వంద సినిమాలకు ”పాత్రోచిత ”రచన చేసిన గణేష్ పాత్రో

ప్రముఖ సినీ రచయిత గణేష్‌ పాత్రో కన్నుమూత

కేన్సర్‌తో చెన్నైలో మృతి
కేన్సర్‌తో చెన్నైలో కన్నుమూత

చెన్నై, జనవరి 5 (ఆంధ్రజ్యోతి): దేవుడు సర్వాంతర్యామి అని మనం అనుకుంటాం. కానీ.. అసలు సిసలు సర్వాంతర్యామి ఆకలి అని చెప్పిన మాటల మాంత్రికుడు.. గణేష్‌ పాత్రో(69)! మరోచరిత్ర.. ఇది కథ కాదు.. ఆకలి రాజ్యం.. అంతులేని కథ.. రుద్రవీణ.. స్వాతి.. సీతారామయ్యగారి మనవరాలు.. సీతమ్మ వాకిట్లో సిరిమల్లె చెట్టు.. ఇలా ఎన్నో హిట్‌ చిత్రాలకు సంభాషణలు సమకూర్చిన ఆ ప్రముఖ రచయిత ఇక లేరు! సముద్రమంత లోతున్న జీవితసత్యాలను సైతం అలతి అలతి పదాల్లో అల్లి సామాన్యుడికి సైతం అర్థమయ్యేలా.. గుండె ఆర్ద్రమయ్యేలా.. రాసిన ఆ కలం ఆగిపోయింది!! చాలాకాలంగా కేన్సర్‌తో బాధపడుతున్న ఆయన సోమవారం ఉదయం చెన్నైలో కన్నుమూశారు. తొలుత నోటి కేన్సర్‌కు గురైన పాత్రో దాన్నుంచి బయటపడినా తర్వాత అది ఎముకలు, కాలేయానికి కూడా వ్యాపించడంతో కొన్ని రోజుల క్రితం స్థానిక నందనంలోని వెంకటేశ్వర ఆస్పత్రిలో చేర్పించారు. ఆస్పత్రిలో చికిత్స తీసుకుంటూనే సోమవారం ఉదయం 8.30 గంటల ప్రాంతంలో ఆయన తుదిశ్వాస విడిచారు. పాత్రోకు భార్య లక్ష్మీకుమారి, ఇద్దరు కుమార్తెలు కనకమహాలక్ష్మి, సంయుక్త, కుమారుడు సీతారాం పాత్రో ఉన్నారు. కెనడాలో ఉంటున్న సీతారామ్‌.. నాలుగురోజుల క్రితమే చెన్నైకి వచ్చారు. స్థానిక టి.నగర్‌ కన్నమ్మపేట శ్మశానవాటికలో సోమవారం మధ్యాహ్నం 3గంటల తర్వాత ఆయన భౌతిక కాయానికి అంత్యక్రియలు నిర్వహించారు.
పార్వతీపురంలో పుట్టి..
