ఆధునిక ప్రపంచ నిర్మాతలు –జీవితాలలో చీకటి వెలుగులు -149

 59-అత్యంత వివాదాస్పద బ్రిటిష్ ప్రధాని –సర్ విన్ స్టన్ చర్చిల్ -2

  క్లాసిక్స్ అంటే యెంత అయిస్టమో చర్చిల్ కు ఆటలన్నా అంతే..ఫుట్బాల్,క్రికెట్ మాచ్ లవైపు కన్నెత్తి అయినా చూసి ఎరగడు .ఖర్మకాలి చూసినా ఆటగాళ్లను నవ్వుతో పలకరించటం అనేది అతని నిఘంటువులోలేదు..అయితే ఫెన్సింగ్ పోటీలంటే అమితాసక్తి .17వ ఏటనే ఇందులో ప్రైజ్ కొట్టేశాడు .మరుసటి ఏడాది మనవాడి చదువు నిర్వాకం స్కూల్ కు ఎగనామం ,పంతుళ్ళ  కు పంగనామం బాగోతం చూసి,ఒక పాడుబడిన ఇంటిని బీర్ బాటిల్ లో గన్ పౌడర్ దట్టించి పేల్చి వేసే సంఘటనలో చావు తప్పి కన్ను లొట్టపోయినట్లు కొంచెం లో ప్రాణాపాయం నుండి తప్పించుకోవటం తెలిసి , తండ్రి కొడుక్కి ఈ చదువు అచ్చిరాదని గ్రహించి  ‘’ సాండ్  హర్స్ట్మి మిలిటరీ స్కూల్ లో చేర్పించాడు చర్చిల్ ను .కుర్రాడికి అక్కడికెళ్ళి చదవటం మోజుగా ఉంది .కాని అందులో ప్రవేశానికి చాలా తంటాలు పడాల్సి వచ్చింది .ఎంట్రన్స్ పరీక్షలో రెండు సార్లు డింకీ కొట్టాడు .మూడో సారి ఒక  స్పెషలిస్ట్  చెప్పినట్లు అన్నీ బట్టీ పట్టి ఎట్లాగో అట్లా ముక్కి గట్టేక్కాడు .మనవాడి అత్తిసరు మర్కులకంటే తక్కువ వచ్చిన మార్కులకుతండ్రి తన సామర్ధ్యాన్ని రుజువు చేసుకొన్న క్రాక్ రెజిమెంట్ లో చేర్చుకోకుండా రోత పుట్టించే ఆశ్విక దళం లో చేర్చుకొన్నారు .కాని ఈ కావల్రి లో సంపన్న కుటుంబ యువకులకు ,విద్యలో పెద్దగా రాణించని ,తెలివితేటలూ తక్కువగా ఉన్న వారి నే చేర్చుకొంటారు .ఇదీ ఒక అదృష్టమే అయింది .గుర్రపు స్వారినే నడకకంటే ఎక్కువగా ఇష్టపడే వాడు .

            సాండ్ హర్స్ట్ స్కూల్ చర్చిల్ జీవితాన్నిగోప్ప మలుపు తిప్పింది .అతని అల్లరి చిలిపితనం దు౦దుడుకు స్వభావాలకు కళ్ళెం వేసి అతన్ని ప్రయోజకుడిని చేసింది .యుద్ధరంగం గురించి నేర్చే విద్యకోసం అప్ప్లై చేశాడు .మాప్ లను తయారు చేయటం పరిశీలించటం ,యుద్ధ వ్యూహ ప్రతి వ్యూహాలు ,పరిపాలన ,సైనిక చట్టాలు అన్నీ నేర్చాడు .ప్రజా వ్యవహారాలనూ క్షుణ్ణంగా అభ్యసించాడు .చర్చిల్ మేనత్త  గారిసన్ కు కుడి భుజమైన లార్డ్ ట్వీడ్ మౌత్ ను పెళ్లి చేసు కోన్నది .హోం రూల్ గురించి డిన్నర్ టేబుల్ దగ్గర లిబరల్స్ మాట్లాడుకొనే మాటలు ,హౌస్ ఆఫ్ కామన్స్ లో కన్జర్వేటివ్ ల సంభాషణలు విని అర్ధం చేసుకొన్నాడు 19వయట స్కూల్ లో చివరి టేరంలో లండన్ లో మిసెస్ ఆర్మిస్టన్ చాంట్ ,ఆమె బృందం చేబట్టిన ప్రొహిబిషన్ ఉద్యమాన్ని వ్యతిరేకిస్తూ బ్రహ్మాండమైన ఉపన్యాసం ఇచ్చి  రాచాకీయ ఆరం గేట్రం చేశాడు . చర్చిల్ వాగ్ధాటికి మురిసిపోయి  ,నిరసనకారుల చేతుల్లోని  ‘’ప్లేకార్డ్ ‘’లను అనుచరులు చి౦చిపారేశారు .పాపం నిరసనకారులు నీరుకారి  జావగారి జారిపోయారు  .ఈ సంఘటన చర్చిల్ లో  నిగూధంగా దాగి ఉన్న శక్తిని బహిర్గతమ్ చేసింది. చర్చిల్ కు ఎస్ పలకటం సరిగ్గా వచ్చేదికాదు .కాని అతని ‘’ఐ మస్ట్ సే ‘’,’’ఐ  గ్లాడ్ టు సీ ‘’అనే మాటలు మంత్రాలై అతన్నిఆకాలం లో  ఒక గొప్ప వక్తగా మార్చేశాయి .       

