• 20/06/2015

ఆదివారం-జూన్ ఇరవై ఒకటవ తేదీన జరుగుతున్న ‘అంతర్జాతీయ యోగ దినోత్సవం’ మానవాళి చరిత్రలో ఒక నూతన అధ్యాయానికి శ్రీకారం…సమన్వయసాధన పథంలో మరో ప్రగతి పదం. ఐక్యరాజ్య సమితిలో సభ్యత్వం ఉన్న దాదాపు అన్ని దేశాలూ మన ప్రధాని నరేంద్ర మోదీ చేసిన ‘యోగ దినోత్సవ నిర్వహణ’ ప్రతిపాదనను ఆమోదించడం మన దేశానికి లభించిన సాంస్కృతిక విజయం. శరీరం, మనస్సు, బుద్ధి కలసి మెలసి ఎకోన్ముఖ స్థితి ఏర్పడడం యోగం. ఈ ఏకోన్ముఖ స్థితి మంచి నడవడి. మంచి నడవడిని మానవాళికి నేర్పిం చే సంస్కారాల సమన్వయతత్త్వం యోగం. యోగ విద్య మనదేశంలో అంకురించింది, పల్లవించింది, వికసించింది, పరిమళించింది. ఈ పరిమళం ప్రపంచ మానవాళికి మాధుర్యాన్ని పంచిపెట్టడం చరిత్ర. ఆ మాధుర్యం మానవులను నిజమైన మానవులుగా దిద్దడానికి దోహదం చేసిన చరిత్ర. జంతు ప్రవృత్తి నుంచి పైశాచికమైన వికృతులనుంచి తప్పించి మానవుడిని సంస్కృతి నిబద్ధుడిని చేసిన మాధ్యమం యోగం. యోగవిద్య మనదేశలో పుట్టినప్పటికీ మొత్తం ప్రపంచానికి ఉపయోగపడడం తరాల చరిత్ర. ఈ సంస్కారబద్ధులైన సమయంలో మానవులు ఇతర మానవులను పీడించలేదు. ఈ సంస్కారానికి దూరమైన సమయంలో మానవులు దురాక్రమణ దారులుగా మారారు. కలయిక-యోగం-ఆయా జాతుల మనస్సులలో వికసించకపోవడమే ఇందుకు కారణం… యోగం వికసించడమంటే శరీరం, మనస్సు, బుద్ధి ఒకే లక్ష్యం వైపు ఏకోన్ముఖంగా కేంద్రీకృతం కావ డం. ఈ ఏకోన్ముఖ లక్ష్యం ఆత్మసాక్షాత్కారం. ఒకే ఆత్మ అద్వితీయమైన ఆత్మ. అనంతకోటి బ్ర హ్మాండాలుగా, అసంఖ్యాక జీవాత్మలుగా ప్రస్ఫుటిస్తుండడం విశ్వవ్యవస్థలోని వ్యవహార వాస్తవం. ఈ జీవన వాస్తవం, యోగం ద్వారా యోగ విన్యాసాల ద్వారా ధ్రువపడడం సమన్వయం. అసంఖ్యాక రూపాల, వైవిధ్యాల స్వభావం ఒక్కటే…వైవిధ్యాలన్నీ అద్వితీయమైన సత్యంలో ఆత్మతో సమన్వయమై ఉండడం యోగం-కలయిక! ఈ జీవన వాస్తవాన్ని ‘ప్రపంచం’ ఆచరించగలిగినప్పుడు వైవిధ్యాల మధ్య వైరుధ్యం లేదు. మతాల మధ్య, భాషల మధ్య, వర్గాల మధ్య, దేశాల మధ్య, జాతుల మధ్య, జీవజాలం మధ్య, చరాచర విశ్వ స్వరూపాల మధ్య విరోధం లేదు. ఈ సంస్కార మాధ్యమం భారతీయ జీవన యోగం! కలిసి ఉండడమే విలీనమై ఉండడమే యోగ స్వభావం. శరీరం బుద్ధి మనస్సు ఆత్మతో కలసి ఉండాలి. మానవాళి కలసిమెలసి ఉండాలి. ఇదే వసుధైక కుటుంబం…ప్రపంచ మంతా ఒకే కుటుంబం, ఒకే ఇల్లు! అలాగే మన పుడమి విశ్వవ్యవస్థలోని అసంఖ్యాక గ్రహాలతో నక్షత్రాలతో బ్రహ్మాండాలతో కలసి ఉండడం సహజమైన యోగం. మహా మేళనం యోగం. అంతర్జాతీయ యోగ దినోత్సవం ఈ సహజ సమన్వయ తత్వానికి చిహ్నం..