బీఎస్‌ గణేష్‌ పాత్రోగా అందరికీ సుపరిచితులైన ఆయన అసలు పేరు బెహర సత్య గణ గంగ వెంకట రమణ మహా పాత్రో. విజయనగరం జిల్లా పార్వతీపురం ఆయన స్వస్థలం. 1945 జూన్‌ 22న పాత్రో జన్మించారు. ఆయన తల్లిదండ్రులు.. ఆదిలక్ష్మి నారాయణ పాత్రో, సూర్యకాంతం. ఆ దంపతులకు 17 మంది పిల్లలు. తొలుత ఐదుగురూ ఆడపిల్లలే కావడంతో మగబిడ్డ కోసం ఎందరో దేవుళ్లను ప్రార్థించాక పుట్టిన బిడ్డ కావడంతో పాత్రోకి అంత పెద్ద పేరు పెట్టినట్లు కుటుంబసభ్యులు తెలిపారు. గణేష్‌ పాత్రో విద్యాభ్యాసమంతా పార్వతీపురంలోనే సాగింది. బి.ఎ. పూర్తయ్యాక విశాఖపట్టణంలో పోస్ట్‌ అండ్‌ టెలిగ్రాఫ్స్‌ సంస్థలో తాత్కాలిక ఉద్యోగిగా కొన్నాళ్లు పనిచేశారు. చిన్నతనం నుండే ఆయనకి నాటకాలు, రచనలపై మక్కువ ఏర్పడింది. క్రమేపీ నాటక రచనలో ఆయనకి పట్టు దొరికింది. ‘పావలా’, ‘కొడుకు పుట్టాల’, ‘లాభం’, ‘అసుర సంధ్య’, ‘ఆలోచించాలి’ వంటి అద్భుతమైన నాటకాలను రాశారు. ఆ సమయంలోనే ఆనాటి ప్రముఖ రంగస్థల నటుడు కుప్పిలి వెంకటేశ్వర రావుతో పాత్రోకి పరిచయం కలిగింది. ఇద్దరూ కలిసి నాటకాలు వేసేవారు. ‘‘అయితే రచన లేదా నటన ఏదో ఒకదానినే ఎంచుకుంటే అద్భుతంగా రాణించగలవు. రచయితగా నువ్వు గొప్ప స్థాయికి చేరుకుంటావని నాకు నమ్మకముంది’’ అని వెంకటేశ్వరరావు సలహా ఇచ్చారు. దాంతో పాత్రో పూర్తిగా రచనపైనే దృష్టి సారించారు. కుప్పిలి కుమార్తెనే పాత్రో పెళ్లి చేసుకున్నారు. ప్రేమించి, పెద్దల అంగీకారంతో లక్ష్మీ కుమారిని జీవిత భాగస్వామిగా చేసుకొన్నారు. అక్కినేని అంటే ఇష్టపడే పాత్రో.. ఆయన సినిమాలు చూసి చిత్రరంగంపై మక్కువ పెంచుకున్నారు. విశాఖ నుంచి చెన్నైకి చేరుకుని సినీ ప్రస్థానాన్ని ప్రారంభించారు. అప్పట్లో బాలచందర్‌ పరిచయంతో ఆయన తీసిన చిత్రాలకు తెలుగులో తానే మాటలు రాశారు. మొత్తం తన కెరీర్‌లో 100కి పైగా సినిమాలకు మాటలు రాశారు. అందులో ఎక్కువ భాగం సూపర్‌ హిట్‌లే. వెంకటేష్‌, మహేష్‌బాబుల ‘సీతమ్మ వాకిట్లో సిరిమల్లె చెట్టు’ (2013లో) పాత్రో ఆఖరి సినిమా. ఇక అతికొద్ది సినిమాల్లో నటుడిగానూ మెరిశారు పాత్రో. వడ్డే నవీన్‌ నటించిన ‘శ్రీ బాలాజీ’ చిత్రంలో కీలకపాత్ర పోషించి మెప్పించారు.

