గీర్వాణకవుల కవితా గీర్వాణం -3

464 –అద్వైత గీత కర్త –మధురకవి ఉమాపతి పద్మనాభ శర్మ (1930-2017 )

తెలంగాణా రాష్ట్రం సిద్దిపేటలో శ్రీ ఉమాపతి పద్మనాభ శర్మ జన్మించారు .వీరిది పండిత వంశ౦ .పితృ ,పితామహులందరూ సంగీత సాహిత్యాలలో దిగ్దంతులే .తండ్రి నారాయణ శాస్త్రి పండితులేకాక ప్రతిభా వ్యుత్పన్నులు ,సంగీత కళా మర్మజ్ఞులు .   మేనమామ ,విద్యా గురువు శ్రీకొరిడే సీతారామ శర్మగారి ఆదేశం తో   దేవీ మానస పూజ ను ఒక సంవత్సర కాలం దీక్షగా పారాయణ చేసి ఆత్మ గతం చేసుకొన్నారు .దీనితో వారిలో మధుర కవితా ధార పెల్లుబికింది .’’బ్రహ్మోమాపతి పద్మనాభ నుత !శు౦భత్పద్మసింహాసనా ‘’మకుటం తో అమ్మవారిని  స్తుతించిన నపద్యాలలో త్రిమూర్త్యాత్మక రూపినణియైన అమ్మవారే కాకుండా కవి గారూ దర్శన మిస్తారు . తొలితరం తెలంగాణా కధకులలో శర్మగారు అగ్రేసరులు .1960 కాలం లో వారి కధలు ,వ్యాసాలూ ,విమర్శలు ,గేయాలు భారతి ,సాధన ,కృష్ణాపత్రిక లలో ప్రచురితాలు .’’చతురంగం ‘’,’’నవ కథా విపంచి ‘’వీరి కథా సంపుటాలు .’’చివరి ఘడియలు ‘’అముద్రితం .

శర్మగారు వేణువు ,వయోలిన్ ,హార్మోనియం వాయిద్యాలవాదనలో అసమాన ప్రజ్ఞావంతులు .వీరి గాత్రం సుస్వర బద్ధమై వీనుల విందు చేసేది .భువనవిజయ౦ లో రామరాజ భూషణుడుగా జీవించేవారు .వీరి పద్య కవితా గానం మై మరపించేది .కాళిదాస కవిత్వాన్ని ఎంతగా ఆరాదధించేవారో ఓ హెన్రీ కథలనూ అంతగా ఆస్వాదించేవారు .తెలంగాణా ప్రాంతీయ దేశ్య పదాలు ,ప్రాచీనకవుల ప్రయోగాలపై శర్మగారి వ్యాసాలు ఆణిముత్యాలు ..ప్రముఖ పరిశోధకులు నిడదవోలు వెంకటరావు మల్లంపల్లి సోమ శేఖర శర్మగార్ల ప్రశంసలు పొందాయి .దివాకర్ల వెంకటావధాని ,పుల్లెల రామ చంద్రుడు ,దోర్బల విశ్వనాధ శర్మ వంటి సాహితీ ప్రముఖులు శర్మగారి పాండితీ గరిమకు నీరాజనాలు పలికారు .’’అజో-విభో ‘’పురస్కారం సద్గురు శివానంద మూర్తి గారి అమృత హస్తాలనుండి అందుకొన్న పుణ్య మూర్తి .భావకవిత్వోద్యమ ప్రభావం తో ‘’మధురకవి ‘’గా గుర్తింపు పొందారు .ఆయన అధ్యయన శీలత అచ్చెరువు గొల్పుతుంది .ఉద్యోగం చేస్తూ సాహిత్య కృషి కొనసాగిస్తూ ,వేదాంత వాజ్మయ మధనమూ చేశారు .దీనిఫలితంగా  పదకొండు వ్యాసాల ‘’హంసనాదం ‘వెలువడింది .అద్వైత,శివాద్వైత విశిష్టాద్వైత సిద్ధాంతాలను సహేతుకంగా తర్కించి ‘’శివా ద్వైత దర్శనం ‘’రచించి  దిగ్భ్రాంతి కలిగించారు  .శ్రీ శంకర భగవత్పాదుల ‘’శ్రీ దేవీ మానసిక పూజ ‘’ను శంకరుల అంతర్ దృష్టికి తగినట్లు ఆంధ్రానువాదం చేశారు .

అవసరమైతేనే మాట్లాడే నియమమున్న శర్మగారి మౌన అంతరంగం నుండి 108  శ్లోకాల ‘’అద్వైత గీత ‘’జాలువారి యోగ సాధకులకు దిశా నిర్దేశం గా భాసించింది .తామే దీనికి సులభ వ్యాఖ్య రాయగా ‘’దర్శనం ‘’మాసపత్రిక లో ప్రచురింపబడింది .సహాధ్యాయులైన శ్రీ అప్పాల వాసు దేవ శర్మ గారితో కలిసి ‘’దేవీ సప్త శతి ‘’శ్లోకాలను తెలుగులో లోతైన తాత్విక భావన తో రాశారు .’’తొగుట –రాంపురం ‘లోని శ్రీ గురు మదనానంద సరస్వతీ పీఠాధిపుల ఆజ్ఞమేరకు సంస్కృత భాగవత శ్రీధరీయ వ్యాఖ్యను ద్వితీయ ,దశమ స్కంధాలకు తెలుగు సేత చేశారు .జ్యోతిశ్శాస్త్రం లోనూ శర్మగారు అఖండులే.శృంగేరి జగద్గురువులు శ్రీ శ్రీ భారతీ తీర్ధ స్వాములు తెలంగాణా గజవల్లి లో పర్యటించినపుడు సన్మానపత్రం రచించి శర్మగారు శ్రీవారి అభినందన పొందారు .మనసులాగానే స్వచ్చ శ్వేత వస్త్ర ధారణతో ,ఆలోచనా ముద్రతో శర్మగారు కనిపించేవారు .

శర్మగారి మరణానికి సరిగ్గా నెల రోజులక్రితం తెలంగాణా ప్రభుత్వ తృతీయ ఆవిష్కరణ మహోత్సవం నాడు ముఖ్యమంత్రి శ్రీ చంద్ర శేఖర రావు గారి చేతుల మీదుగా పండిత పురస్కారం అందుకొన్నారు .ప్రచారార్భాటం ఇష్టపడని శర్మగారు ఈ కాలపు కవి యోగి పుంగవులు .

పుంభావ సరస్వతులైన శ్రీ ఉమాపతి పద్మనాభ శర్మగారు 2017 జులై 4 న ఉమాపతి సాన్నిధ్యం చేరారు .

మీ-గబ్బిట దుర్గా ప్రసాద్ -14-11-17 –ఉయ్యూరు

1-సెల్ ఫోన్ లకు ఆధార్ కార్డు తో లింక్ చేయమని మెసేజి లపై మెసేజ్ లు వస్తున్నాయి . సీనియర్లు లింక్ చేయటానికి సెల్ డీలర్స్ దగ్గరకు వెడితే వాళ్ళ దగ్గరున్న వ్రేలి ముద్రల మెషీన్  10 వ్రేళ్ళతో ఏ వ్రేలి ముద్రనూ యాక్సెప్ట్ చేయటం లేదు .అందుకని సుమారు 70 ఏళ్ళు దాటిన వారికి లింక్ చేయించుకొననే  అవకాశం లేకుండా పోతోంది .దీనిపై ప్రభుత్వాలు స్పందించి మరేదైనా మార్గం త్వరలో ఆలోచించి అమలు చేయాలని కోరిక .

13-11-17 సోమవారం రాత్రి మా ఇంట్లో మా అన్నయ్యగారబ్బాయి రాం బాబు, కోడలు జయ, కొడుకు కళ్యాణ్, కోడలు , వియ్యంకుడు, వియ్యపురాలు, కళ్యాణ్ బావమరది ,భార్య

https://photos.google.com/share/AF1QipPQdDmWkLA1WSZrPdRH_U-pRoP4rkAvumNw0YWsPENsQ-fKRnAis7mFEgGx4txR2w?key=ZjE2bjhoQy10T2NTaF8tTXU4MzdpTnlIaUdYWTJ3

5-11-17 ఆదివారం ఉదయం కర్నాటక ప్రసిద్ధ దత్తాత్రేయ క్షేత్రం గాణగాపురంలో మేమిద్దరం మాకోదాలు వియ్యపురాలు ఫోటోలు-పార్ట్-2

4-11-17 శనివారంకార్తీక పౌర్ణమి సందర్భంగా హైదరాబాద్ -మల్లాపూర్ లో మా పెద్దబ్బాయి శాస్త్రి ఇంట్లో తెల్లవారుఝామున3-30 నుండిఉదయం 6 వరకు రుద్రాభిషేకం తరువాత ఉదయం 6 నుండి 8 వరకు

గీర్వాణ కవుల కవితా గీర్వాణం –

463-సత్య నారాయణ పాంచాలీ కర్త –భరత చంద్ర రే(1712 -1760)

భరత చంద్ర రే గుణకార్ 18 వ శతాబ్ది ప్రముఖ సంస్కృత బెంగాలీకవి .రాజాస్థానకవి కూడా .అన్నపూర్ణ మంగళ కావ్యం తో సుప్రసిద్ధుడయ్యాడు .భరత చంద్ర గా సుపరిచితుడు .నాడియా మహా రాజు కృష్ణ చంద్ర ‘’గుణకార్’’బిరుదు ప్రదానం చేసి సత్కరించాడు .అప్పటి నుంచి ‘’రే గుణకార్ భరత చంద్ర’’ అని అందరూ పిలువ సాగారు .

నరేంద్ర నారాయణ రే,భవానీ దంపతులకు 1712 లోబెంగాల్ లోని ‘’పెన్రో భూర్షట్ ‘’గ్రామం లో జన్మించాడు . ఈ గ్రామం ఇప్పుడు హౌరా జిల్లాలో  ఆమ్టా కు దగ్గరలో ఉంది. నలుగురు సంతానం లో చివరివాడు .తండ్రి –వర్ధమాన రాజు కీర్తి చంద్ర రే తో ఆస్తి తగాదా పడి రాజమాత బిష్ణు కుమారి ని అవమానించాడు .దీనితో రాజు కినిసి వీళ్ళ భూములన్నీ స్వాధీనం చేసుకొన్నాడు .చేతిలో చిల్లిగవ్వ కూడా లేని తండ్రి నారాయణ రే ఊరు వదిలి పారిపోయాడు .కొడుకు భరత చంద్ర ను మాతా మహుల ఇంట్లో నయాపారాలో ఉంచారు .అక్కడే ఉంటూ దగ్గర గ్రామం తాజ్ పూర్ లో సంస్కృతం అభ్యసించాడు .14 ఏళ్ళకే సంస్కృతం లో అద్వితీయ పాండిత్యాన్ని సాధించి తలమానికమై భాసించాడు .ప్రక్కనే ఉన్న  శారద గ్రామానికి చెందిన నరోత్తమ ఆచార్య కుమార్తెను వివాహం చేసుకొన్నాడు .

తిరిగి స్వగ్రామానికి చేరిన తమ్ముడు భరత చంద్ర సంస్కృత పండితుడైనందున ఆ భాష కూడు గుడ్డ పెట్టదని  ఈసడించి అన్నలు అవహేళన చేశారు .అవమానం పొందిన భరతచంద్ర స్వగ్రామం వదిలేసి హుగ్లీ జిల్లాలోని బాష్ బెరియా లోని దేబానంద పుర కు వెళ్ళాడు .అక్కడ రామ చంద్ర మున్షి ఇంట్లో ఉంటూ పర్షియన్ భాష నేర్చి పట్టు సాధించి మాస్టర్ అనిపించుకొన్నాడు .పిత్రార్జిత సంపదను కాపాడుకోవటానికి మోఖ్తార్  అయ్యాడు .అన్నలతో ఆస్తితగాదాలు, వారిని సంప్రదించకుండా వివాహమాడటం తో మళ్ళీ ఇల్లు వదిలి వెళ్లి పోవాల్సి వచ్చింది .ఎక్కడా నిలువ నీడ లేక దేశాటనం చేస్తూ కొంతకాలం మహారాష్ట్ర పాలనలో ఉన్న ఒరిస్సాలోని కటక్ లో ఉన్నాడు .మళ్ళీ బెంగాల్ వెళ్ళిపోయాడు .