యోగవిద్య, యోగాభ్యాసం, యోగాచరణ, యోగ ప్రబోధం అందువల్ల అనాదిగా ఉన్న సహజ జీవన విన్యాసాలు, సహజత్వానికి తప్పిపోకపోవడం, కృత్రిమత్వానికి గురికాకపోవడం యోగం. అనాది యోగశాస్త్రాన్ని దాదాపు మూడువేల మూడువందల ఏళ్ల క్రితం పతంజలి మహర్షి మరోసారి వివరించాడు. యోగశాస్త్రం ఆరు వేద దర్శన శాస్త్రాలలో ఒకటి. మానవాళికి మార్గదర్శనం చేసేది దర్శనాలు. పతంజలి హఠయోగం అని రాజయోగం అని యోగాభ్యాస పద్ధతులను వర్గీకరించాడు. హఠయోగం ప్రధానంగా శరీరానికి పుష్టిని కలిగించే వ్యాయామం. రాజయోగం శరీరానికి మనస్సునకు బుద్ధికీ కూడ సౌష్టవం కలిగించే ప్రక్రియ మాత్రమే కాదు. నైతికనిష్ఠను పెంపొందించే జీవనరీతి కూడ. అందువల్లనే యోగం కేవలం ఆసనాలకు, ప్రాణాయామానికి ధ్యానానికి పరిమితమైనది కాదు. యమ, నియమ, ఆసన, ప్రాణాయామ, ప్రత్యాహార, ధారణ, ధ్యాన, సమాధి ఇవన్నీ యోగంలోని ఎనిమిది విభాగాలు. ఇవన్నీ మానవులు ఇరవైనాలుగు గంటల దినంలో సహజంగా పాటించదగిన జీవన సూత్రాలు. హింస చేయరాదు, దొంగతనం చేయరాదు, అబద్ధాలు చెప్పరాదు, ఉన్నదానిలో సంతృప్తి చెందాలి. అత్యాశతో యాచించరాదు, దోచుకోరాదు, శుభ్రతను పెంపొందించుకోవాలి వంటి నైతిక సూత్రాలు యోగంలో భాగం. ప్రభుత్వం ప్రారంభించిన స్వచ్ఛ్భారత కార్యక్రమం యోగం నిర్దేశించే స్వచ్ఛతలో భాగం. ఈ స్వచ్ఛత మానసిక పరిశుభ్రత, శరీర ఆరోగ్యం మాత్రమే కాదు, పరిసరాల పరిరక్షణ కూడ.
