నేనెరిగిన బాపు -వేలూరి వెంకటేశ్వర రావు- మరియు ”సారీ బాపూ”-శ్రీమతి చలసాని వసుమతి గారి కవిత

తెలుగులో వేమన పద్యాలు వినని వాళ్ళుండరు. బాపూ బొమ్మలు చూడని వాళ్ళూ లేరు. వేమన పద్యాలు నిజంగా ఎవరు రాశారో తెలియదు. కాని, బాపు బొమ్మలు వేసింది సత్తిరాజు లక్ష్మీనారాయణ అనే ఆయన అని చెప్పితే ఎవరూ నమ్మరు. ఎందుకంటే బాపు అనే పేరే ఆయన నిజం పేరయిపోయింది.
వేమన పద్యాలు ఎవరు ఎక్కడ ఏ సందర్భంలో వాడుకున్నా ఎవరూ కాదనరు. వేమన, నా పద్యాలు నన్నడక్కండా వేశారేం అని కోప్పడడు. మనకాలంలో, కాపీ రైటు చట్టాలు, అనుకరణ నిషేధాలూ ఉన్నప్పుడుకూడా బాపు తనబొమ్మలని గాలి, నీరు, వెలుతురూ లాగా తెలుగుదేశం అంతటా పంచి పెట్టేశాడు. అక్కడే కాదు, తెలుగువాళ్ళు ఎక్కడ ఉంటే అక్కడ దాకా తన బొమ్మలని పట్టుకుపోనిచ్చాడు.
బొమ్మ అడగడం తడవు- ఆశు కవిత్వం చెప్పే కవికన్నా వేగంగా బొమ్మలు వేసే బాపు- తన బొమ్మలని తెలుగు మాటలు బతికున్న ప్రతిచోటికీ, మాటలకన్నా వేగంగా ప్రసారం కానిచ్చాడు.
తెలుగు వాళ్ళు వేమనలాంటి కవులకి సన్మానాలు చెయ్యలేదు. వాళ్ళని తమ మామూలు మాటల్లో కలిపేసుకొని సొంతం చేసుకున్నారు, అంతే! బాపూ కూడా అలాంటి వాడైపోయాడు. చిత్రకారుడుగా అతన్ని పనికట్టు కొని ఎవరూ పొగడినట్టు లేదు. కాని, అతని బొమ్మలు లేకుండా ఎవరూ ఏ పనీ చెయ్యరు. పత్రిక పెట్టినా, ప్లైయర్‌ పంపినా, పుస్తకం అచ్చేసుకున్నా, బాపు గీత లేనిదే అది మనకి పూర్తి కాదు.
‘బాపు గొప్పవాడు. మనం పట్టంకట్టి నువ్వు గొప్పవాడివి అని చెప్పవలసిన అవసరం లేనంత గొప్పవాడు,’ అని నేను 1983 తెలుగువెలుగు (షికాగో) రాత పత్రికకి సంపాదకుడిగా రాశాను. మా పత్రికకి మీ బొమ్మలు కావాలి, అని అడగంగానే, పాతిక పైచిలుకు బొమ్మలు – అట ్టమీద వేసుకోడానికి గాను పెద్ద సైజు బొమ్మలు – గ్యాప్‌ ఫిల్లర్స్‌ లాగా వాడుకోటానికి మరో పాతిక చిన్న సైజు బొమ్మలు, పంపించాడు బాపు.
తరువాత, ఆ బొమ్మలన్నీ సెయింట్‌ లూయిస్‌ తానా వాళ్ళకిచ్చాను, ప్రదర్శన కోసం! అంతే! ఆ బొమ్మలే కొన్ని సంవత్సరాల పాటు అమెరికా తెలుగు పత్రికలన్నింటినీ అలంకరించాయి.
1985లో లాస్‌ ఏంజిల్స్‌ తానా సభలు అయిన తరువాత, ఒక వారం రోజులుండేట్టు చికాగో వస్తున్నానని చెప్పాడు. ఆయన్ని అప్పుడు అడిగాను, అక్కడ బొమ్మల కొలువు పెట్టారా? అని. సంతృప్తికరమైన జవాబు ఇవ్వలేదు. వెంటనే, విశాల షికాగో తెలుగు సంస్థ ఆధ్వర్యంలో ఒక బొమ్మలకొలువు పెట్టాం. దగ్గిర దగ్గిర మూడు వందల మంది వచ్చారు, బొమ్మలు చూడటానికి!
తరువాత, ఆయన్ని చాలాసార్లు కలిశాను; భారతంలోను, అమెరికాలోనూ!
ఒకసారి ఆయన, పెమ్మరాజు వేణుగోపాలరావు, నేనూ హ్యూస్టన్లో సదస్సుకి వచ్చాం. కారులో ఆయన్ని, రావుగారినీ సదస్సుకి తీసుకెళ్ళాలి. ‘బాపు! మీరు వెనక సీటులో కూచోండి, రావు గారు ముందు కూచుంటా రు. ఆయన నాకు డైరెక్షన్లు చెప్పాలి,’ అన్నాను. ‘నేనూ డైరెక్టరునే! ఆ పని నేను చెయ్యలేననుకున్నావా?’ అన్నాడు. మాకు నవ్వాగలేదు.
ఇప్పుడు బాపు లేడు. అమెరికా తెలుగు వాళ్ళ ఇళ్ళల్లో వేమన పద్యాల పుస్తకం ఉండక పోవచ్చు. బాపు వేసిన బొమ్మ ఉండి తీరుతుంది.
– వేలూరి వెంకటేశ్వరరావు

