిపిస్తోంది?
గీతాంజలి : చాలా అద్భుతంగా ఉంది. నేను ఊహించని జీవితం ఇది. మా నాన్న గారికి నేను పెద్ద స్టార్‌ అవ్వాలని కోరిక ఉండేది. ఆయన ప్రోత్సాహం మేరకే నేను నటినయ్యాను.
ఆర్కే : జీవితం మొత్తం సంతృప్తికరంగానే సాగిందా? ఎలాంటి కష్టాలు ఎదురవ్వలేదా?
గీతాంజలి : మాది కాకినాడ. సినిమా అవకాశాల కోసం మద్రాసు వచ్చాక కొద్దికాలం కష్టపడ్డాను. స్వశక్తితో పైకి వచ్చాను. నాలుగైదు సినిమాల్లో చిన్న వేషాలు వేశాను. బి.ఎ.సుబ్బారావు గారి సినిమా రాణీరత్నప్రభలో వెంకటసత్యం గారు ఒక డ్యాన్స్‌ అవకాశం ఇచ్చారు. ఆ సమయంలో పెద్దయ్యగారు చూశారు. (రామారావుగారిని పెద్దయ్యగారు అని పిలుస్తాను) పెద్దయ్యగారు నన్ను చూసి చాలా ఇన్నోసెంట్‌గా ఉంది. సీత పాత్రకు సరిగ్గా సరిపోతుంది, అవకాశం ఇద్దాం అని ఆఫీసుకి పిలిపించారు. అప్పటికప్పుడు అగ్రిమెంట్‌ పూర్తయిపోయింది. ఖాళీ సమయాల్లో పెద్దయ్యగారి ఇంట్లోనే ఉండేదాన్ని. ఆయనతో అంత చనువు పెరిగింది. ఆ ఇంట్లో అందరూ నన్ను సీతమ్మ అనే పిలిచేవారు.
ఆర్కే :మీ నాన్న గారు ఏం చేసేవారు?
గీతాంజలి : కాకినాడలో వడ్డీవ్యాపారం చేసేవారు. ఆ వ్యాపారంలో యాభైవేలు నష్టం వచ్చింది. దాంతో మా అమ్మాయిలు కష్టపడి సంపాదించుకుంటారు. నా కష్టాలను తీరుస్తారు. నాకన్నీ వాళ్లే అని ఎవరినీ అప్పు అడగకుండా మమ్మల్ని తీసుకుని మద్రాసుకు వచ్చేశారు. మా నాన్న ఆశలన్నీ నాపైనే.
ఆర్కే : నీపైనే ఆశలు పెట్టుకోవడానికి కారణం ఏంటి? మీరు చిన్నప్పటి నుంచే డ్యాన్సులు చేసేవారా?
గీతాంజలి : ఐదేళ్ల నుంచే డ్యాన్సులు చేసే దాన్ని. చదువంటే పెద్దగా ఆసక్తి ఉండేది కాదు. ఎప్పుడూ డ్యాన్స్‌ చేసే దాన్ని.
ఆర్కే :మీ అసలు పేరేంటి?
గీతాంజలి : మణి. ప్రారంభంలో కొన్ని సినిమాల్లో నా పేరు మణి అనే ఉంటుంది. అయితే పారస్‌మణి అనే హిందీ సినిమా కోసం నన్ను తీసుకున్నారు. ఆ సినిమాలో హీరోయిన్‌ పేరు మణి. కాబట్టి నా పేరు మణి అని ఉండకూడదు అని డైరెక్టర్‌, ప్రొడ్యూసర్‌ గారు గీతాంజలి అని మార్చారు. ఇక అప్పటి నుంచి వెనుతిరిగి చూసే అవకాశం రాలేదు.
ఆర్కే : సినిమా ఇండసీ్ట్రలో గాడ్‌ఫాదర్‌ పెద్దయ్యగారేనా?
గీతాంజలి : మా నాన్న తరువాత నాకు గాడ్‌ఫాదర్‌ పెద్దయ్యగారే. వారి పిల్లలు ఎంతో అభిమానం చూపిస్తారు. వాళ్లు చూపించే అభిమానానికి చాలా ముచ్చటేస్తుంది. పెద్దయ్యగారి పిల్లలంతా ఆప్యాయంగా పలకరిస్తారు.
ఆర్కే : రాజకీయాల్లోకి ఎందుకు వచ్చారు?
గీతాంజలి : పెద్దయ్యగారు వాళ్ల బిడ్డలతో సమానంగా మమ్మల్ని సమానంగా చూశారు. ఆయన మమ్మల్ని సినిమా ఆర్టిస్టులుగా ఎప్పుడూ చూడలేదు. అటువంటి ఆయన తెలుగుదేశం పార్టీ స్థాపిస్తే మేం లేకపోతే ఎలా?
