7- రోజు కూలీ –పద్మభూషణ్ నజ్రుల్ ఇస్లాం కవిత

బజార్లలో నీ విలాసవంతమైన కార్లు పరుగు దీస్తున్నాయ్

నీపెద్ద నౌకలు సముద్రాలలో వాణిజ్య విహారం  చేస్తున్నాయి

నీ వేగవంతమైన ఆవిరి ఇంజన్లు రైళ్లు నడుపుతున్నాయ్

దేశమంతా నీ యంత్రాలు ,మొక్కలతో నిండిపోయింది

ఇవన్నీ ఎవరి వలన  నీకొచ్చాయో చెప్పగలవా  ?

ఎవరి నెత్తుటితో నీ భవనాలకు ఎర్రరంగు పూయబడిందో

వాటిని కూలిస్తేనే నువ్వు చూడగలవ్

ప్రతి ఇటుకమీద స్పష్టంగా పేర్లు రాయబడి ఉన్నాయ్

నీకు బహుశా తెలియకపోవచ్చు కాని ప్రతిధూళి కణానికీ

 నీ రోడ్ల ,నౌకల, రైళ్ళ ,విలాస హర్న్య వర్ణాల

 అర్ధాల భాగవతమంతా  తెలుసు

త్వరలోనే మంచి రోజులొస్తున్నాయ్

రోజు రోజుకీ నీ అప్పులపాపం పెరిగిపోతుంది

 ఆభారీ రుణాలను నువ్వు తీర్చుకోక తప్పదు

బండ రాళ్ళను గొడ్డలి గునపం కొడవలి

 కఠినశ్రమశక్తితో ముక్కలు చేసిన దినకూలీల  శరీరాలు

 నీ రోడ్డు మీదే నీ కోసం కార్చిన చెమటతో తడిసి

  అటూ ఇటూ విసరివేయబడి ఉన్నాయ్ .

నీకు సేవ చేసిన దేహాలే అవి దినకూలీలవే

దుమ్ము ధూళి లో కప్పబడిన ఆ శరీరాలే

నిన్నూ నీ వాటినీ మోసుకు పోయేవి

వాళ్ళు నిజంగా మానవులే ,రుషి తుల్యులే

వారి అంతరాత్మ గీతాలను నా పాటలతో  పాడుతా

వారి బాధామయ శోకమయ చాతీలపై కవాతు చేస్తూ

కొత్త విప్లవం కొత్త మెదడులోని ఉద్భవిస్తుంది

మేము కింద పడి కుళ్ళి పోతుంటే

హాయిగా మూడో అంతస్తుపై

సుఖ నిద్రపోతున్నావ్ కదూ !

అయినా నువ్వు ప్రభువా అని పించుకోవటం

దారుణం అసంబద్ధం అహేతుకం

ఈ ప్రపంచ అధికారం తనువూ మనసు

 ప్రేమతో అంకితభావంతో ‘జన్మభూమీ కోసం

స్వేదం తో తడిసిముద్దయిన వారిదే

అలుపెరుగనినడకతో  రోడ్లపై

అలసట లేని ప్రయాణం చేసిన వారి పాద ధూళి

నా శిరసుపై పవిత్రమైనదిగా ధరిస్తాను

మానవాళి బాధలు ఇక్కట్లు తొలగిపోతున్నాయ్

నూతన ప్రభాతాన కొత్త సూర్యుడుదయిస్తాడు

ఆ ధూళి దూసరితమైన రోడ్లను కడిగి ‘

త్రుప్పుపట్టిన నీ గుండె ఇరుకు తలుపులను బార్లాతీసి

స్వేచ్చావాయువులనాహ్వానించి ప్రవేశిస్తారు

ఆ ఉప్పొంగే ఉత్సాహంతో

ఉరకలు వేసే వారిని లోనికి స్వేచ్చగా రానివ్వు .

నేరుగా నీ గుండెల్లో దూరిపోతారు

అడ్డంగా ఉన్నవన్నీ కూల్చి ప్రవేశిస్తారు

మొత్తం నీలి స్వర్గం అంతా నీ కళ్ళముందే కూలి పోతుంది

సూర్య చంద్ర నక్షత్రాలు మాపై కురవనివ్వు

అన్నికాలాలప్రజలు , అన్ని రకాల శీతోష్ణ స్థితులు

 గొప్ప సంగమం లా కలిసి వచ్చి

ఒకే జెండా కింద నిలబడి ఐక్య జాతీయ గీతాన్ని ఆలపిస్తారు

ఇక్కడ నువ్వు ఒక్కప్రాణికి హాని తలపెట్టినా

 ఆబాధ దిగంతాలకు పతాక సన్నివేశంగా వ్యాపించి

ప్రతి హృదయంలో తీవ్ర ప్రకంపనలతో ప్రతిధ్వనిస్తుంది

ఒక వ్యక్తికీ జరిగే అవమానం

సకలమాన వాళినీచేసిన అవమానమే

మానవత్వానికి చేసిన ద్రోహమే అవుతుందని గుర్తుంచుకో

ఇవాళే ప్రపంచమానవాళి అనుభవించిన

హృదయవిదారక బాధ  వేదన పై తిరుగు బాటు రోజు అని గుర్తుంచుకో

ఆధారం – పద్మ భూషణ్ ఖ్వాజి నజ్రుల్ ఇస్లాం బెంగాలీ కవితకు అమీర్ హుస్సేన్ చౌదరి ఆంగ్లానువాదం

మీ-గబ్బిట దుర్గాప్రసాద్ -11-7-20-ఉయ్యూరు

—