చందర్ మగూర్ లోని  ఇంద్ర నారాయణ చౌదరి అనే ఫ్రెంచ్ ప్రభుత్వ దివాన్ ఇంట్లో అద్దె కున్నాడు భరతచంద్ర .  చంద్ర లోని విద్యా పటిమను గుర్తించి,న దివాన్  కృష్ణ నగర్ మహారాజు కృష్ణ చంద్ర ఆస్థాన కవిగా నియమించే ఏర్పాటు చేశాడు . మహారాజు కవిగారి విద్వత్తు కు తగిన ‘’రే గుణకార్ ‘’బిరుదునిచ్చి గౌరవించి సన్మానించటమే కాక మూలజోర్ లో అనేక వందల ఎకరాల భూమిని ప్రదానం చేశాడు .బెంగాలీ భాష లో ‘’ప్రధమ ప్రజాకవి’’ గా భరత చంద్ర గుర్తింపు పొందాడు .బెంగాలీ భాషను తన కవిత్వం, రచనలతో భరత చంద్ర సుసంపన్నం చేసి శాశ్వత కీర్తి తనకూ భాషకూ సాధించి చిర కీర్తి పొందాడు .

భరతచంద్ర రచనలలో ముఖ్యమైనది 1752 లోరచించిన ‘’అన్నదా మంగళ్’’అనే అన్నపూర్ణ మంగళ్ .ఇది మూడుభాగాలు .మొదటి భాగం లో ‘’అన్నదా మంగళ్’’అనే అన్నపూర్ణా దేవి స్తోత్రం ఉంది.రెండవ భాగం ‘’కాళికా మంగళ్’’ .ఇందులో విద్యా , సుందరుల కథ ఉంది. మూడవది అయిన చివరి భాగం లో మొదటి మాన్సింగ్ ,అన్నపూర్ణ మంగళ్ అనే భవానంద మజుందార్ ల చరిత్ర ఉన్నది . భానుదత్తుడు మైధిలీ భాషలో రచించిన ‘’రసమంజరి ‘’ని బెంగాలీ భాషలోకి భరతచంద్ర అనువదించాడు . భరతచంద్ర సంస్కృత బెంగాలీ  భాషా పటిమకు నిదర్శనంగా నిలిచిన రచన ‘’నాగాస్టకం ‘’. సంస్కృత ఛందస్సు పై తన సాధికారతను రుజువు చేసిన రచన ఇది .ఇదికాక సంస్కృతం లో గంగాస్టకం రాశాడు . చండీ నాటకం ,తో పాటు మరొక అసంపూర్ణరచన ‘’సత్యనారాయణ పాంచాలీ కూడా రాశాడు .

మధ్యయుగ బెంగాలీ గీతాల నుంచి ఆధునిక బెంగాలీ గీతాలవరకు అనేక వందల పాటలు రాసి భాషా సౌందర్యం తో తీర్చి దిద్దిన ప్రజాకవి భరత చంద్ర . కేవలం దేవీ దేవతలకు మాత్రమే పరిమితమైన ‘’మంగళ గానం ‘’ను ప్రజా పరం కూడా చేసి భాషకు, సంగీతానికి సొగసులు దిద్దాడు . స్వేచ్ఛగా మంగళగానం చేసే వీలుకల్పించాడు .రాధాకృష్ణుల శృంగారాన్ని,ప్రణయాన్నీ ‘’పదావళి కీర్తనలు ‘’గా రచించాడు . దీనిద్వారా రాం ప్రసాద్ సేన్ ,నిధుబాబు అనబడే రాం నిధి గుప్తాలకు మార్గ  దర్శి అయ్యాడు .

భరతచంద్ర రచన ‘’అన్నదా మంగళ్’’ను’’ గేరాసీ లెబ్ దేవ్’’ రష్యన్ భాషలోకి అనువాదం చేశాడు .భరతచంద్ర సంగీతం సమకూర్చిన వాటినీ కలకత్తా లో నాటకాలకు వాడుకొన్నాడు .48 ఏళ్ళు మాత్రమే జీవించినా, శాశ్వత యశస్సు సాధించిన గుణకార్ భరతచంద్ర ఈ నాటి 24 పరగణాలలో ఉన్న ములజోర్ లో 1760లో మరణించాడు .

సశేషం

మీ-గబ్బిట దుర్గా ప్రసాద్ -3-11-17- కాంప్-మల్లాపూర్ –హైదరాబాద్

—

గీర్వాణకవుల కవితా గీర్వాణం -3

462 – బాణ భట్ట రచనలో ప్రేక్ష్యా విలాస పరిశోధకుడు –రాంజీ ఠాకూర్ (1926 )

నేపాల్ లో ఫుల్గమ ప్రాంతం లో రాంజీ ఠాకూర్ జన్మించాడు .వైష్ణవ కవి గోవింద ఠాకూర్ ,ప్రసిద్ధాకవి ,సవతి సోదరుడు రుచికర్ ఈ కవి పూర్వీకులు .లక్ష్మీ కాంత్ ఝా ,వి ఆర్ శర్మ ,పండిత్ శోభాకాంత్ జయదేవ్ ఝా వంటి సుప్రసిద్ధ సంస్కృత విద్వాంస గురువులవద్ద విద్య నేర్చాడు . రాం ప్రతాప్ సంస్కృత కాలేజి ,మహారాజ్ లక్ష్మీ సింగ్ కాలేజీ లలో సంస్కృత లెక్చరర్ గా  చేశాడు .పాట్నాలోని బీహార్ సంస్కృత సమితి  నుండి1956 లో ఆచార్య డిగ్రీ,  1960 లో ఎం ఏ లో గోల్డ్ మెడల్ ,1981 లో దర్భంగా లలిత్ నారాయణ్ మిధిలా యూని వర్సిటి నుండి ‘’బాణ భట్టస్య రచనస్య ప్రేక్షా విలాసః ‘’పై పరిశోధన చేసి పి.హెచ్ .డి. అందుకొన్నాడు . దర్భంగా లోని లలిత్ నారాయణ్ మిధిలా యూని వర్సిటి సంస్కృత ఆచార్యుడుగా రిటైర్ అయ్యాడు.

రాంజీ ఠాకూర్ సంస్కృతం లో కావ్యం, ఖండకావ్యాలు,ముక్తకావ్యాలు రచించాడు .అతని ప్రసిద్ధ కావ్యం-గీతామాధురి.ఖండకావ్యాలు –వైదేహీ పాదాంకం ,రాధా విరహం ,ప్రేం రహస్యం ,బాణేశ్వరి చరితం ,గోవింద చరితామృతం ,మాతృ స్తన్యం .ముక్తకావ్యాలు-ఆర్య విలాసః ,లఘుపద్య ప్రబంధ త్రయికావ్య కోశః . ఇటీవల ప్రచురించినవి -పర్యాయ చరితం కావ్యం ,అమృత మ౦ధనమ్

1912 లోరాంజీ ఠాకూర్  లఘు పద్య మంజరి కి కేంద్ర సాహిత్యఅకాడేమీ పురస్కారం అందుకొన్నాడు .

సశేషం

మీ -గబ్బిట దుర్గాప్రసాద్ – 3-11-17- కాంప్-మల్లాపూర్ –హైదరాబాద్

గీర్వాణకవుల కవితా గీర్వాణం -3

461-పిప్పలాద సంహిత పరిశోధకుడు –ప్రొ .దుర్గామోహన్ భట్టాచార్య (1899-1965 )

13-10-18 99 న ఢాకా లో  దుర్గామోహన భట్టాచార్య జన్మించాడు .1900 లో కుటుంబం ముర్షీదాబాద్ జిల్లా సహనగర్ లాల్ బాఘ్ కు తరలి వెళ్ళింది .నిరుపేద  కుటుంబం అయిన౦దున పిల్లలను ఆంగ్ల మాధ్యమ పాఠశాలకుపంపించలేక పోయారు .వీధిబడిలో బెంగాలీ సంస్కృతాలు బెంగాలీ భాషా మాధ్యమం లో  మాత్రమే నేర్చాడు .దుర్గామోహన్ బుద్ధి తీక్ష్ణత చాలా ఎక్కువకనుక 1915 నాటికే అంటే 16 వ ఏటనే అనేక సంస్కృత ఉపాధి పరీక్షలురాసి అగ్రభాగాన నిలిచాడు .కావ్య ,సాంఖ్య ,పురాణాలలో అత్యుత్తమ డిగ్రీ పొంది ‘’భాగవత రత్న ‘’బిరుదు అందుకొన్నాడు .

విధవరాలైన తల్లి ,తమ్ముడితో కలకత్తా లో ఉన్న మాతామహుల  ఇంటికి చేరాడు.  మేనల్లుడి ఆంగ్ల భాషాధ్యయనం కోరిక తీర్చటానికి పెద్ద మేనమామ అతనిని ప్రసిద్ధ కలకత్తా టౌన్ హైస్కూల్ హెడ్మాస్టర్ సురేష్ చంద్ర కుందు వద్దకు తీసుకు వెళ్ళాడు  .అప్పటికే 16 ఏళ్ళు రావటం వలన 10 ఏళ్ళ కోర్సును కేవలం ఒక్క ఏడాది లో చదవాల్సి వచ్చింది .శ్రమకోర్చి ఇష్టంగా కస్టపడి చదివి 1917 లో యూని వర్సిటి ఎంట్రన్స్ పరీక్ష రాసి ప్రధమతరగతిలో ఉత్తీర్ణుడై అందరికీ ఆశ్చర్యం కలిగింఛి అసాధ్యాన్ని సుసాధ్యం చేసి చూపించాడు .  .పట్టుదల ఓర్పు ఉంటె సాధించలేనిది లేదని నిరూపించాడు .1919 లో విద్యాసాగర్ కాలేజి నుంచి ఇంటర్ పాసై ,1921 లో స్కాటిష్ చర్చ్ కాలేజి నుండి సంస్కృతం లో బి ఏ ఆనర్స్ డిగ్రీని పొందాడు .1923 లో కలకత్తా యూని వర్సిటీ నుంచి సంస్కృత ఎం.  ఏ . డిగ్రీ తీసుకొన్నాడు .

దుర్గా మోహన్ తన దృష్టిని విద్యారంగం పై నిలిపాడు .హౌరా లో నరసింహ దత్ కాలేజీ సంస్కృత ప్రొఫెసర్ గా చేరి ,తర్వాత స్కాటిష్ చర్చ్ సంస్కృత ప్రొఫెసర్ అయి 30 వ ఏటనే హెడ్ అయ్యాడు .1952లో వెస్ట్ బెంగాల్ సీనియర్ ఎడ్యుకేషనల్ సర్వీస్ లో సంస్కృత కళాశాల పోస్ట్ గ్రాడ్యుయేట్ ట్రెయినింగ్ అండ్ రిసెర్చ్ డిపార్ట్ మెంట్ లో ప్రొఫెసర్ ఆఫ్ వేదిక్ లాంగ్వేజ్ లిటరేచర్ అండ్ కల్చర్ గా నియమింపబడ్డాడు .అర్హతను బట్టి ఉద్యోగాలు వెతుక్కొంటూ వచ్చి నిలిచాయి .చనిపోయేదాకా ఈ పదవిలోనే ఉన్నాడు .భట్టాచార్య  సమర్ధత ను  గుర్తించి ఏషియాటిక్ సొసైటీ ఆఫ్ బెంగాల్ ,ఏషియాటిక్ సొసైటీ ఆఫ్ బాంబే ,భండార్కర్ ఓరియెంటల్ రిసెర్చ్ ఇన్ స్టి ట్యూట్ వంటి అగ్ర శ్రేణి సంస్థలు ఆహ్వానించి వేదం మొదలైన విషయాలపై ప్రసంగాలను ఏర్పాటు చేసి గౌరవించాయి .సంస్కృతం ,వేద వాగ్మయం లో ఆయన కృషికి ఈ సంస్థలు స్వర్ణ పతకాలను అందజేసి సత్కరించాయి.

