ప్రతి పాఠాన్ని విని గుర్తుపెట్టుకోవడం కష్టం. కాని పాఠం సారాంశాన్ని దృశ్యరూపంలో చూస్తూ వింటే.. గుర్తుపెట్టుకోవడం చాలా సులభం. రంగురంగుల బొమ్మలు, కదిలే చిత్రాలకు చక్కటి స్వరం తోడైతే పిల్లలు ఇష్టంగా తిలకిస్తారు. తక్కువ సమయంలోనే ఎక్కువ జ్ఞానాన్ని ఆర్జిస్తారు అంటున్నారు కంప్రింట్స్ నిర్వాహకులు జి.సత్యనారాయణ. ఒకటో తరగతి నుంచి ఇంటర్‌మీడియట్ వరకు తెలుగు, ఇంగ్లీషు పాఠ్యపుస్తకాలను యానిమేషన్ రూపంలో తీర్చిదిద్ది.. సీడీలుగా రూపొందించారాయన. ఈ సీడీలను ఈ మధ్యనే ఐటీ శాఖ మంత్రి పొన్నాల లక్ష్మయ్య ఆవిష్కరించారు..

అది కరీంనగర్‌లోని ఒక ప్రభుత్వ పాఠశాల. తొమ్మిదో తరగతి విద్యార్థులకు ‘ద్రవ్యం’ అనే పాఠం చెబుతున్నాడు టీచరు. ద్రవ్య పరిణామక్రమాన్ని వివరిస్తూ ఆయా రాజుల కాలంలో ఎలాంటి నాణేలు చలామణిలో ఉండేవి? వాటిని ఏ పేర్లతో పిలిచేవారు? ఇవన్నీ బోధించారు. వారం రోజుల తర్వాత ఆ అంశం మీద పిల్లలను ప్రశ్నలు అడిగితే పదిశాతం మంది కూడా జవాబు చెప్పలేకపోయారు. కారణం? గుర్తుపెట్టుకోలేకపోవడం. ఇదే పాఠం సీడీలో ఉందంటూ – పక్క స్కూలు టీచరు ఇస్తే తీసుకొచ్చి, క్లాస్‌రూం టీవీలో ప్లే చేశాడు ఆ టీచరు. నాణేలు, రాజుల చిత్రాలతో సహా అందులో స్పష్టంగా చూపించారు. పాఠం వింటున్నట్లుగా కాకుండా సినిమా చూస్తున్నట్లు ఆసక్తిగా తిలకించారు విద్యార్థులు. చూసినవన్నీ జ్ఞాపకం పెట్టుకుని ప్రశ్నలు అడగ్గానే చకచకా జవాబులు చెప్పారు. “టీచరు చెప్పే పాఠాలను మళ్లీ మళ్లీ వినేందుకు వెసులుబాటు ఉండదు. అదే పాఠాన్ని యానిమేషన్ రూపంలో అయితే టీవీలోనో, కంప్యూటర్‌లోనో ఎన్నిసార్లయినా చూడొచ్చు. కఠినమైన పాఠాలను సైతం సులభంగా అర్థం చేసుకోవచ్చు. మా సంస్థ తయారుచేసిన యానిమేషన్ పాఠాలను విద్యార్థులందరూ ఆసక్తికరంగా చూస్తున్నారు. ఉపాధ్యాయుల మీద ఒత్తిడీ తగ్గింది” అంటున్నారు కంప్రింట్స్ సంస్థ నిపుణులు.

పాఠాలన్నీ సీడీల్లో..
కొన్నేళ్ల కిందటే రకరకాల పాఠాలు, పిల్లల పాటలు, గేయాలు సీడీల రూపంలో మార్కెట్‌లోకి వచ్చాయి.
ఈ సంస్థ కూడా 20 ఏళ్ల నుంచి విద్యారంగంలో మల్టీమీడియా సీడీలను ఉత్పత్తి చేస్తోంది. అయితే ఒకటో తరగతి నుంచి ఇంటర్ వరకు తెలుగు, ఇంగ్లీషు మీడియం పాఠ్యపుస్తకాలు పూర్తిస్థాయిలో సీడీలుగా రావడం ఇదే తొలిసారి అని చెప్పారు వాళ్లు. “యానిమేషన్, గేమింగ్, మల్టీమీడియా ట్రెండ్ ఎంత పెరిగిందంటే.. నిత్య జీవితంలో ఇవొక భాగమయ్యాయి. ఎంత క్లిష్టమైన విషయాన్నయినా ఈ మీడియా ద్వారా సరళంగా చెప్పొచ్చు. అందులోనూ ఇప్పుడు ప్రతి విద్యార్థికీ కంప్యూటర్ల వాడకం తప్పనిసరైపోయిందని వాళ్ల అభిప్రాయం.
“అందుకే పాఠ్యాంశాలను దృశ«్యరూపంలో మార్చడానికి మల్టీమీడియాను ఎంచుకున్నాం. కొన్ని పాఠాలు ఒకసారి వింటే అర్థం కావు. ఉదాహరణకు పదోతరగతిలో ‘రక్తప్రసరణ వ్యవస్థ’ పాఠాన్నే తీసుకుందాం. ఈ పాఠాన్ని చెప్పాలంటే బ్లాక్‌బోర్డు మీద గుండె బొమ్మను వేసి రక్తప్రసరణ వ్యవస్థను వివరించినా.. పూర్తిగా అర్థం కాదు. అదే విజువల్‌గా చూపిస్తే ఇంకా ఎఫెక్టివ్‌గా పిల్లల మెదళ్లకు చేరుతుంది. మా సీడీ ఆ పనిచేస్తుంది..” అన్నారు సంస్థ ప్రతినిధులు. ఇప్పటి వరకు గణితం, సామాన్య, సాంఘిక, భౌతిక, జీవ శాస్త్రాలను యానిమేషన్ సీడీలుగా చేసినట్లు చెప్పారాయన. ఇవన్నీ రాష్ట్ర పాఠ్యప్రణాళికను అనుసరించే తయారయ్యాయి.

