నాదారి తీరు -98 చిలుకూరివారి గూడెం హైస్కూల్ లో చదువు ,ఇతర విషయాలు

నాదారి తీరు -98

–చిలుకూరివారి గూడెం హైస్కూల్ లో చదువు ,ఇతర విషయాలు

సాధారణం గా హెడ్ మాస్టర్ గా ఉన్నవాళ్ళు ఇంగ్లీష్ పోయెట్రి వారానికి మూడో నాలుగు క్లాసులు ,ఒకటో రెండో మోరల్ క్లాసులు పదవతరగతికి తీసుకొనికాలక్షేపం చేస్తూ  అడ్మినిస్ట్రేషన్ భారం అంటూ తప్పించుకొంటారు .కాని నేనెప్పుడూ అలా చేయలేదు .ఇక్కడి కారణాలు చాలా ముఖ్యమైనవి .పదవ తరగతి లో సెకండరీ గ్రేడ్ మాస్టారరు శేషగిరి రావు గారబ్బాయి   మాంచి తెలివి తేటలున్నవాడు శ్రీనివాస్ ,అలాగే ఆడపిల్లల్లో బాగా చదివే బాలమ్మ అనే అమ్మాయి ఉన్నారు .వీళ్ళను దృష్టిలో పెట్టుకొని శేషగిరిరావుగారు నేను జాయిన్ అవగానే ‘’సార్ ! టెన్త్ క్లాస్ ఇంగ్లీష్, ఫిజికల్ సైన్స్ మీరు తీసుకొంటేనే న్యాయం జరుగు తుంది ‘’అని దాదాపు వేడుకొన్నట్లుగా సూచించారు .నేను ప్రతివార౦ ఉయ్యూరు వెళ్ళాలి ఎలా అని ముందు కొంచెం సందేహించా .కాని సవాలుగా తీసుకొన్నా .ఈ రెండూ చాలా బరువైన సబ్జెక్ట్ లు ఎంత చెప్పినా ,ఎన్ని పీరియడ్ లు బోధించినా చాలనివి .కనుక వారానికి మాక్సిమం పీరియడ్లు రెండు సబ్జెక్ట్ లకునేనే తీసుకొని బోధించేవాడిని .మెరిట్ స్టూడెంట్ లు ఉంటేమరీ రెచ్చి పోవటం నాకున్న పెద్ద జబ్బులాంటి అలవాటు. వాళ్లకు ఒక్కమార్కు కూడా తగ్గరాదు అనే ఆరాటంనాది .ఇది బాగా ఫలించింది  ఏ మాస్టారు సెలవు పెట్టినా, టెన్త్ కు ఎక్స్ట్రా వర్క్ నాకే వేయమని చెప్పి వేయించుకొని స్లిప్ టెస్ట్ లకు వారం ముందు  క్వార్టర్లీ హాఫియర్లీ, పరీక్షలకు పది పది హీను రోజుల ముందే కోర్స్ పూర్తీ చేసి థరోగా రివిజన్ చేసి సబ్జెక్ట్ కరతలామలకం చేసేవాడిని .ఇది ఇక్కడే కాదు ఎక్కడైనా అదే పధ్ధతి అలవాటైన పధ్ధతి .క్లాస్ లో పాఠం చెబితే దాదాపు ఇంటికి వెళ్లి చదవాల్సిన అవసరం లేకుండా చేసేవాడిని .మర్నాడు క్లాస్ కు వచ్చేటప్పటికి అంతా హృదయ గతం గా ఉండేది .నిన్నటి దానిపై ప్రశ్నలడిగి జవాబులు చెప్పించటం ముఖ్యమైన నిర్వచనాలు దాదాపు క్లాసు లో అందరితో అనిపించటం తో విద్యార్ధులలో మంచి హుషారు వచ్చి దూసుకు పోయేవారు .

ఇదికాక నేను తెల్లవారు జామునే లేచి కాలకృత్యాలు తీర్చుకొని సంధ్య ,పూజ ‘’చదువు’’కొని ఎనిమిదింటికల్లా సిద్ధంగా ఉండేవాడిని .ఒక వైపు స్టవ్ మీద వంట చేస్తూ టెన్త్ పిల్లలకు లెక్కలు కూడా చెప్పేవాడిని .మోడల్ లెక్కలు చేయించి బిట్ లతో సహా సిద్ధం చేసేవాడిని .అంటే మూడు ముఖ్యమైన సబ్జెక్ట్ లు చెప్పేవాడినన్నమాట. కమిటీ ప్రెసిడెంట్ వచ్చి అభినందించేవారు .ఒకసారి శాసన సభ్యులు శ్రీ కోమటి భాస్కర రావు గారింటికి తీసుకొని వెళ్లి నా గురించి బాగా చెప్పేవారు .కాని నేను కాంగ్రెస్ అభిమాని కాదని తెలుగు దేశం వాడినని తెలుసుకొన్నారు .నేనేమీ ప్రచారం చేయలేదు మాటవస్తే అభిమానం చాటే వాడిని అంతే.రాత్రిళ్ళు హాస్టల్ విద్యార్ధులను చదివి౦చేవాడిని .హిందీతో సహా యే సబ్జెక్ట్ లో అనుమానం వచ్చినా తీర్చేవాడిని .అది వాళ్లకు ప్లస్ పాయింట్ అయింది .