ఆర్కే : ఎప్పుడైనా పెద్దయ్యగారు కోప్పడ్డారా?
గీతాంజలి : ఒకరోజు మహావిష్ణువు పాదాలను లక్ష్మీదేవి నొక్కుతున్న సీన్‌ ఉంటుంది. ఆ సమయంలో దేవతలు వచ్చి భూలోకంలో ఉన్న సమస్యల గురించి విన్నవించుకుంటారు. ఆ సమయంలో మహావిష్ణువు దేవీ నువ్వు వెళ్లాలి. భక్తులు కష్టాల్లో ఉన్నారని అంటారు. అందుకు సమాధానంగా నేను ఒక పద్యంలో నా డైలాగ్‌ చెప్పాలి. కానీ ఐదారు టేకులు తిన్నా ఓకే కాలేదు. అప్పుడు పెద్దయ్యగారికి కోపం వచ్చింది. ఏం డైలాగ్‌లు నేర్చుకోలేదా? బాగా నేర్చుకోవాలి అని అన్నారు. అలా అనేసరికి సెట్‌లోనే ఏడ్చేశాను. కానీ ఆ తరువాత ఆయనే నన్ను ప్రోత్సహించి టేక్‌ ఓకే అయ్యేలా చేశారు.
ఆర్కే : అప్పట్లో హీరోయిన్‌కు ఎంత ఇచ్చేవారు?
గీతాంజలి : ఇరవైవేలు ఇచ్చేవారనుకుంటా. సరిగ్గా తెలియదు. డబ్బుల వ్యవహారాలన్నీ నాన్నే చూసుకునే వారు.
ఆర్కే : పద్మనాభం, మీ కాంబినేషన్‌ బాగా హిట్‌ అయింది కదా?
గీతాంజలి : అలా ఏం లేదండి. పద్మనాభంగారిని చూస్తేనే నవ్వొస్తుంది. ఆయన పక్కన నేనెలా సూటవుతానని ఎంపిక చేశారో తెలియదు. నేను సూటవ్వను. కానీ నా చేతుల్లో ఏముంది. నా దురదృష్టం. సినిమాలన్నీ మా కాంబినేషన్‌లోనే వచ్చాయి.
ఆర్కే : అంటే, ఇష్టం లేకపోయినా చేసుకుంటూ వచ్చారా?
గీతాంజలి : చేస్తూ వచ్చాను. ఏం చేయను. ఇతర కమెడియన్లతో చేయలేదు. ఒక్క పద్మనాభంగారితోనే కామెడీ పాత్రలన్నీ వచ్చేవి. ఆయన పదకొండు సినిమాల్లో నేను నటించాను.
ఆర్కే : ఆ సమయంలో మీకు చేయకూడదని అనిపించలేదా? నాన్న గారితో చెప్పలేదా?
గీతాంజలి : చెప్పాను. కానీ ఇల్లుగడవాలి కదా. అందుకోసం చేయక తప్పదనేవారు. ఇల్లాలి సినిమా తరువాత ఎలాంటి సినిమాలు చేయాల్సిందానివి ఎలాంటివి చేస్తున్నావు అని చాలా మంది అడిగేవారు. కానీ అప్పటి పరిస్థితులు వేరుగా ఉన్నాయి. ఇల్లాలు సినిమా రిలీజ్‌ సమయంలోనే వీలునామా సినిమా వచ్చింది. అందులో మోడ్రన్‌ డ్రెస్‌లు, క్లబ్‌ డ్యాన్స్‌లు. రెండు సినిమాలు ఒకే సమయంలోనే రిలీజ్‌. పోస్టర్లు చూసి ఎల్వీ ప్రసాద్‌గారు ఏంటమ్మ ఇది. నీపైన నమ్మకంతో ఇల్లాలు సినిమా చేశాను అని బాధపడ్డారు. నిజానికి వీలునామా ముందుగా ఒప్పుకున్న సినిమా. కానీ రెండు ఒకేసారి విడుదలకొచ్చాయి. అలా జరుగుతుందని ఊహించలేదండీ అని నాన్న వివరణ ఇచ్చుకున్నారు.
ఆర్కే : రామకృష్ణగారితో లవ్‌ఎఫైర్‌ సినిమాలో మాదిరిగా జరిగిపోయిందా?
గీతాంజలి : లవ్‌ఎఫైర్‌ అని అనకండి సార్‌. నేను అందరితో సరదాగా ఉంటాను. కానీ ఎదుటి వాళ్లు దాన్ని వేరేగా ఊహించుకునే వారు. రామకృష్ణతో సినిమాలు చేసే సమయంలో మా నాన్న గారితో కబుర్లు చెప్పేవారు. మా నాన్న గారిని బాగా కాకా పట్టి పెళ్లికి ఒప్పించారు. చాలా మంది మాది లవ్‌ మ్యారేజనే అనుకుంటారు.