మాటల సవ్యసాచి (03-Jan-2015)
నాటక రంగం నుంచి తెలుగు చిత్రసీమలో అడుగుపెట్టి, కె. బాలచందర్‌ వంటి దిగ్దదర్శకుడిని మెప్పించి, ఆయన తెలుగు చిత్రాల ఆస్థాన సంభాషణల రచయితగా పేరుపొందడం ఆషామాషీ వ్యవహారం కాదు. అలాంటి చరిత్రను సాధించిన రచయిత గణేశ్‌ పాత్రో. ఆయన సంభాషణలు రచించిన సినిమాలే రచయితగా ఆయన గొప్పతనమేమిటో తెలియజేస్తాయి. ఫ్యామిలీ సినిమాలైనా, సీరియస్‌ సినిమాలైనా, ప్రేమకథలైనా.. ఏదైనా సరే, తనదైన ప్రత్యేకశైలి సంభాషణలతో మెప్పించిన మాటల సవ్యసాచి పాత్రో. విశాఖ నుండి చెన్నైకి వచ్చారు. 100కిపైగా సినిమాలకు మాటలు రాశారు. 1976లో కె. ప్రత్యగాత్మ దర్శకత్వం వహించిన ‘అత్త వారిల్లు’ చిత్రంతో సినీ మాటల రచయితగా తెలుగు ప్రేక్షకులకి పరిచయమయ్యారు. 1978లో వచ్చిన కె. బాలచందర్‌ సినిమా ‘మరోచరిత్ర’ ఆయన కెరీర్‌ని మలుపుతిప్పింది. అక్కడ నుండి వెనుదిరిగి చూడాల్సిన అవసరం రాలేదు. బాలచందర్‌ తీసిన తెలుగు సినిమాలన్నింటికీ పాత్రోనే మాటల రచయిత. వాటిలో ‘గుప్పెడు మనసు’, ‘ఇది కథ కాదు’, ‘తొలికోడి కూసింది’, ‘ఆకలి రాజ్యం’, ‘రుద్రవీణ’ వంటి ఎన్నో అపురూ పమైన సినిమాలున్నాయి. ఇక 1984లో వచ్చిన ‘మనిషికో చరిత్ర’, ‘మయూరి’, ‘మంగమ్మగారి మనవడు’, ‘స్వాతి’, 1985లో వచ్చిన ‘ప్రేమించి పెళ్లాడు’, ‘మా పల్లెలో గోపాలుడు’, 1988లో వచ్చిన ‘మురళీకృష్ణుడు’, 1989లో వచ్చిన ‘ముద్దుల మావయ్య’, 1991లో వచ్చిన ‘సీతారామయ్యగారి మనవరాలు’, ‘నిర్ణయం’, ‘జానకిరాముడు’, 2001లో వచ్చిన ‘9 నెలలు’ చిత్రాలు పాత్రోకి ఎంతో పేరు ప్రఖ్యాతులు తెచ్చిపెట్టాయి. ‘9 నెలలు’ తర్వాత పన్నెండేళ్ల విరామంతో 2013లో వచ్చిన వెంకటేశ్‌, మహేశ్‌ సినిమా ‘సీతమ్మ వాకిట్లో సిరిమల్లెచెట్టు’, పాత్రో ఆఖరి సినిమా. ‘అందమైన అనుభవం’, ‘నిర్ణయం’ చిత్రాల్లో పాటలు రాశారు. ఇక అతికొద్ది సినిమాల్లో నటుడిగాను మెరిశారు పాత్రో. వడ్డే నవీన్‌ నటించిన ‘మా బాలాజీ’ చిత్రంలో కీలకపాత్ర పోషించి మెప్పించారు.
అవార్డులు…
పాత్రో ప్రతిభకి పలు అవార్డులు పాదాక్రాంతమయ్యాయి. ‘స్వాతి’, ‘మయూరి’, ‘సీతారామయ్య గారి మనవరాలు’, ‘ఆకలిరాజ్యం’ చిత్రాలకు నంది అవార్డులు అందుకున్నారు. రాష్ట్ర, జాతీయ స్థాయిలో ఎన్నో సంస్థల సన్మానాలు అందుకున్నారు.
