అస్వస్థతతో కన్నుమూత.. నేడు అంత్యక్రియలు
మంచి జ్ఞాపకాలు మిగిల్చి వెళ్లారు: జగపతిబాబు
హైదరాబాద్‌, జనవరి 12 (ఆంధ్రజ్యోతి): ప్రముఖ నిర్మాత, దర్శకుడు, సినీ ప్రముఖుడు వీబీ రాజేంద్ర ప్రసాద్‌ (82) కన్నుమూశారు. గత కొన్నిరోజులుగా అనారోగ్యంతో బాధపడుతున్న ఆయన… హైదరాబాద్‌లోని ఓ ప్రైవేటు ఆస్పత్రిలో చికిత్స పొందుతూ సోమవారం రాత్రి తుదిశ్వాస విడిచారు. ఆయన మృతిపట్ల సినీ ప్రముఖులు దిగ్ర్భాంతి వ్యక్తం చేశారు. ఆయన కుటుంబ సభ్యులకు ప్రగాఢ సంతాపం తెలిపారు. అభిమానుల సందర్శనార్థం రాజేంద్ర ప్రసాద్‌ భౌతిక కాయాన్ని మంగళవారం ఉదయం ఫిలిమ్‌నగర్‌లోని ఆయన నివాసంలో ఉంచుతారు. మధ్యాహ్నం 3 గంటల సమయంలో ఎర్రగడ్డ శ్మశాన వాటికలో తమ తండ్రి అంత్యక్రియలు జరుగుతాయని రాజేంద్ర ప్రసాద్‌ కుమారుడు, సినీ నటుడు జగపతిబాబు తెలిపారు. రాజేంద్ర ప్రసాద్‌ మృతికి చిరంజీవి, బాలకృష్ణ, వెంకటేశ్‌, మురళీ మోహన్‌, విశాఖ శారదా పీఠాధిపతి స్వరూపానందేంద్ర తదితరులు తమ సంతాపం తెలిపారు.
నటుడు కావాలని వచ్చి…
రాజేంద్ర ప్రసాద్‌ పూర్తి పేరు వీరమాచినేని బాబూ రాజేంద్ర ప్రసాద్‌. ఆయనను సన్నిహితులు ‘వీబీ’ అని ఆప్యాయంగా పిలుచుకుంటారు. కృష్ణా జిల్లా డోకిపర్రులో జన్మించారు. రంగస్థల నటుడిగా తన ప్రతిభ చాటిన వీబీ సినిమాల్లోనూ నటుడిగా తన సత్తా చాటాలనుకున్నారు. కానీ… అనేక సూపర్‌ హిట్‌ చిత్రాల నిర్మాతగా మారారు. 1960లో ‘అన్నపూర్ణ’ నుంచి 1998లో ‘పెళ్లి పీటలు’ వరకు మొత్తం 25 చిత్రాలను ఆయన నిర్మించారు. వీటిలో… అంతస్తులు, ఆత్మబలం, ఆరాధన (ఏఎన్నార్‌), దసరా బుల్లోడు వంటి 16 సూపర్‌ హిట్‌ చిత్రాలు నిర్మించారు. ‘దసరా బుల్లోడు’తోపాటు మొత్తం 9 చిత్రాలకు వీబీ స్వయంగా దర్శకత్వం వహించారు. రెండు చిత్రాలకు రచయితగా కూడా వ్యవహరించారు.తన సొంత బ్యానర్‌పై నిర్మించిన ‘సింహస్వప్నం’ సినిమాతో కుమారుడు జగపతి బాబును వెండితెరకు పరిచయం చేశారు. ఫిలింనగర్‌లోని ‘దైవసన్నిధానం’ నిర్మాణంలో ఆయన కీలక పాత్ర పోషించారు. దేవస్థానంలోనే అధిక సమయం గడిపేవారు. రఘుపతి వెంకయ్య జీవితకాల సాఫల్య పురస్కారం సహా అనేక అవార్డులు వీబీ సొంతమయ్యాయి.
రాజులా బతికారు: జగపతి బాబు
‘‘ఆయన బతికినంత కాలం రాజులా బతికారు. ఎవరినీ బాధపెట్టలేదు. తను కూడా ఎలాంటి బాధ పడకుండా ప్రశాంతంగా కన్ను మూశారు’’ అని జగపతిబాబు తన తండ్రికి నివాళులు అర్పించారు. సినిమాల్లో తన కెరీర్‌ బాగలేదని చివరిలో కొంత బాధపడేవారని ఆ తర్వాత తనకూ మంచి సినిమాలు రావడంతో సంతోషించారని తెలిపారు. ‘‘నా కూతురికి పెళ్లి కావాలని అనుకునే వారు. మా అమ్మాయి పెళ్లి కుదిరింది. మా సోదరుడి కుమార్తె పెళ్లి కూడా ఖాయమైంది. ఇలా ఆయన చివరి రోజుల్లోనూ అన్నీ మంచి వార్తలను విన్నారు. మాకూ మంచి జ్ఞాపకాలు మిగిల్చి వెళ్లిపోయారు’’ అని జగపతిబాబు తెలిపారు.