అందరూ అనుకొంటున్నట్లుభారత దేశం లో  అధర్వ వేదం కనుమరుగు కాలేదని అనేక పరిశోధనలవలన  విషయ సేకరణ వలన నిర్ధారించాడు .దీనికి తగిన సాక్షాధారాల సేకరణ కోసం దేశం లోని అనేక ప్రాంతాలను సందర్శించాడు . చనిపోవటానికి కొన్నేళ్ళ కిందటనే ఒరిస్సాలోని’’ గుహిపాల్’’ గ్రామం లో అధర్వ వేదాధ్యయనం నిరంతరంగా కొనసాగుతోందని ప్రత్యక్షంగా చూసి సంతృప్తి చెందాడు . గుహిపాల్ లోనే అధర్వ వేదం లోని తొమ్మిది సంహితలలోముఖ్యమైన ‘’పిప్పలాద సంహిత ‘’ఒరియా భాష లోఅనేక  వ్రాత ప్రతులలో  కనిపించింది .దుర్గామోహన  భట్టాచార్య  ఆనందానికి అవధులు లేకపోయింది  . అన్వేషణ ఫలించి అధర్వ వేదం అంతరించి పోలేదని లోకానికి సాక్షాధారాలతో నిరూపించి ఒక రకంగా అధర్వ వేద పునః ప్రతిష్ట చేసి దాని ప్రతిష్టను కాపాడి ఉనికిని చాటాడు .ఈ పరిశోధన విశ్వ వ్యాప్తం గా అందరి దృష్టినీ ఆకర్షించి భట్టా చార్యను ‘’అధర్వ వేదోద్ధారకుడు ‘’గా సన్మానించారు .

పిప్పలాద సంహితపై అనేక సంవత్సరాలు పరిశోధించి ,దాని ప్రచురణకు పూనుకొని ప్రపంచ వ్యాప్త గీర్వాణ విద్యా వేత్తల ప్రశంసలు పొందాడు .దురదృష్ట వశాత్తు కేన్సర్ వ్యాధి సోకి దుర్గా మోహన భట్టాచార్య 12-11-1965 న 66 వ ఏట పరమపదించాడు .మధ్యలో ఆగిపోయిన ఈ పనిని కుమారుడు దీపక్ భట్టాచార్య పూర్తిచేసి మొదటి 18 కాండల గ్రంధాన్నితయారు చేయగా కలకత్తా ఏషియాటిక్ సొసైటీ  మూడు భాగాలుగా1997 ,2008 ,2011 లో   ప్రచురించి లోకానికి అందజేసింది . భట్టాచార్య భార్య భవానీదేవి 1992 లో మరణించింది  .ఆ దంపతులకు అయిదుగురు కుమారులు నలుగురు కుమార్తెలు .

సశేషం

మీ-గబ్బిట దుర్గాప్రసాద్ -3-11-17- కాంప్ –మల్లాపూర్ –హైదరాబాద్

—

ప్రపంచ రెండవ మహిళా రాయబారి – అలక్సాండ్రా మైఖలోవానా డోమంటో విచ్ – గబ్బిట దుర్గా ప్రసాద్

 02/11/2017 గబ్బిట దుర్గాప్రసాద్

శ్రీ శంకరుల శివానంద లహరి ఆంతర్యం -12(చివరి భాగం )

శివానందలహరి లో అద్వైత స్థితి

‘’కిం బ్రూమః తవ సాహసం పశుపతే కస్యాస్తి శంభో –‘’శ్లోకం లో శివుని అద్వైత స్థితి ని వర్ణించారు శంకరాచార్య .మహా ప్రళయం లో కూడా పరమేశ్వరుడు ఆనంద లహరిలో తేలియాడుతూ,నిశ్చలంగా  ఉంటాడు .ఇదే అద్వైత స్థితి .ఇ౦దులో ఆన౦ద లహరి ఒక గొప్ప అనుభవ స్థితి .

‘’కిం బ్రూమః తవ సాహసం పశుపతే కస్యాస్తి శంభో ,భవ –ద్ధైర్యం చేద్రుశ మాత్మన స్థితిరియం చాన్యైః కథం లభ్యతే

భ్రశ్య ద్దేవ గణం త్రసన్ముని గణం నశ్య త్ప్రపంచం లయం –పశ్యన్ నిర్భయ ఏక ఏవ విహరత్యానంద సాంద్రో భావాన్ ‘’

శంభో పశుపతీ !నీ ధైర్యానికి జోహార్లు .నీ సాహసానికి జోహార్లు .నీ అచంచల ఆత్మ స్థితి బహు ప్రశంశ  నీయం. ప్రళయ కాలం లో దేవతలు కూడా స్థాన భ్రంశం చెందుతున్నారు .భయం తో వణికి పోతుంటారు .నీ కళ్ళ యెదుటనే ప్రపంచం నశించి పోతోంది .ఇదంతా చూస్తూ నువ్వు మాత్రం నిశ్చలంగా  ఆనంద సముద్ర లహరి లో హాయిగా తేలియాడుతూ ఉంటావు .అని అద్వైతానందాను భూతిని ఆచార్య శంకరులు అద్భుతంగా ఆవిష్కరించారు .

అలాగే ‘’అంకోలం నిజ బీజ సంతతి –‘’శ్లోకం లోనూ అద్వైత సిద్ధాంత ప్రదర్శన చేసిన సంగతి తెలుసుకొన్నాం .నదులు  సముద్రం లో కలిసి తమ నామ రూపాలు అస్తిత్వాన్ని కోల్పోయి సముద్రమే నన్న భావం గా కలిసిపోతాయి  .ఇదే అద్వైత స్థితి లో ఆంతర్యం .

ఈశ్వరుడు మనలోనే ఉంటె  ఈశ్వర ప్రార్ధన నిరంతరం చేస్తుంటే జ్ఞాన ప్రాప్తి జరిగి ,అరిషడ్వర్గాలు నశించి అద్వైత సిద్ధి లభిస్తుంది అని ఇదివరకటి శ్లోకాలలో తెలుసుకొన్నాం .  ఇలాంటి శ్లోకాలు ఎన్ని చెప్పుకొన్నా సంతృప్తి ఉండదు . నిత్య సాధనతో పరమేశ్వర చిత్త లగ్నమానసులమైతే ఆచార్య శంకరులు ప్రవచించిన శివానంద లహరి అనే అద్వైత సిద్ధి లభిస్తుందని గ్రహించాలని మనవి చేస్తూ ‘’శంకరుల శివానందలహరి ఆంతర్యం ‘’ధారావాహిక కు  ఇంతటితో సమాప్తి పలుకు తున్నాను .

మీ-గబ్బిట దుర్గాప్రసాద్ -1-11-17 –కాంప్-మల్లాపూర్ –హైదరాబాద్  .

శ్రీసత్య నారాయణ స్వామి వ్రతం

— 4- 11- 17 శనివారం ఉదయం 7 గంటలకు మల్లాపూర్ లో మా పెద్దబ్బాయి శాస్త్రి వాళ్ళ ఇంట్లో కార్తీక పౌర్ణమి సందర్భంగా రుద్రాభిషేకం ,అనంతరం శ్రీ సత్యనారాయణ స్వామి వ్రతం చేసుకొంటున్నాము . మీరందరూ తప్పక వచ్చి రెండు కార్యక్రమాలలో పాల్గొనవలసినదిగా కోరుతున్నాము

వినయం తో విన్నపం

— రిసెర్చ్ కృషి లాంటి ఈ బృహద్గ్రంథం  ‘’ ఆధునిక ప్రపంచ నిర్మాతలు -జీవితాలలో చీకటి వెలుగులు ”ప్రచురణలోనాకు,సరసభారతికి,,ప్రాయోజకులకు ,అంకితంపొందుతున్నవారికీ ఎవరికీ ప్రతిఫలాపేక్ష ,వ్యాపార దృష్టి లేదని ప్రపంచ పురోగతికి మార్గ దర్శకులైన మహనీయుల జీవిత విశేషాలు సాధించిన ఘనవిజయాలను  ,తెలియని వారికీ ,ముఖ్యంగా నేటి యువతకు ,అభిరుచి ఉన్న ఆసక్తిగల పాఠకుల దృష్టికి తెచ్చి,ఇంతటి సమాచారాన్ని  అందుబాటులో ఉంచటమే మా  ప్రధాన లక్ష్యమని   మనస్పూర్తిగా తెలియ బరుస్తున్నాను .

గబ్బిట దుర్గా ప్రసాద్ – .1-11–17

ఎందరో మహానుభావులు

ఆధునిక ప్రపంచ నిర్మాతలు -జీవితాలలో చీకటి వెలుగులు అనే ఈ గ్రంధానికి  ఆధరాభిమానాలతో ముందుమాటలు రచించిన డా సవరం వెంకటేశ్వరరావు గారికి  -హిస్టరీ హెడ్ -హిందూ కాలేజీ -మచిలీపట్నం ,అభిలషణీయమైన ఆకర్షణీయ అర్ధవంతమైన ముఖ చిత్రాలను డిజైన్ చేసిన శ్రీ కళాసాగర్ గారికి ,డిటిపి చేసి సరసభారతి తరఫున అందంగా  ముద్రి0పజేసి ,అందజేసిన ఆంద్ర ప్రదేశ్ రచయితల సంఘం  కార్యదర్శి ,రమ్య భారతి సంపాదకులు ,సరసభారతి ఆత్మీయులు శ్రీ చలపాక ప్రకాష్ గారికీ ,  కీ శే డా శ్రీ పరుచూరి రామకృష్ణయ్య గారికి అంకితమిప్పించి  సార్ధకత కల్పించి ,ప్రాయోజకులుగా సరసభారతి తరఫున గ్రంథ ముద్రణకు తోడ్పడిన ఆత్మీయులు శ్రీ మైనేని గోపాలకృష్ణ శ్రీమతి సత్యవతి (అమెరికా )దంపతులకు , నాతోపాటు అడుగులేస్తూ సహకరిస్తున్న సరసభారతి కార్యవర్గానికి కృతజ్ఞతలు . నా రచనలకు ప్రోత్సాహమిస్తున్న నా అర్ధాంగి శ్రీమతి ప్రభావతికి ,నా కుటుంబ సభ్యులకు అభినందనలు.                                                                                   గబ్బిట దుర్గాప్రసాద్ –

వదాన్యులకు వందనాలు

ఉయ్యూరు శ్రీ సువర్చలాంజ నేయస్వామి వారల సేవలకు భక్తితోను , ,సరసభారతి కార్యక్రమాలకు ,గ్రంథ ముద్రణలకు ఆదరాభిమానాలతోనూ  విరాళాలు అంద  జేసిన వదాన్యులైన దాతలకు కృతజ్ఞతలు -గబ్బిట దుర్గాప్రసాద్

1-శ్రీ వేలూరి పవన్ ,శ్రీమతి రాధ దంపతులు -అమెరికా     రూ 15,000

2-శ్రీ వేలూరి వివేకానంద్ ,శ్రీమతి దుర్గ దంపతులు -హైదరాబాద్ -13,116

3-శ్రీ కోమలి సాంబావదాని శ్రీమతి విజయలక్ష్మి దంపతులు -అమెరికా –10,000

4-శ్రీ అడుసుమిల్లి రాంకీ ,శ్రీమతి ఉష దంపతులు -అమెరికా                  9,000

5-చి గబ్బిట సంకల్ప్ –అమెరికా                                                     7,500

6-శ్రీ గౌడ రఘు శ్రీమతి సురేఖ దంపతులు -అమెరికా                            7,000

7 -శ్రీ మైనేని గోపాలకృష్ణ ,శ్రీమతి సత్యవతి దంపతులు -అమెరికా              7,000

8-శ్రీ వీటూరి రామ కృష్ణ ,శ్రీమతి పద్మజ దంపతులు -అమెరికా                   6,600

9-శ్రీ జగ్గా లోకానాధ్ ,శ్రీమతి సురేఖ దంపతులు -అమెరికా                         6,000