‘మనవడా.. నీతో సినిమా
చెయ్యాలి అనేవారు
‘‘గణేష్‌ పాత్రోగారు నాకు తాతయ్య వరుస. ఆయ నకి గొల్లపూడి మారు తీ రావుగారు క్లోజ్‌ ఫ్రెండ్‌. వారిద్దరూ గంటలు గంటలు మాట్లాడుకునే వారు. మధ్యలో ఆయన ఫోన్‌ చేసి ‘మనవడా… నీ సంగీతం, సినిమాల గురించే డిష్కషన్‌ చేసుకుంటున్నాం’ అనే వారు. ఆ సమయంలో చాలా గర్వంగా అనిపించేది. పనిమీద ప్రేమ ఉండే వ్యక్తి. చేసే పనికి వందశాతం న్యాయం చేయాలనే ఆయన ఆలోచన నాకు స్ఫూర్తి. చిన్న డైలాగ్‌తో సామాన్య ప్రేక్షకుడికి అర్థమయ్యేట్లు చెప్పగల ఇంటెలెక్చువల్‌ ఆయన. ‘ఆకలిరాజ్యం’, ‘రుద్రవీణ’ చిత్రాల్లో ఆయన రాసిన సంభాషణలంటే నాకు ఆరాధన. నేను చేసిన ‘బ్రోకర్‌’ చిత్రం చూసి ‘మనవడా… నీతో సినిమా చెయ్యాలి, నీ థాట్‌ నాకు చాలా బాగా నచ్చింది… నీ తదుపరి చిత్రానికి నేను వర్క్‌ చేస్తా… ఏమంటావ్‌?’ అన్నారాయన. చాలాసార్లు ‘నేను నీ తాతను కాబట్టి పొగడకూడదు కానీ.. గ్రేట్‌ మనవడా’ అనటం నా మనసుకి మంచి అనుభూతి కలిగింది.
చాలామందికి తెలీని విషయం కృష్ణ, రామ్మోహన్‌ను హీరోలుగా పరిచయం చేస్తూ ఆదుర్తి సుబ్బారావు రూపొందించిన ‘తేనె మనసులు’ చిత్రానికి మిగతావాళ్లతో పాటు పాత్రో సైతం ఓ పాత్ర కోసం దరఖాస్తు చేసుకున్నారు. స్ర్కీన్‌ టెస్ట్‌కు సైతం ఆయనను పిలిచారు. అయితే ఆ ఉత్తరాన్ని అందుకున్న వాళ్ల నాన్న దీనికి తీవ్ర వ్యతిరేకత వ్యక్తం చేయడంతో వెళ్లలేకపోయారు.
పాత్రో దర్శకత్వంలో ‘ప్రతిమ’ అనే చిత్రం 1986లో ప్రారంభమైంది. విశాఖపట్నంలో కొంత షూటింగ్‌ జరిగాక, ఆగిపోయింది. అది పూర్తయివుంటే, నటి గౌతమికి అదే మొదటి సినిమా అయ్యేది. ఉషాకిరణ్‌ మూవీస్‌ తలపెట్టిన ఈ చిత్రానికి సంగీత దర్శకుడిగా ఎస్పీ బాలసుబ్రహ్మణ్యం పనిచేశారు. తెలీని కారణాల వల్ల సినిమా ఆగిపోవడంతో దీని కోసం రికార్డ్‌చేసిన పాటలను ఆ తర్వాత వేరే సినిమాలకు ఉపయోగించుకున్నారు.