యోగసూత్రాలకు దూరమైన జాతులు ఇతర జాతులను దోపిడీ చేయడం చరిత్ర. శక్తిని గాయాలను మాన్పడానికి-క్షతత్రాణ కార్యక్రమానికి-వినియోగించకుండా గాయాలను కలిగించడాన్ని ‘క్షతికారులు’ ఉపయోగించడం వల్ల ప్రపంచ సమాజం అల్లకల్లోలమైంది. సంతృప్తి చెందని జాతులు ఇతర దేశాలను దురాక్రమించడం ఇతర దేశాల ప్రజలను అణచివేతకు ఆర్థిక శోషణకు గురి చేయడం శతాబ్దుల చరిత్ర. కలసి జీవించడమన్న యోగం నష్టమై కలహించడమే ప్రపంచంలోని అనేక దేశాలలోని ప్రజల సమష్టి స్వభావంగా మారింది. ఈ కలహించే ప్రవృత్తి మానసిక వికృతి. ఈ వికృతులు అంతర్గత సమాజంలో, అంతర్జాతీయ సమాజంలోను, వైరుధ్యాలను వ్యవస్థీకరించడం కొనసాగుతున్న వైపరీత్యం. మానసిక సంతులనం, మానసిక ప్రశాంతిని కోల్పోయిన వారు రకరకాల ఒత్తడికి గురి అవుతున్నారన్నది దాదాపు అన్ని దేశాలలోను ప్రచారమవుతున్న మనోవైజ్ఞానిక వాస్తవం. అందువల్లనే ప్రశాంతిని వెతుక్కుంటూ వివిధ దేశాలవారు యోగభూమి అయిన మనదేశానికి తరలిరావడం ఆధునిక పరిణామం. అలాగే ఈ దేశంనుండి తమ దేశానకి వచ్చిన వివేకానందస్వామి వారి నుండి మానసిక ప్రశాంతిని, నైతిక జీవనాన్ని నేర్చుకొనడానికి అనేక దేశాల ప్రజలు తపించడం కూడ ఆధునిక పరిణామం. యోగం, నేర్పడానికి నేర్చుకొనడానకి భారతీయ ధర్మాచార్యుల నేతృత్వంలో ప్రపంచవ్యాప్తంగా కేంద్రాలు, సంస్థలు, మందిరాలు, విశ్వవిద్యాలయాలు నెలకొంటుండడం కూడ ఆధునిక పరిణామం. ఈ ఆధునిక పరిణామం అతి ప్రాచీన పరిణామ క్రమానికి పునరావృత్తి. ఈ దేశానికి వచ్చి, ఈ దేశం నుండి పృథివీ తలంలోని సర్వమానవులూ జీవన సంస్కారాలను నేర్చుకొని వెళ్లడం అతిప్రాచీన చరిత్ర. ఈ జీవన యోగం మధ్యకాలంలో మరుగున పడింది. వివేకానందుని వంటివారి కృషి ఫలించి చరిత్ర మళ్లీ పునరావృత్తవౌతోంది. నైతిక నిష్ఠను జీవన సంస్కారాలను నేర్చుకొనడానికై ప్రపంచ ప్రజలు మళ్లీ భారతదేశం వైపు చూస్తున్నారు. భారత్ విశ్వ విజేత కావాలని ఆహంకరించడం లేదు. ఇదీ వౌలికమైన యోగం…ఈ యోగం వల్లనే భారతదేశం విశ్వగురువైంది.
యోగం పెరగడం వల్ల రోగం నశిస్తుంది. సృష్టి, ప్రకృతి, సమాజం, మానవుడు, పరస్పరం విభేదించే విరుద్ధ అంశాలు కాదు. పరస్పరం పరిపోషకమైన సహజ స్వభావ రూపాలు. ప్రకృతి తానేనని మానవుడు భావించినప్పుడు యోగం వికసిస్తుంది. ప్రకృతి తనకంటె భిన్నమని భావించిన మానవుడు ప్రకృతిని ధ్వంసం చేస్తున్నాడు. భౌతికమైన, మానసికమైన రోగాలకు ఇదీ కారణం. సమాజం తనకంటె భిన్నమని భావించడం వల్లనే మానవుడు ఆర్థిక రోగాన్ని విస్తరింపచేశాడు. ఈ రోగం దోచుకొనడం. ప్రకృతిని సామాజాన్ని పరిరక్షించడం వల్ల మాత్రమే తనకు సర్వాంగీణ వికాసం కలుగుతుందన్న సృష్టిగత సత్యాన్ని వ్యక్తి వ్యక్తిలో చిగురింపచేసే జీవన మాధ్యమం యోగం… యోగం సృష్టిక్రమం..