10-డా శ్రీ బండారు రాధాకృష్ణమూర్తి డాశ్రీమతి  సులోచన దంపతులు -అమెరికా 6,000

11-శ్రీ వాసుకి ,శ్రీమతి మాలిని దంపతులు -అమెరికా                                  5,000

12-శ్రీ సుంకర కోటేశ్వరరావు ,శ్రీమతి సరోజినీ దంపతులు -హైదరాబాద్          5,000

13-శ్రీ రావి శరత్ శ్రీమతి ఉష దంపతులు -అమెరికా                                    5,000

14-శ్రీ గోసుకోండ నరేంద్ర శ్రీమతి అరుణ దంపతులు  -అమెరికా                       4,000

15-శ్రీ గ్రంధి హరి శ్రీమతి విజయ లక్ష్మి దంపతులు -అమెరికా                           3,500

16-శ్రీ వేలూరి హరికిషన్ శ్రీమతి శారిక దంపతులు -అమెరికా                            3,000

17-శ్రీమతి వేణి దంపతులు అమెరికా                                                          2,500

18-శ్రీ అడుసుమిల్లి పవన్ సాయి శ్రీమతి పద్మశ్రీ దంపతులు -అమెరికా                2,500

19-శ్రీమతి పసుమర్తి లక్ష్మి -అమెరికా                                                           2,000

-20-శ్రీ గార్లపాటి ప్రసాదావధాని శ్రీమతి అనసూయ దంపతులు -అమెరికా              1,500

– 21-శ్రీ నాగరాజు శ్రీమతి రంజని దంపతులు -అమెరికా                                      1,250

22-శ్రీ శంభుని శ్రీరామ చంద్ర మూర్తి  శ్రీమతి సీతా మహాలక్ష్మి దంపతులు-ఖమ్మం     5,00

23-శ్రీమతి చతుర్వేదుల జానకి -విజయవాడ                                                   5,00

శ్రీ శంకరుల శివానంద లహరి ఆంతర్యం -11-

స్థూల సూక్ష్మ కారణ శరీరాల లయం

1-      స్థూల శరీరం -పంచ భూతాలూ ,అయిదు కర్మేంద్రియాలు ,అయిదు జ్ఞానేంద్రియాలు ,పంచ ప్రాణాలు ,,నాలుగు అంతః కారణాలు –కలిసిన మొత్తం 24 తత్వాలు కలిస్తే స్థూల శరీరం –ఈ 24 తత్వాలు లయం అయితేనే మోక్షం .అందుకే శంకారాచార్య 24 సార్లు మహేశ్వర పాద పద్మాల స్మరణ చేశారు .ఇలా స్మరణ చేస్తే స్థూల శరీరం పర బ్రహ్మలో లయం అవుతుందని ఆచార్యుల వారి ఆంతర్యం అని గ్రహించాలి .

2-      సూక్ష్మ శరీరం –పంచ ప్రాణాలు ,పంచ జ్ఞానేంద్రియాలు ,పంచ కర్మేంద్రియాలు మనసు  ,బుద్ధి కలిస్తే సూక్ష్మ శరీరం .ఇవి 17 తత్వాలు .ఇవీ లయం కావాలని 17 సార్లు పశుపతిని స్మరించారు .మనసును 18 వస్తువులతో పోల్చటం ఆ 17 తత్వాల సూక్ష్మదేహం  లయం అవటానికే నని ఆంతర్యం .

3-      కారణ శరీరం –ఇది ఆకారం లేనిదేకాక పుట్టుక ,చావులకు కారణమైనదికూడా.

దీనికోసం ‘’ఆశాపాశ క్లేశ దుర్వాసనాది —‘’శ్లోకం చెప్పి మనస్సు అనే పెట్టెలో ఈశ్వర పాద పద్మాలుంటే వాసనా క్షయమై కారణ శరీరం లయమౌతుందని  అప్పుడే అద్వైత సిద్ధి కలుగుతుందని ఇది వరకే గ్రహించాం . పాదాలు మనం నిలకడ గా ఉండటానికిఆధారం గా  తోడ్పడతాయి .అంఘ్రి అన్నా పాదాలే ఉత్తమ గతి పొందించేవి అని అర్ధం .సన్మార్గం లో సంచరి౦చటానికి సహకరించేవి చరణాలు .దేవతల శక్తులన్నీ భగవంతుని పాదాలలోనే ఉంటాయట .

పాద పద్మాలు అనే మాటకు ఆంతర్యం ఆత్మ,పరమాత్మల జ్ఞానాలే భగవంతుని పాదపద్మాలు .భగవంతుని లీలలు ఒక పాదం అయితే ఆ౦తరిక అర్ధం మరో పాదం అన్నారు విజ్ఞులు .శివుడు ఒక పాదం అయితే శక్తి మరోపాదం  అన్నారు.

శంకరాచార్య పాదాలను భక్తి పూర్వకంగా పాదపద్మాలన్నారు .జీవులను సంసార లంపటం నుంచి తరి౦పజేసేవి భగత్పాదపద్మాలు .

ఈ విధంగా శివానంద లహరి లో శంకర భాగవత్పాదులవారు సదాశివ పాద పద్మార్చనం ,స్మరణం ,కీర్తనం,పాద సంసేవనం అందరూ చేసి తరి౦చాలని భావించారు . ఇది శిరోధార్యం మార్గ దర్శకం కైవల్య సాధనం ,సంసార తరుణోపాయం .

సశేషం

మీ-గబ్బిట దుర్గా ప్రసాద్ -31-10-17 –కాంప్- మల్లాపూర్ –హైదరాబాద్

శ్రీ శంకరుల శివానంద లహరి ఆంతర్యం –10

అన్తఃకరణాలలో రెండవదైన బుద్ధి గురించి శంకర భగవత్పాదులు చెప్పిన శ్లోకాలను తెలుసుకొందాం .

విషయాన్ని నిశ్చయించే మానసిక స్థితి ని బుద్ధి అంటారు .జడ బుద్ధి ఉన్నవాడు పరమేశ్వర చి౦తనానికి దూరం గా ఉంటాడు అనే భావంగా చెప్పిన శ్లోకం –

‘’అసారే సంసారే నిజభజన దూరే ‘’శ్లోకం లో దీని వివరణ ఇదివరకే తెలుసుకొన్నాం .మరో శ్లోకం –

‘’యథా బుద్ధి శ్శుక్తౌ రజత మితి కాచాశ్మని మణి-ర్జలే పైస్టేక్షీరం భవతి మృగ త్రుష్ణాసు సలిలం

తథా దేవ భ్రాంత్యా భజతి భవదన్యో జడజనో –మహా దేవేశం త్వాం మనసి చ న మత్వా పశుపతే ‘’

దేవతలే ఆరాధించే పరమ శివా పశుపతీ !మూఢుడు సత్యం కాని దాన్ని సత్యం అని భ్రమ పడుతున్నాడు .తాను వేరు బ్రహ్మం వేరు అనుకొంటున్నాడు .అది నిజం కాదని ఆ వెర్రి మాలోకానికి తెలీదు పాపం .నువ్వు నిత్య సత్య సచ్చిదానంద స్వరూపుడివి .కాని వాడు నిన్ను వదిలేసి చిన్న దేవతలనే నమ్ముతున్నాడు .ఇది ఎలా ఉందీ అంటే ముత్యపు చిప్పను చూసి వెండి అని,  గాజు ముక్కను చూసి మణి అని, ఎండమావి ని చూసి నీరు అని భ్రమించటం లాగా ఉంది .కనుక నిన్నే సేవిస్తే ఈ భ్రమ ప్రమాదం వాడికి ఉండదు .ఇతర దేవతలను సేవిస్తే లౌకిక తాత్కాలిక ప్రయోజనాలే నేర వేరుతాయి . నిన్ను సేవిస్తే శాశ్వత ముక్తి లభిస్తుంది .నువ్వుఅవిద్యా నిర్మూలనం చేసి మోక్షం ప్రసాదిస్తావు .జీవుడు మాయావృతుడు .నీవు మాయాతీతుడవు .

అలాగే ‘’గభీరే కాసారే విశతి విజనే –‘’శ్లోకం లోనూ ఇదే భావాన్ని వివరించారని తెలుసుకొన్నాం

జడ బుద్ధిని జ్ఞానం లో నిలపాలి అప్పుడే తరుణోపాయం అని చెప్పెశ్లోక౦

‘’మనస్తే పాదాబ్జే నివసతు వచస్తోత్ర ఫణితౌ –కరశ్చాభ్యర్చాయాం శ్రుతి రపి కథాకర్ణన విధౌ

తవ ధ్యానే బుద్ధిః నయన యుగళం మూర్తి విభవే -పరగ్రంథాన్ కైర్వాపరమశివ జానే పరమతః ‘’

నా మనసు నీ పాద పద్మాల మీద లగ్నమవ్వాలి .తామర పువ్వుకు ఏమీ అంటనట్లు  నామనసుకు ఏ మాలిన్యమూ అంటరాదు.శివ జ్ఞానం అనే మకరందాన్ని మాత్రమే ఆస్వాదించాలి .నిన్ను స్తుతించే వేద,ఇతిహాస ,పురాణ స్తుతినే వింటూ ఉండాలి .కావ్యాలు, గేయాలు, పద్యాలలో నీ స్తుతే వినిపించాలి చేతులు నిన్నే అర్చించాలి .చెవులు నీ గాథలే వింటూ ఉండాలి . నాబుద్ధి నీధ్యాన లగ్నమవ్వాలి .నాకళ్ళు నీ రూప సౌందర్య దర్శనం తో ధన్యమవాలి .నువ్వే ప్రపంచం,ప్రపంచమే నువ్వు అనే భావన మనసు ,బుద్ధి లో నిండిపోవాలి .నా సర్వేంద్రియాలు నీ చుట్టూనే పరి భ్రమించాలి .ఇలా బుద్ధిని నీకై సర్వ సమర్పణ చేస్తే ,సాయుజ్యమే కదా కలిగేది .

1-      చిత్తం –‘’చింతన కతృత్వం చిత్తం –‘’జ్ఞాపకాల పొరలు ఉన్నది చిత్తం.చిత్తం లో పరమేశ్వర పరిమళాలు నింపుకోవాలి అని –

‘’పాపోత్పాత విమోచనాయ రుచి రైశ్వర్యాయ మృత్యుంజయ –స్తోత్ర ధ్యాన నతి ప్రదక్షిణ సపర్యాలోకనా కర్ణనే

జిహ్వా చిత్త శిరో౦ఘ్రి హస్త నయన శ్త్రోత్రై రహం ప్రార్ధితో –మా మా జ్ఞాపయ  ముహుర్మామేవ మా  మే వచః ‘’

మృత్యుంజయ మూర్తీ శివా !నాఇంద్రియాలన్నీ నిన్నే ప్రార్దిస్తున్నాయి .ఎందుకంటె తమవలన నేరాలు ఏవైనా జరిగితే అవి పాపాలకు కారణం అవుతాయని .పాపాలు మనోహరమైన ఈశ్వర సంబంధమైన జ్ఞాన సంపదను అనుభవించ కుండా అడ్డుపడతాయి .కనుక పాపాలవల్ల జరిగే ఉత్పాతాలు కలగకుండా ఇంద్రియాలన్నీ నిన్నే సేవిస్తున్నాయి .నాలుక నిన్ను స్తోత్రం చేయటానికి , చిత్తం నీ సంబంధమైన ధ్యానం చేయటానికి  చేతులు నిన్ను పూజించటానికి ,కళ్ళు నిన్నే దర్శించటానికి ,శిరస్సు నీకే నమస్కరించటానికి ,పాదాలు నీ చుట్టూ ప్రదక్షిణం చేయటానికి  ,చెవులు నీకథలే వినటానికి అనుకూలంగా ఉంచమని వేడుకొంటున్నాయి.అందుకని ఓ ప్రభూ నన్ను ఆ ఇంద్రియాలు కోరినట్లు ఆజ్ఞాపించు .నాకు మూగతనం చెవుడు ,గుడ్డితనం కుంటితనం రాకుండా చూడు .ఈ ఆవ లక్షణాలు లేకపోతె  హాయిగా నాఇంద్రియాలు నీ సేవలో ధన్యమౌతాయి