ఆత్రేయ – పాత్రో
ప్రసాద్‌ ఆర్ట్‌ పిక్చర్స్‌ (పీఏపీ) నిర్మించిన ‘అత్తవారిల్లు’ చిత్రానికి రచయితగా పాత్రోకు అవకాశమిచ్చారు, దాని దర్శకుడు కె. ప్రత్యగాత్మ. ఆ రోజుల్లో పాత్రో వద్ద పెద్దగా డబ్బులు లేవు. స్కూల్లో చదువుకుంటున్న ఆయన ఇద్దరు పిల్లలకు ప్రవేశ రుసుము కూడా కట్టలేని దుస్థితి! పెద్ద బేనర్‌లో అవకాశం వచ్చిందన్న ఆనందం ఓ వైపు, తన పారితోషికాన్ని ఎలా అడగాలనే సంశయం మరోవైపు. అప్పుడు ఆత్రేయ ఆయనను ఆదుకున్నారు. పీఏపీ సంస్థ నుంచి పారితోషికం డబ్బులేవైనా అందాయా, లేదా అని పాత్రోని అడిగారు. అందలేదని పాత్రో చెప్పడంతో, ఇంటి పరిస్థితులు ఎలా ఉన్నాయని వాకబుచేసి, తన అసిస్టెంట్‌ను పంపి, పిల్లల స్కూలు ఫీజులు కట్టేశారు. మరికొంత డబ్బు పాత్రో చేతుల్లో పెట్టారు. అయితే ఆ తర్వాత పీఏపీ నుంచి ఆయనకు పారితోషికం అందింది. ఈ విషయం చెప్పి, ఆత్రేయ సాయం చేసిన డబ్బును తిరిగివ్వబోయారు పాత్రో. కానీ ఆయన సున్నితంగా తిరస్కరించారు. ప్రఖ్యాత దర్శకుడు బాలచందర్‌కు పాత్రోను పరిచయం చేసింది కూడా ఆయనే. మలయాళంలో హిట్టయిన ఓ సినిమాని ఈరంకి శర్మ తెలుగులో ‘చిలకమ్మ చెప్పింది’ పేరుతో రూపొందించారు. దానికి బాలచందర్‌ దర్శకత్వ పర్యవేక్షణ బాధ్యతలు నిర్వర్తించారు. సెట్స్‌ మీద కూడా దర్శకుడితో ఎక్కువ సమయం వెచ్చించగల రచయిత కావాలని బాలచందర్‌గారు అనుకున్నారు. అప్పట్లో ఆత్రేయ బాగా బిజీగా ఉన్నారు. బాలచందర్‌ అసిస్టెంట్‌ అయిన అనంతుకు పాత్రోని పరిచయం చేశారు. పాత్రో రంగస్థల నేపథ్యం తెలుసుకున్న అనంతు ఆయనను బాలచందర్‌ వద్దకు తీసుకుపోయారు. అలా ‘చిలకమ్మ చెప్పింది’ చిత్రానికి పనిచేశారు పాత్రో. ఆయన పనితనం బాలచందర్‌కు బాగా నచ్చింది. కమల్‌హాసన్‌ హీరోగా ‘మరో చరిత్ర’ను తెలుగులో తీయాలని బాలచందర్‌ సంకల్పించారు. ఆత్రేయతోటే సంభాషణలు రాయించాలని ఆయన అనుకున్నారు. అయితే ఆరోగ్య కారణాలతో ఆయనతో పాటు సెట్స్‌పై పూర్తి సమయం వెచ్చిం చే స్థితిలో ఆత్రేయ లేరు. అందుకని ఆయన స్థానంలో రచయితగా పాత్రోని తీసుకుంటానని ఆత్రేయకు చెప్పారు బాలచందర్‌. ఆత్రేయ ఏమాత్రం నొచ్చుకోకుండా పాత్రోని మనసారా ఆశీర్వదించారు. అలా బాలచందర్‌తో పాత్రో అనుబంధం మొదలైంది. అందుకే చిత్రసీమలో రచయితగా తను ఎదగడానికీ, పేరు తెచ్చుకోవడానికీ ఆత్రేయ ఆశీస్సులే కారణమని పాత్రో ప్రగాఽఢంగా నమ్మేవారు.