ఆర్కే : పెళ్లి తరువాత సినిమాలు ఎందుకు ఒప్పుకోలేదు?
గీతాంజలి : పెళ్లి తరువాత సినిమాలు చేయకూడదనే కండీషన్‌ పెట్టారు. రామకృష్ణతోపాటు మా నాన్న, ఆమ్మ కూడా సినిమాలు వద్దన్నారు. దాంతో మానేశాను. అప్పుడే భానుమతి గారి సినిమాలో ఆఫర్‌ వచ్చింది. ఫోన్‌ చేసి సారీ అమ్మ పెళ్లి కుదిరింది. మా ఇంట్లో వాళ్లు సినిమాలు వద్దంటున్నారు అని చెప్పాను. ఇంట్లో వాళ్ల మాటకు కట్టుబడి సినిమాలు ఒప్పుకోలేదు.
ఆర్కే : సినిమా మానేయమంటున్నారని పెద్దయ్యగారికి చెప్పలేదా?
గీతాంజలి : లేదండీ! అప్పటికే ఆయన హైదరాబాద్‌కి వచ్చేశారు.
ఆర్కే : సినిమాలు మానేయమన్నందుకు మీరేమీ బాధపడలేదా?
గీతాంజలి : చాలా బాధపడ్డాను. అన్నేళ్లు సినిమాలు చేసి మానేయడం కష్టమనిపించింది. 24 గంటల్లో 20 గంటలు సెట్‌లో ఉండేదాన్ని. వాటన్నిటికీ దూరమై ఇంటికి పరిమితం కావడం కష్టమనిపించింది.
ఆర్కే : సినిమాల్లో ఒక వెలుగు వెలిగిన చాలా మంది చివరి రోజుల్లో తినడానికి తిండిలేక కష్టాలు పడిన సంఘటనలున్నాయి? మరి మీరు ఎలా ప్లాన్‌ చేసుకున్నారు?
గీతాంజలి : ఆర్థిక వ్యవహారాలన్నీ మా నాన్నగారే చూసుకునే వారు. ఆయన ప్లానింగ్‌ మూలంగానే జీవితంలో స్థిరపడినామని చెప్పవచ్చు. మా నాన్న తరువాత రామకృష్ణగారు కూడా అంతే ప్లానింగ్‌తో ఉంటారు. డబ్బు విషయంలో చాలా జాగ్రత్తగా ఉంటారు. బీరువా తాళాలు తనదగ్గరే పెట్టుకుంటారు. డబ్బులు కావాలని అడిగితే ఇస్తారు. దానధర్మాలు చేస్తారు. కానీ చాలా మందికి తెలియదు. ఆయన ఎప్పుడూ
గతాన్ని మర్చిపోలేదు.
ఆర్కే : రామకృష్ణగారు చనిపోయి ఎంతకాలమయింది?
గీతాంజలి : ఎనిమిదేళ్లవుతోంది. కేన్సర్‌తో చనిపోయారు.
ఆర్కే : మీ అబ్బాయి ఏం చేస్తున్నాడు?
గీతాంజలి : మూడు, నాలుగు సినిమాల్లో నటించాడు. హీరోగా చేసిన మొదటి సినిమా తగిన పబ్లిసిటీ లేక ఆడలేదు. బ్రేక్‌ కోసం చూస్తున్నాడు. మేం ఇద్దరం కష్టపడి పైకొచ్చాం. మా అబ్బాయి సినిమాల్లో సెటిలయితే మాకు హ్యాపీ.
ఆర్కే : స్వంతంగా ఓ సినిమా తీసి దెబ్బతిన్నట్టున్నారు?
గీతాంజలి : అవునండీ! కన్నడంలో పెద్దహిట్‌ అయిన సినిమా చూసి మీరు తీయాలని పట్టుబట్టాను. దాంతో రామకృష్ణగారు ఒప్పుకున్నారు. రామకృష్ణ, సుజాత హీరోహీరోయిన్లుగా సినిమా మొదలయింది. ప్రారంభోత్సవానికి పెద్దాయనను ఆహ్వానించాం. కానీ మీకెందుకు సినిమా నిర్మాణం అని తిట్టారు. అదేంటి పెద్దాయన అలా అన్నారు అని రామకృష్ణ బాధపడ్డారు. చివరకు పెద్దాయన రాకుండానే సినిమాను పూర్తి చేశాం.