4-ఆహ౦కార౦  -.’’అహం కర్తా అహంకారః ‘’అని శకరాచార్య నిర్వచనం .నేను చేస్తున్నాను అనే భావమే అహంకారం .ఇది అనర్ధ హేతువు దాన్ని వదిలించుకోవాలి .దీనికోసం

‘’త్వత్పాదాంబుజ మర్చయామి –‘’శ్లోకం లో ఈ విషయాన్నే  చెప్పారు.  దీన్ని మనం తెలుసుకొన్నాం .అలాగే 

‘’మనస్తే పాదాబ్జే –‘’శ్లోకం లోని భావాలూ గ్రహించాం –

‘’సా రసనే తే నయనే –తావేవ కరౌ స ఏవ కృతకృత్యః

యా యే యౌయో భర్గం-వద తీక్షతే సదార్చత స్స్మరతి’’

శివ నామం ఉచ్చ రించే నాలుకే నాలుక .శివుని దర్శించే నేత్రాలే నేత్రాలు .మహా దేవుని పూజించే చేతులే చేతులు .నిరంతరం సదాశివుని స్మరించేవాడే కృతకృత్యుడు .పోతనగారుకూడా ‘’కమలాక్షు నర్చించు కరములు కరములు శ్రీనాధు వర్ణించు జిహ్వ జిహ్వ —‘’అన్నారు .చివరగా –

‘’క్రీడార్ధం సృజసి ప్రపంచ మఖిలం క్రీడా మృగా స్తే జనాః –యత్కర్మా చరితం మయా చ భవతః ప్రీత్యై భవత్యేవ తత్

శంభో స్వస్య కుతూహలస్య కరణం మచ్చేస్టితం నిశ్చితం –తస్మాన్మామక రక్షణం పశుపతే కర్తవ్య మేవ త్వయా ‘’

ప్రపంచాన్ని ఆటగా సృస్టిస్తావు.ఆ ఆటలో మేమందరం క్రీడా మృగాలమే .నువ్వు సృష్టించిన అడవి జంతువును నేను . నీ పెంపుడు జంతువును కూడా .కనుక నేను చేసే పనులన్నీ నీకు ఇష్టంగానే ఉంటాయి .పెంపుడు జంతువంటే  యజమానికి వల్లమాలిన అభిమానం కదా .కనుక నన్ను రక్షించటం నీ బాధ్యత ,కర్తవ్యమ్ కూడా .కారణం నువ్వు పశుపతివి .

   సశేషం

 మీ-గబ్బిట దుర్గా ప్రసాద్ -29-10-17 –ఉయ్యూరు

—

శ్రీ శంకరుల శివానంద లహరి ఆంతర్యం -9

మనసు ను చాతకం ,చక్రవాకం,చకోరం హంస లతో కూడా పోల్చి శంకరాచార్య శ్లోకాలు చెప్పారు –

‘’హంసః పద్మవనం సమిచ్ఛతి యథా నీలాంబుదం చాతకః –కోకః కోకనది ప్రియం ,ప్రతిదినం చంద్రం చకోర స్తదా

చేతో వా౦ఛతి మామకం ,పశుపతే ,చిన్మార్గ మృగ్యం విభో-గౌరీనాథ,భవత్పాదాబ్జయుగళం కైవల్య సౌఖ్య ప్రదం ‘’

హంస నిండుగా పద్మాలున్న కొలను లో విహరించాలని కోరుకొంటుంది .చక్రవాకం సూర్యుడిరాక కోసం ఎదురు చూస్తుంది .చక్రవాకం చంద్రుని  వెన్నెల కోసం నిరీక్షిస్తుంది .చాతక పక్షి నీల మేఘం ఎప్పుడు వర్షిస్తుందా అని అర్రులు చాస్తూ ఎదురు చూస్తుంది .అలాగే నేను జ్ఞానమార్గం చూపించే  గౌరీ నాధుని పాద పద్మాలద్వారా మోక్షం కోసం ఎదురు చూస్తున్నాను .

  పై నాలుగు పక్షులు కంటికి కనిపించవు .మనసు కూడా అంతే .ఆ పక్షులకున్న విశిష్ట గుణాలవంటివి మన మనసుకు కూడా ఉన్నాయి .ఈ సుగుణాలతో సాధన సాగించమని ఆంతర్యం .

1-హంస పాలు నీళ్ళను వేరు చేస్తుంది .అంటే పాలను వేరు చేస్తుంది .అంటే గుణాన్ని గ్రహించటం హంస లక్షణం .అలాగే హంస తన జీవితకాలం లో ఒక హంస తోనే జత కడుతుంది .మరో హంస వైపు చూడదు .అలాగే భక్తుడు తన చూపును ఈశ్వరుని వైపే చూడాలని ఆంతర్యం .2- చాతక పక్షి శరత్కాల నీల మేఘాన్ని తప్ప మరొక దాన్ని యాచించదు .అన్నికాలాలలోవర్షం పడినా చాతకానికి ఆ నీరు అక్కర్లేదు .అలాగే మనం కూడా మోక్షాన్ని ఇచ్చే ఈశ్వరునే యాచించాలని భావం .3-చకోర పక్షి వెన్నెలలోని అమృతాన్ని ఆస్వాదిస్తుంది .అమృతం చంద్రునిలో మాత్రమే ఉంటుందని దానికి తెలుసు .దీనికోసం నిరంతరం ప్రయత్నిస్తూనే ఉంటుంది .మనం కూడా నిరంతర ప్రయత్నం తో అద్వైతామృతాన్నిపొందాలని సందేశం .-  4- చక్రవాకం పత్నీ వియోగాన్ని పోగొట్టుకోవటానికి సూర్యుని కోసం ఎదురు చూస్తుంది .జీవుడు కూడా పరమాత్మ వైపే దృష్టి సారించాలని సూచన .ఈ నాలుగు పక్షులు తమ గుణాలవలన మానవుని కి గొప్ప ఆధ్యాత్మిక సందేశాన్నిస్తున్నాయని ఆంతర్యం  .

  మరొక శ్లోకం లో మనసును చాతకం తో పోల్చారు –

‘’కారుణ్యామృత వర్షిణం ,ఘన విపద్గ్రీష్మ చ్ఛిదాకర్మఠం-విద్యా సస్య ఫలోదయాయ సుమనస్సం సేవ్య మిచ్ఛాకృతిం

నృత్యద్భక్త మయూర మద్రినిలయం  సంసజ్జటామండలం –శంభో ,వాంఛతి నీలకంధర,సదా త్వాం మే మనశ్చాతకః ‘’

ఈ శ్లోకం లో నీలకంఠుడైన శివుడికి, మేఘానికి భేదం లేనట్లుగా చమత్కరించారు శంకరాచార్య

ఆ నీల మేఘం కారుణ్యం అనే అమృతాన్ని వర్షిస్తుంది .గ్రీష్మ తాపాన్ని పోగొడుతుంది .పంటలు బాగా పండుతాయి కనుక రైతులు పూజిస్తారు .వాళ్ళు కోరిన కోరికలను మేఘం తీరుస్తుంది .మేఘాలను చూసి నెమళ్ళు  ఆనంద పరవశంతో నాట్యం చేస్తాయి. మేఘం ఎత్తైన కొండల మీద ఉంటుంది . కం అంటే నీరు ధర అంటే ధరించినది అంటే నీటిని కలిగిఉన్న మేఘం అని అర్ధం .ఆ నీటితో తన దాహార్తిని తీర్చమని చాతక పక్షి నీల మేఘాన్ని కోరుతోంది

  గరళాన్ని మింగటం చేత శివుడి కంఠం నల్లబడింది కనుక నీల కంఠుడు.కంధరం అంటే మెడ కనుక నీల క౦ధరుడు  .ఈయన కరుణ అనే అమృతాన్ని వర్షిస్తాడు .ఆపదలను తొలగించి ,జ్ఞానం అనే పంటలు పండిస్తాడు .దేవతలు ఆయనను సేవిస్తారు ,ఆనంద పరవశంతో నాట్యం చేస్తారు .కైలాస పర్వత వాసి ,జటా జూట ధారి శివుడు .అలాంటి కరుణానిధి అయిన శివుడిని నా మనస్సు అనే చాతకపక్షికోసం  కారుణ్యం అనే అమృతాన్ని వర్షించమని ప్రార్ధిస్తోంది అని ఆంతర్యం .

 మనసును ఒక పెట్టె గా అభి వర్ణించి మరోశ్లోకం రచించారు –

‘’ఆశా పాశ క్లేశ దుర్వాసనాది-భేదో ద్యుక్తైర్దివ్య గంధై రమందై

ఆశా శాటీకస్య పాదారవిందం –చేతః పేటీం వాసితాంమే తనోతు ‘’

నా మనసు ఒక పెట్టె.దాని నిండా అవిద్య ,అస్మితం ,రాగం ,ద్వేషం  అభినివేశం అనే అయిదు క్లేశాలు అనే దుర్వాసనతో ఉంది . ఇవి దుఃఖ హేతువులు .దిక్కులే వస్త్రాలుకల దిగంబరుడైన శివుడిపాద పద్మాలు నా మనస్సు అనే పెట్టెలో ఉంటే ఆ క్లేశ దుర్వాసనలు అన్నీ తొలగి పోతాయి .

అవిద్య అంటే అజ్ఞానం .అస్మితం అంటే సుఖ దుఖాలు నేను అనుభవిస్తున్నాను అనే భావం వలన కలిగే దుఖం .రాగం అంటే ఇష్టమైన దానిపై కోరిక అవి దూరమైతే దుఖం .ద్వేషం అంటే ఇష్టం లేని వస్తువులు దగ్గరైతే కలిగేది .అభినివేశం అంటే తనను తాను ప్రేమించటం  మరణాదుల వలన కలిగే దుఖం .ఈ క్లేశాలు నశించాలంటే శివజ్ఞానం ఒక్కటే మార్గం అని ఆంతర్యం .

 మనసు ఒక గుర్రం అని ఇంకో శ్లోకం –

‘’కళ్యాణినం సరస చిత్ర గతిం సవేగం –సర్వేంగితజ్నమనఘం ధ్రువ లక్షణాఢ్య౦

 చేత స్తురంగ మధిరుహ్య చరస్మరారే –నేత స్సమస్త జగతాం వ్రుషభాధి రూఢః’’

ఈశ్వరా !నామనసు ఒక గుర్రం .దాని నడక చాలా చిత్ర విచిత్రంగా ఉంటుంది . దాని పరుగు వేగం చాలా ఎక్కువ .మనో భావాలను ఇట్టే పసిగట్టే నేర్పు దానికి ఉంది.దోషాలు లేని మాంచి జాతికి చెందిన సాముద్రికలక్షణాలన్నీ కలిగి ఉన్న కల్యాణి జాతి గుర్రం .నువ్వు సర్వ లోకాధినేతవు .వృషభారూఢుడవు.నువ్వే నా మనసనే పంచకల్యాణి గుర్రాన్ని అధిరోహించి తిరగమని  వేడు కొంటున్నాను .

  గుర్రానికి ఉండే సరస చిత్ర గతి 5 రకాలు -1-అతి వేగం అతి నెమ్మది కాకుండా మధ్యరకం గా పరిగెత్తటం 2- .వేగంగా చాతుర్యంగా పరిగెత్తటం 3-వంకర టికర కాకుండా తిన్ననైన మార్గం లో గమనం 4-పైకి కాళ్ళు కదిలిస్తూ పరిగెత్తటం 5-ఒకే రకమైన వేగం తో ఎంతదూరమైనా పరిగెత్తటం.