బాలచందర్‌ – పాత్రో
చిత్రసీమలో బాలచందర్‌తో దాదాపు ఇరవై ఏళ్లపాటు కలిసి ప్రయాణించారు పాత్రో. సున్నిత మనస్కుడిగా పేరున్న బాలచందర్‌ తన చుట్టూ ఉన్న మనుషుల పట్ల చాలా శ్రద్ధ చూపుతారు. అయితే నిర్లక్ష్యాన్ని ఆయన ఏమాత్రం సహించరని పేరు. అలాంటి ఆయన ముందు సిగరెట్‌ తాగడానికి అనుమతి ఉన్న ఏకైక వ్యక్తి పాత్రో అనేది నిజం. ఆ రోజుల్లో పాత్రో చైన్‌ స్మోకర్‌గా పేరుపొందారు. బాలచందర్‌ ముందు సిగరెట్లు తాగడానికి ఎవరూ ధైర్యం చేసేవాళ్లు కాదు. షూటింగ్‌ మధ్యలో సిగరెట్‌ తాగడం కోసం సెట్స్‌ బయటకు వెళ్లేవారు పాత్రో. ఆయన కంటిముందు కనిపించకపోవడంతో వాకబు చేసేవారు బాలచందర్‌. పాత్రో సెట్స్‌ మీదకు వచ్చాక, ఎక్కడికెళ్లావని అడిగేవారు. సిగరెట్‌ తాగడానికి వెళ్లానని పాత్రో చెప్పేవారు. ఓ వారం రోజుల పాటు ఇదే కొనసాగడంతో ఆయన పాత్రోని పిలిచి ‘‘ఇక్కడున్న వాళ్లలో దాదాపు అందరూ సిగరెట్‌ తాగేవాళ్లే. కానీ అలాంటి అలవాటే లేని మంచివాళ్లుగా నా దృష్టిలో పడాలని ప్రయత్నిస్తుంటారు. నువ్వొక్కడివే ధైర్యంగా సిగరెట్‌ తాగుతున్నానని చెప్తున్నావ్‌. షూటింగ్‌ జరిగే టైమ్‌లో నువ్వు సెట్స్‌ మీదే ఉండటం నాక్కావాలి. కాబట్టి, నా ముందే నువ్వు నిరభ్యంతరంగా సిగరెట్‌ తాగొచ్చు. దానివల్ల ఇద్దరికీ సమయం కలిసొస్తుంది’’ అన్నారు. షూటింగ్‌కు ప్యాకప్‌ చెప్పాక తర్వాత తీయాల్సిన సన్నివేశాల గురించి చర్చించుకుని, ఎవరి వెర్షన్‌లో వాళ్లు డైలాగ్స్‌ రాసేవాళ్లు ఆ ఇద్దరూ. మరుసటి రోజు షూటింగ్‌ మొదలుపెట్టే ముందు మాత్రమే వాళ్లు ఒకరి డైలాగ్స్‌ను మరొకరు చూసుకునేవాళ్లు. ఇక్కడ విశేషమేమంటే, పాత్రో సంభాషణల స్థాయిలో తన తమిళ వెర్షన్‌ డైలాగ్స్‌ లేవని భావించిన బాలచందర్‌, వాటిని మరింత బాగా రాయడం కోసం షూటింగ్‌ను వాయిదా వేసిన సందర్భాలు చాలానే ఉన్నాయి. అలాగే ఓ ద్విభాషా చిత్రం తమిళ వెర్షన్‌కు ‘నూల్‌ వేలి’ (దారపు హద్దు) అనే టైటిల్‌ పెట్టారు బాలచందర్‌. తెలుగుకు ఆ టైటిల్‌ నప్పదని చెప్పిన పాత్రో, ‘గుప్పెడు మనసు’ టైటిల్‌ సూచించారు. దాన్నే తెలుగు సినిమాకు పెట్టారు బాలచందర్‌. ఆ టైటిల్‌ ఆయనకు ఎంత నచ్చిందంటే తర్వాత కాలంలో తను తీసిన ఓ టీవీ సీరియల్‌కు ‘గుప్పెడు మనసు’ అనే పేరు పెట్టారు. అదీ పాత్రోకు ఆయనిచ్చిన గౌరవం, విలువ!