ఆర్కే: పెద్దాయన డిస్కరేజ్‌ చేసినా వినలేదా?
గీతాంజలి : అప్పటికే నటీనటుల ఎంపిక పూర్తయింది. డేట్స్‌ ఇచ్చేశారు. సబ్జెక్ట్‌ రెడీ అయింది. అంతా ప్లానింగ్‌ అయిపోయింది. దాంతో ఆపలేకపోయాము.
ఆర్కే : 18 ఏళ్ల తరువాత ఇప్పుడు ముఖానికి మళ్లీ ఎందుకు రంగు వేసుకోవాలని అనిపించింది?
గీతాంజలి : నేను వేసుకోవాలని అనుకోలేదు. వాళ్లే వచ్చి అడిగారు.
ఆర్కే : అవకాశం ఎలా వచ్చిందో చెప్పండి?
గీతాంజలి : డైరెక్టర్‌ మదన్‌గారు వచ్చి మీరు నాయనమ్మ క్యారెక్టర్‌ వేయాలని అడిగారు. కోట శ్రీనివాసరావు మీరు కాంబినేషన్‌ అని చెప్పారు. నేను కుదరదంటే కుదరదని చెప్పాను. తల్లి పాత్ర పర్వాలేదు కానీ  మరీ నాయనమ్మ పాత్ర ఏంటయ్యా? అని అన్నాను. లేదు బాగుంటుంది మీరు చూడండి. ఈ పాత్రకు మీరైతేనే సూటవుతారని పట్టుపట్టి ఒప్పించారు. అయితే ఆ పాత్రకు మంచి పేరొచ్చింది. దాంతో మరో ఇరవై సినిమాల వరకు అవకాశం వచ్చింది.
ఆర్కే : ఈ తరం హీరోయిన్లను చూస్తుంటే ఏమని                పిస్తోంది?
గీతాంజలి : మీకు తెలిసిందే మాకు తెలుసు. ప్రత్యేకంగా నే ను ఏం చెప్పగలను. మేం స్వర్ణయుగంలో గడిపాం. పెద్దలంటే గౌరవం ఉండేది.
ఆర్కే : ఇప్పుడు మీరు హీరోయిన్‌గా ఎంటర్‌ అయితే ఇమిడేవారా?
గీతాంజలి : లేదు. ఈ పరిస్థితుల్లో నా మనస్తత్వానికి ఇమడలేకపోయేదాన్ని.
ఆర్కే : ఇప్పటి తరానికి మీరిచ్చే సలహా ఏంటి?
గీతాంజలి : పెద్దవాళ్లను గౌరవించండి. మంచిగా, కట్టు,బొట్టుతో లక్షణంగా ఉండండి.
ఆర్కే : మీ డబ్బింగ్‌ మీరే చెప్పుకుంటారు కదా? అన్ని భాషలు ఎలా నేర్చుకున్నారు?
గీతాంజలి : తెలుగు, హిందీ, తమిళ్‌, కన్నడ, మలయాళం భాషల్లో నా డబ్బింగ్‌ నేనే చెప్పుకునేదాన్ని. నేర్చుకోవడమంటే నాకు ఇష్టం. అందుకే నేను అన్ని భాషలు నేర్చుకోగలిగాను. పాటలు కూడా పాడతాను.
ఆర్కే : మీలో ఉన్న ప్లస్‌ ఏంటి?
గీతాంజలి : ఉన్న దానితో సంతృప్తి చెందుతాను. పెద్ద పెద్ద ఆస్తులు కొనాలని ఉండదు. కష్టపడి పైకి వచ్చాం. హ్యాపీగా ఉన్నాం చాలు అని అనుకుంటాను.
ఆర్కే : మీకు బాగా సంతోషం కలిగించిన సంఘటన ఏంటి?
గీతాంజలి : నేను దేన్నీ సీరియస్‌గా తీసుకోను. సంతోషంగా ఉంటాను. అన్నీ మరిచిపోతాను. ప్రతి సంఘటన నాకు సంతోషాన్ని కలిగించేదే. నావల్ల పది మందికీ సహాయం అందింది. అదే సంతోషం.
ఆర్కే : మీకు మిగిలిపోయిన కోరిక ఏంటి?
గీతాంజలి : మా అబ్బాయి మంచి పొజిషన్‌కు రావాలి. రామకృష్ణ, గీతాంజలి సాధించిన పేరు వాడు సంపాదించుకోవాలి. వాడి భవిష్యత్తు బాగుండాలి. అదే నా కోరిక.
ఆర్కే :  మీ అబ్బాయి మంచి పొజిషన్‌కు రావాలని మేము కోరుకుంటున్నాం. థాంక్యూ గీతాంజలి గారు.