  ఈ అయిదు రకాల గమనం మన మనసును నడిపే పంచేంద్రియాలకు సంకేతం .రౌతు అంటే గుర్రాన్ని నడిపే వాడు సమర్దుడైతే పొగరుబోతు గుర్రమైనా చెప్పినట్లు దారికొచ్చి మాట వింటుంది .కనుక సర్వ సమర్ధుడైన ఈశ్వరుడే మన మనసనే గుర్రాన్ని ఎక్కితే అది దారికి తప్పకుండా వస్తుందని ఆంతర్యం .

 ఇదికాక మనసును చెరువుతో ,ఇంటితో కూడా పోల్చారు . ఆశ్లోక వైభవాలను ముందే తెలుసుకొన్నాం .

  మనసు అనే మొదటి అంతః కరణ పూర్తయింది .  రెండవదైన బుద్ధి గురించి  తర్వాత తెలుసుకొందాం .

    సశేషం

 మీ-గబ్బిట దుర్గాప్రసాద్ -28-10-17 –ఉయ్యూరు

శ్రీ శంకరుల శివానంద లహరి  ఆంతర్యం -8

మనసు కోతి వంటిది .నిలకడ ఉండదు అన్నీ కావాలను కొంటుంది ఎంగిలి చేసి వదిలేస్తుంది .మోహంఎక్కువ అంటూ శంకరులు చెప్పిన శ్లోకం –

‘’సదా మోహాటవ్యాం చరతి యువతీనాం కుచగిరౌ –నటత్యాశా శాఖా స్పటతిఝడితి స్వైర మభితః

కపాలిన్ భిక్షో  మే హృదయ కపి మత్యంత చపలం –దృఢం భక్త్యా బధ్వా శివ భవదధీనం కురు విభో ‘’

మనసు అనే కోతి అడవుల్లో పర్వతాలలో కుదురు లేకుండా గంతులు వేస్తూ ఉంటుంది .చెట్ల కొమ్మలపై పల్టీలు కొడుతుంది .దాన్ని అదుపు చేసి బంధించటం కష్టం .దానికి మోహం ఎక్కువ .పరుగులు పెడుతూ ఉంటుంది .నా వశం లో లేని నా మనసును నువ్వే భక్తి అనే త్రాడుతో బంధించి నీ స్వాధీనం చేసుకో .నువ్వు భక్తి  అనే జ్ఞాన భిక్షను పెట్టే ఆది భిక్షుడవు .

  మనసు ఒక ఇల్లు అంటూ –‘’శివ ,తవ పరిచర్యా సన్నిధానాయ గౌర్యా –భవ మమ గుణ ధుర్యాం  బుద్ధికన్యాం ప్రదాస్యే

సకల భువన బంధో సచ్చిదానంద సింధో-సదయ హృదయ గేహే సర్వదా సంవస త్వం ‘’

సకల భువన బంధువైన శివా !నా మనసు ఒక ఇల్లు .నాబుద్ధి ఒక కన్య .ఆకన్య గుణ గరిస్టురాలు.దాన్ని నీకు అర్పించాలని సంకల్పిస్తున్నా .నా కోరిక మన్నించి నామనసు అనే ఇంట్లో పార్వతీ దేవి తో వచ్చి ఉండిపో .నాబుద్ధికన్యను గ్రహించి ఇల్లరికపు అల్లుడిలాగా ఇక్కడే ఉంటే నిన్ను సదా సేవిస్తూ ధన్యుడనవుతాను .

 మనసు ఒక మదపు టేనుగు అని –‘’ధైర్యా౦కుశేన నిభ్రుతిం –‘’అనే శ్లోకంలో వర్ణించారు .దీన్ని ఇదివరకే తెలుసుకొన్నాం . మనసు ఒక గుడారం అంటూ మరోశ్లోకం –

‘’ధృతి స్తంభాధారం దృఢగుణ నిబద్ధాంసగమనాం –విచిత్రాంపద్మాఢ్యాం ప్రతి దివస సన్మార్గ ఘటితాం

స్మరారే మచ్చేత స్పుట పట కుటీం ప్రాప్య విశదాం – జయ స్వామిన్ శక్త్యా సహ శివ గణైః సేవిత విభో ‘’

నా మనసు ఒక గుడారం .దానికి స్తంభాలు ధైర్యం మొదలైనవి.  త్రాళ్ళు సత్వ రజస్ తమోగుణాలు .మనస్సనే ఈ గుడారాన్ని ఎక్కడికి పడితే అక్కడికి తీసుకొని వెళ్ళచ్చు .ఈ గుడారం లో మూలాధారం మొదలైన ఆరు చక్రాలు పద్మాలుగా ఉన్నాయి.  కుండలినీ శక్తి ఉంది.దీన్ని సాధించి ,భేదించి ముందుకు వెళ్ళచ్చు .ఆత్మజ్ఞానం తో ఇందులో హాయిగా జీవించ వచ్చు .నువ్వు కామారివి అంటే మన్మధుడికి శత్రువుకదా .

 మనసు ఒక దొంగ అని చెప్పే శ్లోకం –

‘’ప్రలోభాద్యై రర్ధాహరణ పరతంత్రో దని గృహే –ప్రవేశోద్యుక్త స్సంభ్రమతి బహుధా తస్కర పతే

ఇమాం చేతశ్చోరంకథ మిహ సహేశంకర విభో –తవాధీన౦ కృత్వా మయి నిరపరాధే కురు కృపాం ‘’

నా మనసు ఒక దొంగ .డబ్బు సంపాదించాలనే ఆశ దానికి ఎక్కువ .డబ్బున్న వాళ్ళ ఇళ్ళల్లో ప్రవేశిస్తుంది .నేను వేరు చిత్తం వేరు ..ఇలా నామనసు శరీర సుఖాలకోసం లోభ గుణానికి బానిస అయింది .ఈ దుర్గుణాన్నిఇక నేను భరించ లేను . నువ్వే స్వాధీనం చేసుకోవాలి.  నన్ను నిరపరాధిని చేసి దయ చూపించు మహ ప్రభో.  

  మనసు ఒక తెల్లకలువ అని చెప్పిన శ్లోకం –

‘’ధర్మో మే చతురంఘ్రికః సుచరితః పాపం వినాశం గతం –కామ క్రోధ మదాదయో విగళితాః కాలాస్సుఖా విష్క్రుతః

జ్ఞానానంత్య మహౌషధి స్సుఫలితా కైవల్య నాథే సదా –మాన్యే మానస పుండరీక నగరే రాజావతంసే స్థితే

ఉత్తమ రాజు పాలనలో ధర్మం నాలుగు పాదాలా వర్ధిల్లు తుంది .కామ క్రోధాది అరిషడ్వర్గాలు నశిస్తాయి రోజులు పక్షాలు నెలలు సంవత్సరాలతో కూడిన కాలం అంతా చక్కగా చల్లగా ప్రకాశిస్తుంది .అనంతమైన జ్ఞానం అనే ఔషధం రాజ్యం లో ఫలిస్తుంది. దాని వలన ప్రజలు విజ్ఞులై సుఖాలనుభవిస్తారు .

  అలాగేమనసు ఒక పుండరీకం అంటే తెల్లకలువ .దానిలో తలపై చల్లని చంద్రుని ధరించిన పరమశివుడున్నాడు .అ౦దువల్ల కామక్రోధాదులు నశించి పోయాయి .రాజు అంటే ప్రభువు చంద్రుడు అనే రెండు అర్ధాలున్నాయి .చంద్రుడు మృదుల స్వభావి రాజు కఠినుడు .ఇలాంటి తెల్లకలువ అనే నామనసులో హాయిగా రాజులాగా విహరించు పరమశివా అని అర్ధం .

  మనసు ఒక దుర్గం గా భావించి చెప్పిన శ్లోకం –

‘’గాంభీర్యం పరిఖా పదం ఘన ధ్రుతిః ప్రాకార ఉద్యద్గుణ-స్తోమ శ్చాప్త బలం ఘనేంద్రియ చయో ద్వారాణి దేహస్తితః

విద్యా వస్తుసమృద్ధి రిత్యఖిల సామగ్రీ సామేతే సదా –దుర్గాతిప్రియ దేవ మామక మనో దుర్గే నివాసం కురు ‘’

నామనసు ఒక దుర్గం .అంటే కోట .అందులో ప్రవేశించటం కష్టం .దుర్గమమైనది దుర్గం –ప్రవేశించటానికి కష్టమైనది అని అర్ధం .దుర్గానికి రక్షణగా చాలా ఉంటాయి .దాని కందకం గాంభీర్యం .ప్రాకారం ధైర్యం .సద్గుణాలే నమ్మదగిన ఆప్తులు .శరీరం లోని నవరంద్రాలే ఇంద్రియాలు . అందులోని సంపద అంతా విద్య  జ్ఞానం మొదలైనవి .కనుక శివుడు ప్రవేశించటానికి కావలసిన సామగ్రి అంతా ఉంది .శివుడు దుర్గా ప్రియుడు .మనసు పరమ  శివునికి ఇష్టమైన దుర్గం అని ఆంతర్యం . శివజ్ఞానం ఉంటేనే ప్రవేశానికి అర్హత ఉంటుంది అని అర్ధం .

  మనసు ఒక అడవి అని వర్ణించే శ్లోకం –

‘’మా గచ్ఛమితస్తతోగిరిశ భో మయ్యేవ వాసం కురు –స్వామిన్ ఆది కిరాత మామక మనః కాంతార సీమాంతరే

వర్తంతే బహుశో మృగా మద జుషో మాత్సర్య మోహాదయః –తాన్ హత్వా మృగయా వినోద రుచితా లాభం ఛ సంప్రాప్యసి’’

శివా .నువ్వు ఎక్కడికీ పోవద్దు .నాలోనే ఉండిపో.నామనసు ఒక అరణ్యం అని ముందే చెప్పాను .నువ్వేమో ఆది కిరాతకుడవు .నీకు వేటాడటం చాలా ఇష్టం సరదా కదా .నీకు కావలసినన్ని మృగాలు నాలోనే ఉన్నాయి . హాయిగా వేటాడి అనుభవించు .రా .ఆలస్యం చేయకు .ఇవిగో కామ క్రోధ మద మాత్సర్యాలు అనే మృగాలు .వీటిని వేటాడి నీ వేట తీట తీర్చుకో అనుభవించు ,ఆస్వాదించు ,వినోదించు ,ప్రయోజనం పొందు .

   సశేషం

 మీ-గబ్బిట దుర్గా ప్రసాద్ -27-10-17- ఉయ్యూరు

—

—

శ్రీశంకరుల శివానంద లహరి ఆంతర్యం -6

నాలుగు రకాల భక్తులకు ఉమా మహేశ్వరుడే శరణు అంటూ వారి  విషయమై శంకరాచార్య వివరిస్తున్నారు .’’ఆర్తో ,జిజ్ఞాసు ,రర్ధార్ధీ,జ్ఞానీ చ భరతర్షభ ‘’అని గీతలో భగవాన్ కృష్ణ పరమాత్మ నలుగురు భక్తులను పేర్కొన్నాడు .

1-ఆర్తుడు – ఆర్తుడు అంటే దుఖం తో బాధ పడేవాడు .