టెన్త్ క్లాస్ పరీక్షలు మైలవరం లో రాయాలి ఈ స్కూలు పిల్లలు .గవర్నమెంట్ హై స్కూల్ కు నన్ను డిపార్ట్ మెంటల్ ఆఫీసర్ గా వేశారు .చీఫ్ సూపరింతెండ్ నాకు పూర్వ పరిచయం ఉన్న బెజవాడ ఆయనే .ఇక్కడ కాపీలు బాగా జరుగుతాయని ప్రచారం బాగా ఉండేది .నేను చాలా స్ట్రిక్ట్ గా ఉండేవాడిని .ఎవ్వరి దగ్గరా స్లిప్ లు లేకుండా ముందే తనిఖీ చేయించి పరీక్ష హాల్ లోకి పంపేవాడిని .పాపం అందరికి ఇది కంటకంగా ఉండేది .ప్రక్కనే బస్ స్టాండ్ .లోపలి రావటానికి కాపీలు అందజేయటానికి అవకాశాలు ఎక్కువ .అన్నీ జరాగకుండా చేయగలిగాను .ఒక పోలీస్ సర్కిల్ ఇన్స్పెక్టర్ గారమ్మాయి పరీక్ష రాస్తోందని కొంచెం చూసీ చూడనట్లు పొతే మంచిదని చీఫ్ నాకు చెప్పారు .నా నిఘా మరీ పెంచాను ఆయన నిరుత్తరుడైనాడు .ఆ అమ్మాయి ఏమీ రాయలేక పోయింది. పరీక్షలో తప్పినట్లు తర్వాత తెలిసింది .మా స్కూల్ పిల్లలు గర్ల్స్ స్కూల్ లో పరీక్షలు రాసిన గుర్తు .టెన్త్ రిజల్ట్స్ మాకు బాగా ప్రోత్స్సహకంగా ఉన్నాయి ఎంతో ఇప్పుడు జ్ఞాపకం లేదు శేషగిరి రావు గారబ్బాయి స్కూల్ ఫస్ట్ వచ్చాడు .అయిదు వందల టోటల్ దాటినట్లు జ్ఞాపకం ఇంగ్లీష్ సైన్స్ లలో 80 లకు పైగా మార్కు లోచ్చాయి .బ్రైట్ స్టూడెంట్ కు తగ్గ మార్కులవి .నాకంటే అతడి కృషి గొప్పది .శేషగిరిరావు గారు వారింట్లో గొప్ప విందు స్టాఫ్ కు ఇచ్చారు .

విశాలాంధ్ర తాత మనవడు

ఉయ్యూరులో మాచిన్నప్పుడు ఒక చిన్న  కొట్లో చెప్పులూ బూట్లు అమ్మకం చేస్తూ వీర కమ్యూనిస్ట్ అయిన తాత ఒకాయన ఉండేవాడు. ఆయన విశాలాంధ్ర పత్రిక ఏజెంట్ .ఇంటింటికీసైకిల్ మీద  వెళ్లి పత్రిక  వేసేవాడు .ఆయన సైకిల్ ఎక్కటం బలే తమాషాగా ఉండేది .సైకిల్ ను కోతదూరం తోసుకొంటూ వెళ్లి ఎక్కేవాడు .ముతక పంచ మోకాళ్ళు దాటి కట్టు తో కోటేరు ముక్కుతో కొంచెం పొట్టిగా ఉండేవాడు .ఆయన్ను అందరూ ‘’విశాలాంధ్ర తాత ‘’అనేవారు .చాలా నిక్కచ్చైన మనిషి .ఆయన చెయ్యి కొంచెం వంకర పోయి కలిపించేది .కమ్యూనిస్ట్ ఉద్యమం లో ఆయన పాల్గొన్నందుకు పోలీసులు కొట్టిన దెబ్బలకు చెయ్యి వంకర పోయి౦ద ని ఆయనే నాకొక సారి చెప్పాడు .ఫోటోలకు ఫ్రేం లు కూడా కట్టేవాడు .చాలా పొందిక గా మర్యాదగా ఉండేవాడు .’’ఏమే మనవడా 1’’అంటూ అందర్నీ పలక రించేవాడు  .ఈ తాత తర్వాత ఏమయ్యాడో తెలియదుకాని చిలుకూరివారి గూడెం లో స్కూల్ కు ఎదురుగా హాస్టల్ కు దగ్గరలో ఒక ప్రభుత్వ హోమియో క్లినిక్ ఉండేది .ఒక సారి ఆ డాక్టర్ గారిని లేక్కలమేస్తారు పరిచయం చేశారు .మాటల సందర్భం లో ఆ యువ డాక్టర్ తాను  విశాలాంధ్ర తాత మనవడినని, తాత చనిపోయి చాలాకాలమై౦దని చెప్పాడు .ఎంత కాలానికి ఎక్కడ ఎలా ఎవరు పరిచయమౌతారో తెలియదు .