 

About gdurgaprasad

Rtd Head Master 2-405 Sivalayam Street Vuyyuru Krishna District Andhra Pradesh 521165 INDIA Wiki : https://te.wikipedia.org/wiki/%E0%B0%97%E0%B0%AC%E0%B1%8D%E0%B0%AC%E0%B0%BF%E0%B0%9F_%E0%B0%A6%E0%B1%81%E0%B0%B0%E0%B1%8D%E0%B0%97%E0%B0%BE%E0%B0%AA%E0%B1%8D%E0%B0%B0%E0%B0%B8%E0%B0%BE%E0%B0%A6%E0%B1%8D
This entry was posted in సినిమా and tagged . Bookmark the permalink.

స్పందించండి

Fill in your details below or click an icon to log in:

వర్డ్‌ప్రెస్.కామ్ లోగో

You are commenting using your WordPress.com account. నిష్క్రమించు /  మార్చు )

గూగుల్ చిత్రం

You are commenting using your Google account. నిష్క్రమించు /  మార్చు )

ట్విటర్ చిత్రం

You are commenting using your Twitter account. నిష్క్రమించు /  మార్చు )

ఫేస్‌బుక్ చిత్రం

You are commenting using your Facebook account. నిష్క్రమించు /  మార్చు )

Connecting to %s

స్పామును తగ్గించడానికి ఈ సైటు అకిస్మెట్‌ను వాడుతుంది. మీ వ్యాఖ్యల డేటా ఎలా ప్రాసెస్ చేయబడుతుందో తెలుసుకోండి.