సారీ బాపూ! నీ కుంచెలో నేనొదిగిపోలేను
కోమలం లేదు, లాప్‌టాప్‌ బరువులలో
మధురం లేదు-
పరుగుల వేటలో సౌందర్యం పారిపోతోంది
పని నిండిన ఆఫీసుల్లో
లాలిత్యం లేదు లిఫ్ట్‌లు
సారీ బాపూ! నీ కుంచెలో నేనొదిగిపోలేను
వాల్జడ లేదు నిమిషాలను గమనించటానికి
స్పాలో వదిలేశాను
వయ్యారం అడ్రస్‌ లేదు, బాస్‌ల శాల్యూట్‌లతో
బారెడు కళ్ళున్నాయి తెరచి చూస్తే అత్యాచారాలు
లంగావోణీలంటే స్పీడ్‌ వాక్కులు నాలుగు పల్టీలు
సారీ బాపూ! నీ కుంచెలో నేనొదగలేను
చిగురాకుల చిలకమ్మను పలికించాలంటే
రూపాయలివిగో శ్రమ ఫలితాలంటాయి
విరిసిన చిరునవ్వు కావాలనుకున్నా సుడిగాలులెదురొస్తాయి
మీటుతున్న హృదయ హేల రొటీనుతో పాషాణమయింది
అరనవ్వుల అధరాలు లిప్‌స్టిక్‌ మాటున దాగిపోతున్నాయి
సారీ బాపూ! నీకుంచెలో నేనొదగలేను.
నా మనసున తెలియని నీవు ఎదురుతెన్నులు చూసి చూసి
అలసిపోయి వెళ్ళిపోయాయి..
మరలా జన్మించు నీ గీతలో నన్ను మలచటానికి రమణను
మర్చిపోకే..!
సారీ బాపూ! నీ కుంచెలో నేనొదగలేను.
– వసుమతి చలసాని
9989944128

About gdurgaprasad

Rtd Head Master 2-405 Sivalayam Street Vuyyuru Krishna District Andhra Pradesh 521165 INDIA Wiki : https://te.wikipedia.org/wiki/%E0%B0%97%E0%B0%AC%E0%B1%8D%E0%B0%AC%E0%B0%BF%E0%B0%9F_%E0%B0%A6%E0%B1%81%E0%B0%B0%E0%B1%8D%E0%B0%97%E0%B0%BE%E0%B0%AA%E0%B1%8D%E0%B0%B0%E0%B0%B8%E0%B0%BE%E0%B0%A6%E0%B1%8D
This entry was posted in వార్తా పత్రికలో and tagged . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Google photo

You are commenting using your Google account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.