గబ్బిట మేష్టారు

చిలుకూరు వారి గూడెం లో చాలాకాలం ఎలిమెంటరీ సెక్షన్ లో పని చేసి అప్పుడు మద్దుల పర్వ స్కూల్ లో సోషల్ మాస్టారుగా పని చేస్తున్న గబ్బిట సుబ్రహ్మణ్య శాస్స్త్రి గారు ఒక సారి మా స్కూల్ కు వచ్చి పరిచయం చేసుకొన్నారు .అయన మానికొండ దగ్గర మానేడు మాక గ్రామం వాడు .నేను మానికొండలో సైన్స్ మేస్టర్ గా పని చేస్తున్నప్పుడు , ఆ ఊరివాడు గబ్బిట దుర్గా ప్రసాద్ అనే నా పేరున్నవాడు మానికొండ హై స్కూల్ లో తోమ్మిదో క్లాస్ చదివాడు. వాడు నా దగ్గర ట్యూషన్ కూడా చదివాడు .వాడితో మిగతా ట్యూషన్ పిల్లలతోరమణారావు రాసిన  ‘’భర్త మార్కండేయ ‘’నాటకం ప్రాక్టీస్ చేయింఛి వార్శికోత్సవం లో వేయించా. ఆ దుర్గా ప్రసాద్ ఈ శాస్త్రి గారి తమ్ముడే . ఈ శాస్త్రిగారికి ఒక సారి ఆక్సిడెంట్ జరిగి బెజవాడ ప్రభుత్వ ఆసుపత్రిలో చికిత్సలో ఉంటె నేనూ  ఆచారిగారు వెళ్లి పలకరించాం .

బాబూ రావు గారి సలహా

యెన్ .బాబూ రావు అనే సెకండరీ గ్రేడ్ టీచర్ గుడివాడ కు దగ్గర వాడు .నల్లగా స్పోటకం మచ్చల తో ఉండేవాడు ..మాజీ ఏం .ఎల్. సి .శ్రీ పి శ్రీరామ మూర్తిగారి అభిమాని లోడ లోడ గా వాగటమే తప్ప సబ్జెక్ట్ బోధించటం తక్కుత. క్లాస్ ను సరిగ్గామేయి౦ టెన్ చేసే శక్తీ లేనివాడు .కాని లోకజ్ఞానం బాగా ఉన్నవాడు .ఒక సారి మాటల సందర్భంగా మా అమ్మాయి విజయ లక్ష్మి టెన్త్ పాసైందని ,పాలిటెక్నిక్ లో చేర్చాలను ఉందని అన్నాను .ఆయన వెంటనే కొత్తగా డి టి, సి .పి.కోర్సు ప్రారంభిస్తున్నారని కంప్యూటర్ నేర్పించే కోర్స్ అని గుంటూరు ప్రభుత్వ గర్ల్స్ పాలిటెక్నిక్ లో ఉందని వివరాలన్నీ చెప్పాడు .దానిప్రకారమే అప్ప్లికేషన్ పెట్టించి సీటు రాగానే చేర్పించి హాస్టల్ లో ఉంచి మూడేళ్ళు చదివించాము .ఈ సలహా ఇచ్చినందుకు బాబూరావుగారికి కృతజ్ఞుడిని .ఇలా తీగలాగితే ఎన్నో డొంకలు  కదుల్తున్నాయి . మరిన్ని విషయాలు మరో సారి .

సశేషం

మీ-గబ్బిట దుర్గా ప్రసాద్ -21-8-16 –కాంప్-బాచుపల్లి –హైదరాబాద్

 

About gdurgaprasad

Rtd Head Master 2-405 Sivalayam Street Vuyyuru Krishna District Andhra Pradesh 521165 INDIA Wiki : https://te.wikipedia.org/wiki/%E0%B0%97%E0%B0%AC%E0%B1%8D%E0%B0%AC%E0%B0%BF%E0%B0%9F_%E0%B0%A6%E0%B1%81%E0%B0%B0%E0%B1%8D%E0%B0%97%E0%B0%BE%E0%B0%AA%E0%B1%8D%E0%B0%B0%E0%B0%B8%E0%B0%BE%E0%B0%A6%E0%B1%8D
This entry was posted in నా దారి తీరు and tagged . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.