డెభ్బై – తొంభైలలో సినిమాలు చూసిన వాళ్లకు –
సినిమాల పేర్లు గుర్తుకున్నాయో లేదో తెలియదు కానీ.. ‘కథ, మాటలు – గణేష్‌పాత్రో’ అనే టైటిల్‌ మాత్రం కళ్లకు కట్టినట్లు మిగిలుంది. ఎందుకంటే ఆయన డైలాగులు నవరసాల నైవేద్యం కాబట్టి! పదుల సంఖ్యలో నాటకాలు, వందకు పైగా సినిమాల రచయితగా కీర్తిగడించిన ఆయన నిన్ననే కన్నుమూశారు. ఆ సందర్భ్బంగా పాత్రో జ్ఞాపకాలను గుర్తుకు చేసుకున్నారు ప్రముఖ తెలుగు సినీ రచయిత దివాకర్‌బాబు..
‘‘కథకు పొంతన లేకుండా, పాత్రలకు సంబంధం లేకుండా రాసే రైటర్‌ కాదు ఆయన. ఒక క్యారెక్టర్‌కు ఒక మాట రాశాడంటే.. ఆ మాట సినిమా చూస్తున్న ప్రేక్షకుడి గుండెలోతుల్లోకి దూసుకెళ్లేది. కదిలించేది. నవ్వించేది. ఏడిపించేది. ఎంతటి విషయాన్నైనా వీలైనంత క్లుప్తంగా, సూటిగా, స్పష్టంగా చెప్పడం గణేష్‌పాత్రోకు వెన్నతోపెట్టిన విద్య. ఆయన పాత్రలతో మాట్లాడించే ప్రతీమాట కథతో మమేకం అయ్యుండేది. హీరోయిజాన్ని దృష్టిలో పెట్టుకుని ఏ రోజు రాయలేదు. అందుకే పాత్రో మాటలు పాత్రోచితంగానే మురిపిస్తాయి.
కదిలించిన నాటకాలు..
గణేష్‌పాత్రో నాటకాలు ఈ తరానికి తెలియకపోవచ్చు కాని.. మా తరాన్ని కదిలించాయవి. ఆయన ఎంత వేగవంతమైన రైటర్‌ అంటే- అప్పటికప్పుడు అనుకుని చకచకా రాసేయడంలో దిట్ట. ఒకసారి ఢిల్ల్లీలో నాటక పోటీలు జరుగుతున్నప్పుడు.. ఒక నాటకాన్ని రాయాలనుకున్నారు. అనుకున్నదే తడువు రాసి పోటీలకు పంపించి.. బహుమతి సాధించడం ఆయనకే చెల్లింది. పాత్రో రాసిన నాటకాల్లో నన్ను బాగా ఇన్‌స్పైర్‌ చేసింది ‘త్రివేణి’ నాటకం. జాతీయ భావాన్ని పెంపొందించే ఇతి వృత్తంతో వచ్చిందది. ఆ రోజుల్లో నేను కూడా అందులో ఒక పాత్ర వేసి స్టేజీ మీద నటించాను. దర్శకత్వమూ వహించాను. నన్ను నేను రైటర్‌గా తీర్చిదిద్దుకునేందుకు ఆ నాటకం ఎంతో ప్రేరణనిచ్చింది. ‘త్రివేణి’తో పాటు ‘కొడుకు పుట్టాలా?’, ‘పావలా’ వంటి నాటకాలు సైతం యువతను బాగా ఆకట్టుకున్నాయి.
మాటలు కాదు.. తూటాలు..