‘’అసారే సంసారే నిజ భజన దూరే జడధియా-భ్రమంతం మాం మంథం పరమ కృపయా పాతుముచితం

మదన్యః కో దీనస్తవ కృపణ రక్షాతి నిపుణః-త్వదన్యః కో వా మే త్రిజగతిశరణ్యః పశుపతే ‘’

‘’స్వామీ శివా !స్వస్వరూప జ్ఞానం లేని మూఢుడను నేను .అంథుడను .దయతో ఈ దీనుడిని రక్షించు .ఈ ప్రపంచం చావు ,పుట్టుకలతో కూడి బాధామయంగా ఉంది.ఇందులో సారం అంటే రుచి లేనే లేదు .నేనెవరినో ,ఎక్కడి నుంచి వచ్చానో ,మళ్ళీ ఎక్కడికి చేరుకోవాలో తెలుసుకో లేక పోతున్నాను .దేహమే నేను అనే భ్రాంతి లో పడి కొట్టుకొంటున్నాను .కించిత్తు కూడా ఆత్మ జ్ఞానం లేని వాడిని .ఆత్మ చింతన లేకపోవటం తో ఈ ప్రపంచం నిత్యం, సత్యం అనే మాయలో ఉన్నాను .వయసు మీద పడి ముసలి వాడినై ,కంటి చూపు కూడా లేని వాడినయ్యాను .ఏది సత్యమో ఏది నిత్యమో తెలియ లేకున్నాను .సంసార లంపటం లో కూరుకు పోయి తపిస్తున్న దీనుడిని .నాలాంటి దీనులను రక్షించటం లో నువ్వు మహా నేర్పరివి .నువ్వు రక్షించటానికి నా కంటే దీనుడు ఎవరున్నారయ్యా .త్రిలోకాలలో నువ్వే నాకు దిక్కు .’’అన్యధా శరణం నాస్తి త్వమేవ శరణం మమ’’

  ఇక కాపాడే వారెవ్వరూ లేరని ,భగవంతునిపై భారం వేస్తే ,ఆయన రక్షగా నిలుస్తాడు అని ఆంతర్యం .

తర్వాత శ్లోకమూ ఆర్తుని రోదనమే –

‘’ప్రభుత్వం దీనానాం ఖలు పరమ బంధుః పశుపతే –ప్రముఖ్యోహం తేషా మపి కిముత బంధుత్వ మనయోః

త్వయైవ క్ష౦తవ్యాః శివ మదపరాధాశ్చ సకలాః – ప్రయత్నాత్కర్తవ్యం మద వనమియం బంధు శరణిః’’

పశుపతీ !నువ్వు సర్వ సమర్ధుడవు .దీనులకు అత్యంత ఆప్తుడవైన బంధువుడవు .బంధు ,దీన జన రక్షకుడవు  నువ్వు .దీనులలో ముఖ్యుడను నీకు బంధువుడను సన్నిహితుడను అని నీకు వేరే చెప్పాలా!నాతప్పులన్నీ క్షమించు .దీనికి ప్రయత్నించటం నీ తక్షణ కర్తవ్యమ్ .బంధు రక్షణ సంప్రదాయంగా వస్తోందికదా  .

పరమేశ్వరుడే ఆర్త త్రాణ పరాయణుడు అని ఆంతర్యం  సంసార తాప పరితప్తుని గూర్చిన శ్లోకాలివి .

2-జిజ్ఞాసువు –జ్ఞానం కావాలని ప్రార్ధించే వాడు జిజ్ఞాసువు

‘’ఛందశ్శాఖి శిఖాన్వితైః ద్విజ వరై స్సంసేవితే శాశ్వతే –సౌఖ్యాపాదిని ఖేద భేదినిసుధా సారైః ఫలైర్దీపితే

చేతః పక్షి శిఖా మణే,త్యజ వృధాసంచార మన్యైరలం-నిత్యం శంకర పాద పద్మ యుగళీ నీడే విహారం కురు ‘’

ఓ మనసా !పక్షీ౦ద్రా!ఎందుకు అటూ ఇటూ వృధాగా తిరుగుతావు ?అదుగో శంకరుని పాదపద్మాలు అనే గూడు అక్కడ ఉంది చూడు .దాంట్లో హాయిగా విహరించు .వేదాలు అనే కొమ్మల చివర ఆ గూడు ఉన్నది .దాన్ని బ్రహ్మ విద్యలో శ్రేష్టు లైన యోగీశ్వరులు సేవిస్తూ ఉంటారు .ఈ గూడు ఆషామాషీ ది కాదు శాశ్వత నివాసం .పరమ సుఖమైన మొక్షాన్నిచ్చేది .సంసార దుఖాన్ని పోగొట్టేది .అది అమృతం నిండిన పండ్లతో శోభిస్తుంది .ఇంకెందుకు ఆలస్యం ? శాశ్వతంగా ఆ శంకరుని పాద పద్మాలలో స్వేచ్ఛగా  విహరించి పరమానంద విభూతి పొందు .

  మనసు పక్షిలాగా ఒక చోట కుదురుగా ఉండదు .దానికి శాశ్వతమైన గూడు అవసరం.  జిజ్ఞాసువుకూడా అలాగే శాశ్వతమైన నివాసం కావాలి . అదే శంకర పాద సన్నిధి అని ఆంతర్యం .

తర్వాత రెండు శ్లోకాలు కూడా జిజ్ఞాసువు నుద్దేశించి చెప్పినవే –

‘’ఆకీర్ణే  నఖ రాజి కాంతి విభవైరుద్యత్సుధావైభవైః-రాధౌతేపి చ పద్మరాగ లలితే హంస వ్రజై రాశ్రితే

నిత్యం భక్తివధూగణై శ్చరహసి స్వేచ్ఛావిహారం కురు –స్థిత్వా మానస రాజ హంస ,గిరిజా నాధాంఘ్రి సౌధాంతరే ‘’

ఈ శ్లోకం గూర్చి ఇదివరకేచేప్పుకున్నాం .తర్వాత శ్లోకం –

‘’శంభు ధ్యాన వసంత సంగిని హృదారా మేఘ జీర్ణ చ్ఛదాః-స్రస్తా భక్తి లతాచ్ఛటా విలసితా పుణ్య ప్రవాళశ్రితాః

దీప్యంతే గుణ కోరకా జపవచః పుష్పాశ్చ సద్వాసనాః-జ్ఞానానంద సుధా మరంద లహరీ సంవిత్ఫలాభ్యునతిః’’

శివుని ధ్యానించటం అనేది వసంత ఋతువు .నా హృదయం ఒక పూల తోట. దానిలో శివధ్యానం అనే వసంత ఋతువు ప్రవేశించింది .వెంటనే నాలో ఉన్న పాపాలు అనే ఎండుటాకులన్నీ రాలిపోయాయి .వెనువెంటనే పుణ్యాలు అనే పగడాల లాంటి యెర్రని చిగురుటాకులనే సద్గుణాలు  మొలకెత్తాయి .దానితో భక్తి  అనే లతలు ఏర్పడి  శివుని పైకి ఎగబ్రాకాయి  .అవి నవ నవో న్మేమేషంగా గా ఉన్నాయి .అలా అల్లుకు పోయిన లతలకు శివ ధ్యానమే జపం అయింది .ఆ లతలకు జప వాక్కులు అంటే  సోహం ,పంచాక్షరి మంత్రం పుష్పాలుగా పూశాయి. ఒక్క సారి శివా అంటే చాలు స్వస్వరూప జ్ఞానం ఏర్పడి  వాటి పరిమళాలు అంతటా వ్యాపిస్తాయి .అవే బ్రహ్మానంద పరమైన సంస్కార పరిమళాలు .ఆ పుష్పాలనుండిజ్ఞానానందం అనే అమృతం మకరందంగా  ధారా పాతంగా ప్రవహి౦చి౦ది  .భక్తిలతకు బ్రహ్మ జ్ఞానం అనే పంట పండింది. ఇదే జ్ఞానానందం అనే సుధా తరంగం  .ఇదే కైవల్యం .

3-అర్ధార్ధి-ధనంమొదలైన కోరికలు కోరేవాడు అర్ధార్ధి.సాధకుడికి ఇవి అక్కరలేదు కావలసింది శాశ్వతమైన ముక్తి  బ్రహ్మానందం .దీనికోసం మళ్ళీ మళ్ళీ తపస్సు చేస్తారు .పొందే దాకా  వదిలి పెట్టరు వీరు అర్ధార్ధులు.

‘’కరోమి త్వత్పూజాం సపది సుఖదో మే భవ విభో-విధిత్వం ,విష్ణుత్వం  దిశసి ఖలుతస్యాఃఫలమితి

పునశ్చ త్వాం ద్రష్టుం దివి భువి వహన్ పక్షి మృగతా – మదృస్ట్వా తద్ఖేదం కథ మిహ సహేశంకర విభో ‘’

శంకర ప్రభూ !నీ పూజ చేస్తున్నా .దానికి ప్రతిఫలంగా బ్రహ్మ పదవో విష్ణు పదవోఇస్తానంటావేమో .అవి నాకు వద్దే వద్దు .నిన్ను పూజించే విష్ణువు సృష్టి కార్యం చేస్తున్నాడు .బ్రహ్మకు నువ్వే వేదాలు ఇచ్చావు.   విష్ణువు  నీ మూల స్వరూపం తెలుసుకోవటానికి భూమిని త్రవ్వి త్రవ్వి అలసి సోలసి వెనక్కి వచ్చేశాడు పాపం  .బ్రహ్మ సృష్టి కార్యం లో మునిగి పోయి ,నీ అంతం ఎక్కడుందో తెలుసుకోవటానికి హంసగా మారి యెగిరి యెగిరి తిరిగి తిరిగి ఆయాసం తో దిమ్మ తిరిగి మైండ్ బ్లాకై అబద్ధం చెప్పి శాపానికి గురై పూజకు అనర్హుడయ్యాడు .కనుక నాస్వామీ !బ్రహ్మత్వం విష్ణుత్వం నాకు వద్దు మహాప్రభో .నీ ఆది ,అంతాలు చూడలేని ,తెలుసుకోలేని ఆపనికి మాలిన  పదవులు నా కెందుకయ్యా-ఏం చేసుకోను నేను ? ఆ దుఖం ఎందుకు ఆ వ్యధ ఎందుకు వృధా  ఆయాసం ఎందుకు నాకు ? నీ పూజా ఫలంగా మోక్షం ప్రసాదించు తండ్రీ .చాలు .  

  శివుని  అశాశ్వతమైన కోరికలు కోరరాదు .శాశ్వతమూ నిత్యమూ అయిన మోక్షాన్నే కోరుకోవాలని ఆంతర్యం .

1-      జ్ఞాని –బ్రహ్మజ్ఞాని నిశ్చలంగా నిశ్చింతగా ,పరమార్ధం లో మునిగి తేలుతూ ఉంటాడు .శివుడు నాలో కొలువై ఉన్నాడు నాకు భయమెందుకు అనుకొంటాడు –ఈ విషయాన్నే –‘’దీయంత్రేణ వచో ఘటేన కవితా కుల్యోప కుల్యాక్రమై –‘’శ్లోకం లో విపులంగా చెప్పుకొన్నాం .మరో శ్లోకం –

‘’కరలగ్న మృగః కరీంద్ర భంగో –ఘన శార్దూల విఖండనోస్త జంతుః

గిరిశో విశదాకృతిశ్చ చేతః –కుహరే పంచ ముఖోస్తి మే కుతో భీః’’

 చేతిలో జింక  గజాసుర వ్యాఘ్రాసుర సంహారి  ప్రాణులను తనలో విలీనం చేసుకొనేవాడు  భస్మలేపనం తో తెల్లగా ఉన్నవాడు ,పర్వత శయనం కలవాడు ,అయిదు ముఖాలున్న శివుడు నా మనస్సు అనే గుహలో ఉండగా నాకు భయం ఎందుకు ?

 సింహాన్ని కూడా పంచముఖఃలేక పంచాస్య  అంటారు .అదీ గుహలోనే ఉంటుంది.దాని చేతిలో వేటాడిన జింక ఉంటుంది .ఏనుగు, పెద్దపులినిఅది చంపుతుంది  .సింహం ఉన్న గుహలో ఇక ఏ జంతువూ ధైర్యంగా ప్రవేశించలేదు .పంచముఖుడైన శివుడిని ,పంచాస్య అయిన సింహాన్ని కలిపి పోల్చి చెప్పారిక్కడ .