“పాఠ్య పుస్తకాన్ని సీడీగా తయారుచేయడం కత్తిమీదసాము. ఒక్కో పాఠం పది పేజీలు కూడా ఉంటుంది. అదంతా కుదించి దృశ్యరూపంలో పెట్టాలి. పైగా ఏదీ మిస్ అవ్వకూడదు. జీవశాస్త్రం, సామాన్యశాస్త్రం వంటి వాటిని చిత్రాల రూపంలో తెరకెక్కించవచ్చు. కాని గణిత, భౌతిక శాస్త్రాల విషయానికొచ్చేసరికి కష్టమవుతుంది. గణితంలో పూర్ణసంఖ్యలు, భిన్నాలు, దశాంశాలు, రేఖలు, కోణాలు తదితర పాఠాల్ని యానిమేషన్‌లో చెప్పినా పిల్లలకు బోర్ కొడుతుంది. అందుకని వారి ఆసక్తి సన్నగిల్లకుండా వర్ణరంజితంగా తీర్చిదిద్దాము” అన్నారు సంస్థలో పనిచేస్తున్న నిపుణులు. “ప్రతి పాఠం చివర ప్రశ్నలు, జవాబులు, క్విజ్‌లు, పజిల్స్ వంటివి ఇవ్వడం వల్ల విద్యార్థులు తమ పరిజ్ఞానాన్ని సొంతంగా పరీక్షించుకునే అవకాశం దొరికింది. ఈ పాఠాలన్నీ ఎవరికి ఎంత మాత్రం అర్థం అవుతున్నాయో అంచనా వేయవచ్చు” అని ఉపాధ్యాయులు కూడా సంతృప్తిని వ్యక్తం చేశారు.

టీవీలు, కంప్యూటర్లే టీచర్లు..
పాఠ్యపుస్తకాల్ని సీడీలుగా రూపొందించేందుకు ఏడువిభాగాల్లో పని జరిగింది. ఒక సబ్జెక్టు మొత్తాన్ని సీడీల్లో వినాలంటే ఆరుగంటలు పడుతుంది. “మొదట పాఠ్యపుస్తకంలోని పాఠాల్ని ఉపాధ్యాయులతో సంక్షిప్తంగా రాయించాము. వాటిని కంటెంట్ రైటర్స్ యానిమేషన్ చిత్రీకరణకు కావాల్సినట్లుగా మార్చుకున్నారు. యానిమేటర్లు, మీడియా ఎడిటర్లు వంటి వారంతా పనిచేశాకే పాఠ్యాంశం సీడీగా బయటికి వస్తుంది. దీన్ని మళ్లీ అనుభవజ్ఞులైన ఉపాధ్యాయులకు చూపించి.. చిన్న చిన్న సవరణలు చేశాక విద్యార్థులకు అందిస్తున్నాం” అని వివరించారు సత్యనారాయణ. ఇప్పటి వరకు రూపొందించిన అన్ని పాఠాల నిడివి కలిపితే 150 గంటలు. ఇంతవరకు లక్షకు పైగా సీడీలను ప్రభుత్వ, ప్రైవేటు పాఠశాలలు కొనుగోలు చేశాయని, ఒక్కో సబ్జెక్టు సీడీ ధర రూ.200 అని చెప్పారాయన. గ్రామీణ ప్రాంతాల్లోని ప్రభుత్వ పాఠశాలలకు మాత్రం ముప్పయి శాతం తక్కువ ధరకు అందిస్తున్నారు.
– మల్లెంపూటి ఆదినారాయణ

బాలకృష్ణుడికి మంగళ శాసనం