    ఇరవై ఏళ్ళ ఈ రాగి జుట్టు భరోసా ,స్వీయ స్వాధీన   నవ్వు ముఖపు యువకుడు  సాండ్ హర్స్ట్ చదువుకు తగిన ప్రతిఫలంగా ‘’క్వీన్స్ కమిషన్ ‘’పొందాడు .ఈ గుర్తింపు చూసి ఆనందించే అదృష్టం తండ్రికి దక్కలేదు  .ఉన్న ఎస్టేట్ చాలా విశాల మైంది  .అమ్మి అప్పులు తీర్చేసరికి తలప్రాణం తోకకు వచ్చి ఈ కుర్ర కావల్రి ఆఫీసర్ కు రెండు వేళ్ళూ నోటిలోకి వెళ్ళటమే కష్టమై పోయింది . గుర్రం మాట దేవుడెరుగు .అయితే అనుకోకుండా సంవత్సరానికి అయిదువందల పౌండ్ ల భత్యాన్ని ప్రభుత్వం మంజూరు చేసింది ఇది గుడ్డిలో మెల్ల .తన తోటి ఆఫీసర్ల జీతం కంటే తక్కువే అయినా ఖర్చులు తక్కువే అవటం ఏడాదికి అయిదు నెలలు సెలవు లభించటం ఊరట కల్గించాయి .

   ఖాళీగా కూర్చోటం కత్తికి తుప్పపట్టకుండా చేయటం   అలవర్చుకొన్నాడు   .అన్నీ పరిశీలించేవాడు .యుద్ధం ఎక్కడ ఉందా అని వెతుక్కునేవాడు .అది క్యూబా లో కనిపించింది .అక్కడ గెరిల్లా యుద్ధాలు వీధి పోరాటాలు .అతని కోరిక తీరటానికా అన్నట్లు ‘డైలీ గ్రాఫిక్ ‘’అనే పత్రిక చర్చిల్ ను యుద్ధ విలేకరిగా క్యూబాకు పంపింది ,స్పానిష్ అధికారులు చర్చిల్ను అతనితో వచ్చిన హసార్ ను బ్రిటిష్ ప్రభుత్వ ప్రతినిధులుగా భావించి బాగా మర్యాద చేశారు .తాగినంత రం,కోరినన్ని చుట్టలు ,స్వారీకి గుర్రాలు ,వెనక ఎస్కార్ట్ ,సంప్రదాయ బాప్టిజం ఫైర్ తో స్వాగత సత్కారాలు చేశారు .కొద్దివారాలు అక్కడ గడపగానే దోమకాటు  వలన మలేరియా చిహ్నాలు కనిపించాయి .వెంటనే స్నేహితుడితో సహా ఇంగ్లాండ్ చేరేసరికి ఇద్దరికీ ఇండియాలో పని చేయటానికి ఆర్డర్లు సిద్ధంగా ఉన్నాయి .

  చర్చిల్ బెంగుళూరు లో తన రెజిమెంట్ టో దిగేసరికి అతని వయసు 22.పెద్దగా భారం లేని పనే .పెద్ద బంగాళా లో నివాసం .అతనితో పాటు ముగ్గురు ఆఫీసర్లు .ఉదయం పూట డ్రిల్లు .మధ్యాహ్నం అంతా పడి నిద్రపోవటం సాయంత్రం అయిదింటి దాకా .అప్పుడు పోలో ఆట .ఇలా లేజీ గా గడపటం ఇష్టం లేక ఇంగ్లాండ్ నుండి పుస్తకాలు పంపమని కోరాడు .ఇదివరకు సాహస గాదలంటే ఇష్టం గా ఉండేది .ఇప్పుడు ప్లేటో రాసిన రిపబ్లిక్ ,మెకాలే రాసిన హిస్టరీ ఆఫ్ ఇంగ్లాండ్ ,గిబ్బన్ రచన డిక్లైన్ అండ్ ఫాల్ ఆఫ్ రోమన్ ఎంపైర్ లు బాగా అభిరుచికలిగించాయి .ఇవేవో కాలక్షేపానికేకాని అతని శారీరక మానసిక శక్తులకు తగిన పని లేదనిపించి విసుగొచ్చింది .కాని మెకాలే ,గిబ్బన్ ల రచనలు అతను భావి మహా వక్త కావటానికి బాగా సహకరించాయి .

      సశేషం

  మీ-గబ్బిట దుర్గా ప్రసాద్ -24-5-16-ఉయ్యూరు