‘మరో చరిత్ర’ సినిమాను మనం ఎప్పటికైనా మరిచిపోగలమా? అది సాధ్యం కాదు. ప్రతి తరం ఆ సినిమాను చూస్తుంది. సినిమాతో పాటు దాని రచయిత గణేష్‌ పాత్రోను గుర్తుపెట్టుకుంటుంది ప్రేక్షకలోకం. ఆ చిత్రంలో ఒక సీను – హీరోయిన్‌ను వేధిస్తుంటాడు దుకాణం నడిపే విలన్‌. హీరోయిన్‌ ఆ షాపుకు వచ్చినప్పుడు ఒక ఫోటో ఆల్బమ్‌ తెరిచి.. నగ్నంగా ఉన్న అమ్మాయిల బొమ్మలు చూపిస్తాడతను. ఆ సందర్భంలో హీరోయిన్‌ వైపు అదోలా చూస్తూ ‘‘ఎలా ఉన్నాయ్‌?’’ అని అడుగుతాడు విలన్‌. అప్పుడు ఆ అమ్మాయి ‘‘చాలా బాగున్నాయ్‌! ఎవరివి మీ అమ్మవా?’’ అంటుంది. వాడికి అంతకంటే తగిన సమాధానం ఇక ఏ మాటలో దొరుకుతుందో చెప్పండి? ఇలా ప్రతీ డైలాగు ఎంత శక్తివంతమైనదో సినిమా చూసినవాళ్లకు అర్థం అవుతుంది.
ఇదే సినిమాలో మరోచోట – హీరోయిన్‌ను ‘‘అమ్మా, నీ బొట్టు ఏమైంది?’’ అనడుగుతాడు వాళ్ల అన్నయ్య. అప్పుడామె ‘‘కన్నీటి బొట్టు అయ్యింది’’ అంటుంది. అతను అడిగిన ప్రశ్నకు, ఆమె ఇచ్చిన సమాధానంతో ఆ సన్నివేశపు భావం ప్రేక్షకులకు సులువుగా అర్థం అవుతుంది.
రచయితలంటే గౌరవం..
నేడు రచయితలకు తోటి రచయితల మీద ఏమాత్రం గౌరవం ఉంటున్నదో అందరికీ తెలిసిందే! ఎవరో రాసిన కవితలను, పాటలను సినిమాల్లో వాడుకుని పేర్లు వేసుకునేవాళ్లున్న కాలం ఇది. ఆ రోజుల్లో గణేష్‌పాత్రోకు తోటి రచయితలంటే గౌరవం ఉండేది. ‘ఆకలిరాజ్యం’ తీస్తున్నప్పుడు- బాలచందర్‌, కమల్‌హాసన్‌లు ఇద్దరు తమిళులు. తెలుగులో ఏమి రాసినా వారేమీ పట్టించుకోరు. అలాంటిది.. ఈ సినిమాలో కమల్‌హాసన్‌కు శ్రీశ్రీ కవితలను మాటలుగా పెట్టారు గణేష్‌పాత్రో. ప్రతిచోట గమనిస్తే.. ‘శ్రీశ్రీ అన్నట్లు’ అంటూ రచయితను గుర్తుచేస్తూనే కవితను ఎత్తుకుంటాడు హీరో. అంతటి గొప్ప రచయితతో నేను కలిసి పనిచేయలేదు కానీ.. చాలాసార్లు కలిసే అవకాశం వచ్చింది. నేను రాసిన ‘శుభలగ్నం’, ‘మావిచిగురు’ చిత్రాలు కూడా ఆయనకు బాగా నచ్చాయి..’’

About gdurgaprasad

Rtd Head Master 2-405 Sivalayam Street Vuyyuru Krishna District Andhra Pradesh 521165 INDIA Wiki : https://te.wikipedia.org/wiki/%E0%B0%97%E0%B0%AC%E0%B1%8D%E0%B0%AC%E0%B0%BF%E0%B0%9F_%E0%B0%A6%E0%B1%81%E0%B0%B0%E0%B1%8D%E0%B0%97%E0%B0%BE%E0%B0%AA%E0%B1%8D%E0%B0%B0%E0%B0%B8%E0%B0%BE%E0%B0%A6%E0%B1%8D
This entry was posted in వార్తా పత్రికలో and tagged . Bookmark the permalink.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out /  Change )

Twitter picture

You are commenting using your Twitter account. Log Out /  Change )

Facebook photo

You are commenting using your Facebook account. Log Out /  Change )

Connecting to %s

This site uses Akismet to reduce spam. Learn how your comment data is processed.