  సశేషం

   మీ-గబ్బిట దుర్గా ప్రసాద్ -25-10-17 –ఉయ్యూరు        

‘   

 శ్రీశంకరుల శివానంద లహరి ఆంతర్యం -5

శివానంద లహరిలో నవ విధ భక్తి కి శంకరులు చెప్పిన శ్లోకాలు

1-      వందనం –‘’కలాభ్యాం చూడాలంకృత శశి కలాభ్యాం నిజతఫః –ఫలాభ్యాం భక్తేషు ప్రకటిత ఫలాభ్యాం భవతు మే

శివాభ్యా మస్తోక త్రిభువన శివాభ్యాం హృది పున-ర్భవాభ్యామానంద స్పురదనుభవాభ్యాం  నతి రియం ‘’

శివునికి, శివా కు నమస్కారం .ఆ ఆది దంపతులు సకల వేద విద్యా స్వరూపులు .సిగపై చంద్ర కళ కలవారు .ఒకరి తపస్సుకు మరొకరు ఫలంగా లభించినవారు .భక్తులు కోరే ధర్మార్ధ కామ మోక్షాలను ప్రసాది౦చేవారు  .మంగళప్రదులై  ముల్లోకాలకు అనంత శుభాలనిచ్చేవారు .ధ్యానిస్తే హృదయం లో గోచరించేవారు .ఆనంద స్వరూపులే కాకుండా మనకూ ఆనందాన్ని కలిగించేవారు అయినశివా శివులకు నమస్కారం .

  దీనితో పాటు 50 ,51 ,56 శ్లోకాలు కూడా వందనానికి ఉదాహరణలే .’’శివాభ్యాం ‘’అనే మాటలో ఒకే రూపం లో ఉన్న శివ పార్వతులు పరబ్రహ్మ తత్వంగా భావించాలని శ్రీ శ౦కరుల ఆంతర్యం.ఈ శ్లోకం నుంచి 27 వ శ్లోకం వరకు శిఖరిణీ వృత్తం లో రచించారు .27 సంఖ్య నక్షత్రాలకు సంకేతం .అంటే కాల చక్ర స్వరూప దర్శనం చేయించారని భావించాలి .

2-      శ్రవణం –‘’దూరీ కృతాని దురితాని దురక్షరాణి-దౌర్భాగ్య దుఃఖ దురహంకృతి దుర్వ చాంసి

సారం త్వదీయ చరితం నితరాం పిబంతం –గౌరీశ  మామిహ సముద్ధర సత్కటాక్షైః’’

గౌరీశా !నా పాపాలు ,దుఖం దౌర్భాగ్యం  దురహంకారం తో వచ్చే చెడ్డమాటలు ,అన్నీ నీ దయ వలన దూరమై పోయాయి . నిత్యం నీ చరిత్రను పానం చేస్తున్న నన్ను ఉద్ధరించు .సంసార లంపటం నుంచి తరింప చేయి .

ఇక్కడ శివ చరిత్ర స్మరణ యిచ్చే ఫలితం చెప్పారు .శివ చరిత్ర గ్రోలితే లభించేది శివానంద లహరి అని ఆంతర్యం .

3-      కీర్తనం –‘’కదావా కైలాసే కనక మణి సౌధే సహ గణైః-వసన్ శంభో రగ్రే స్ఫుట ఘటిత మూర్ధాంజలి పుటః

విభో ,సాంబ స్వామిన్ పరమ శివ పాహీతి నిగదన్ –విధాత్రూణా౦ కల్పన్ క్షణ మివ వినేష్యామి సుఖతః ‘’అది కైలాసం లో బంగారు భవనం అందులో మణులు కూర్చబడి అందంగా ప్రకాశమానంగా ఉంది .పరమశివుడు ఆ భవనం లో ఉన్నాడు .ఆయన ముందు శిరస్సుతో అంజలి  ఘటిస్తూ ‘’ఓ విభో సాంబ సదాశివా పరమ శివా పాహి పాహి ‘’అంటూ బ్రహ్మ కల్ప కాలాలను క్షణ మాత్రం గా ఎపుడు గడుపుతానో కదా అని శంకర భాగవత్పాదులు ఆర్తిగా కీర్తిస్తున్నారు .

నిజానికి ఇదే శివానంద లహరి అంటే కైలాస వాస వాంఛ.శివ సన్నిధిలో ఒడలు మరచి పోవటం కీర్తనలో పరవశించటం .అంతకంటే జీవి కోరుకొనే ఉత్కృష్ట పదవి ఏదీ లేదని ఆంతర్యం .

4-స్మరణం –‘’నరత్వం దేవత్వం నగవన మృగత్వం మశకతా-పశుత్వం ,కీటత్వం భవతు విహగత్వాది జననం

సదా త్వత్పాదాబ్జ స్మరణ పరమానంద లహరీ –విహారాసక్తం చేద్ధృదయ మిహ కిం తేన వపుషా ‘’

పరమేశా !నేను మనిషిగా  దేవునిగా ,పశువుగా ,పురుగు గా ,పక్షిగా జన్మించినా సరే ,ఏ జన్మ లోనైనా నీ పాద పద్మాలను  స్మరించి పరమాన౦దాన్నిపొందుతూనే ఉండాలి .దానిలో నా హృదయం హాయిగా విహరించాలి .ఉపాధి అంటే దేహం ఏ రూపం లో ఉన్నా పరమేశ్వర పాదారవింద స్మరణ చేయాలని ఆంతర్యం .

5-పాద సేవనం –‘’నిత్యం యోగి మనస్సరోజ దళ సంచార క్షమస్త్వత్క్రమ-శ్స్శంభో ,తేన కథం కఠోర యమరాడ్వక్షః కవాట క్షతి –

రత్యంతం మృదులం త్వదంఘ్రి యుగళం హా మే మనశ్చింతయ-త్యేతల్లోచన గోచరం కురు విభో హస్తేన సంవాహయే ‘’

పశుపతీ ! అత్యంత కోమలమైన నీ పాదాలు అతి సున్నితాలు .యోగీశ్వరుల హృదయ పద్మాలపై సంచరించే కుసుమ కోమలాలు. అలాంటి నీపాదాలు అతి కఠినమైన తలుపు చక్కలాంటి యముని వక్షస్థలాన్నిఎలా తన్నగలిగాయి ? తన్ని అసలు కందిపోకుండా ఎలా తట్టు కో గలిగాయి? అని నా మనసు శంకిస్తోంది .నీ లలిత కోమల పాదాలు నాకు కనిపించేట్లు చేస్తే నీ బాధ ఉపశమింప జేయటానికి వాటిని నా చేతులతో  చక్కగా ఒత్తి సేవిస్తాను .ఆ అనుగ్రహం నాకు ప్రసాదించు .

  భక్తుడైన మార్కండేయుని ప్రాణాలు హరి౦చటానికి  యమ ధర్మ రాజు వస్తే శివుడు యముని వక్షస్థలాన్ని  పాదం తో తన్ని తగిలేశాడు .భక్త రక్షణకు పరమ శివుడు ఎంతటి బాధనైనా భరిస్తాడని ఆంతర్యం .

6-అర్చనం –‘’36 వ శ్లోకం –‘’భక్తో భక్తి గుణా వృతే –‘’దీన్ని గురించి ఇదివరకే చెప్పుకొన్నాం

7         దాస్యం –‘’కదావా త్వాం దృష్ట్వా గిరిశ తవ భవ్యా౦ఘ్రి యుగళం –గృహీత్వా హస్తాభ్యాం శిరశి నయనే వక్షసి వహన్

సమాశ్లిష్యాఘ్రాయ స్పుట జలజ గంధాన్ పరిమళా- నలభ్యాం బ్రహ్మాద్యై ర్ముద మనుభవిష్యామి హృదయే

గిరీశా శివా !నీ పవిత్ర పాదార వి౦దాలను నేను చేతులతో పట్టుకోవాలి . వాటిని నాశిరస్సు మీద పెట్టుకోవాలి .కళ్ళకు అద్దుకోవాలి. నా గుండెలమీద ఉంచుకోవాలి .వాటిని గట్టి గా నేను ఆలింగనం చేసుకోవాలి .నీపాద పద్మాల పరిమళాలను నేను  ఆఘ్రాణి౦చాలి  . ఇంతటి మహద్భాగ్యం  బ్రహ్మమొదలైన దేవతలకు కూడా లభించదు .అలాంటి నీ పాద సేవలో నేను బ్రహ్మానందం అనుభవించాలి .అంతటి పరమ సౌభాగ్యం నాకు ఎప్పుడు నువ్వు అనుగ్రహిస్తావో ?

  ఇందులో పరబ్రహ్మ చుట్టూ పరిభ్రమించాలానే ఆరాటం ఆవేదన  పరబ్రహ్మనై పోవాలన్న తపన  ఉండటం తో భక్తి పరాకాష్టకు చేరి ‘’అహం బ్రహ్మాస్మి ‘’ భావం కలుగుతుందని ఆంతర్యం .

8- సఖ్యం –‘’సారూప్యం తవ పూజనే శివ ,మహాదేవేతి సంకీర్తనే –సామీప్యం శివ భక్తి ధుర్య జనతా సాంగత్య సంభాషణే

సాలోక్యం చరాచరాత్మక తను ధ్యానే భవానీ పతే –సాయుజ్యం మమ సిద్ధ మత్ర భవతి స్వామిన్   ,కృతార్దోహం ‘’   

పరమశివా ! నిన్ను పూజిస్తూ సారూప్య ముక్తిని ,నిన్ను కీర్తించేటప్పుడుసామీప్యముక్తిని ,నీ భక్తుల స్నేహం తో  సంభాషణం తో సాలోక్య ముక్తిని ,కదలలేని పర్వతాదులలో నిన్ను దర్శించి ధ్యానం చేసి సాయుజ్య ముక్తిని ,పొందుతున్నాను .

  పూజ సేవ లలో ‘’సోహం భావేన పూజయేత్ ‘’అనే భావం ఉండాలని ఆంతర్యం అప్పుడే అభీస్ట సిద్ధి .

9-ఆత్మ నివేదనం –   ‘’కరస్థే హేమాద్రౌ గిరిశనికటస్థే ధన పతౌ –గృహస్థే స్వర్భూజామర సురభి చింతామణి గణై

శిరస్థే శీతాంశౌ  చరణ యుగళ స్థేఖిల శుభే –కమర్ధం దాస్యే హం భవతు భవదర్ధం మమ మనః’’

నువ్వు ఉండేది వెండి కొండ మీద నీకు అందుబాటులో  బంగారు కొండమీద . నీ కనుసన్నలలో కుబేరుడు ,కామధేనువు  కల్ప వృక్షం ,చింతామణి అన్నీ జ్వాజ్వల్యంగా ప్రకాశిస్తున్నాయి .నీ శిరసుపై వెన్నెల వెదజల్లే చంద్ర వంక  . సమస్త సన్మంగళాలునీ పాద సమీపం లో ఉన్నాయి .ఇక నీకు ఇచ్చేందుకు నా దగ్గర ఏముంది స్వామీ . అయితే నా మనసు ఒక్కటే ఉంది.దాన్ని మాత్రం నీకు ఇవ్వగలను .తీసుకొని అనుగ్రహించు అంటూ ఆత్మ నివేదన తెలియ జేశారు శ్రీ శంకర భగవత్పాదులు.

చివరగా –‘’త్వత్పాదాంబుజ మర్చయామి పరమం త్వాం చింతయా మ్యన్వహం –

త్వామీశం శరణం వ్రజామి వచసా త్వామేవ యాచే విభో

దీక్షాం మే దిశ చాక్షుషీం స కరుణాం దివ్యైశ్చిరంప్రార్దితాం

శంభో  లోక గురో మదీయ మనస స్సౌఖ్యోప దేశం కురు ‘’

లోకానికే గురువైన సాంబశివా .నీ పాదాలనే అర్చిస్తున్నా.నిన్నే మనసులో ఎప్పుడూ చింతిస్తున్నా.నిన్నే శరణు వేడుతున్నా .వాక్కులతో నిన్నే స్తుతిస్తున్నా .దేవతలే నీ కరుణ కోసం నిరీక్షిస్తూ ఉంటారు .వారిపై చూపే కారుణ్యం నాపై కూడా చూపించు .నేను చిన్నవాడిని అనుకో వద్దు  మనసుకు సౌఖ్యం కలిగే ఉపదేశాన్నివ్వు .నువ్వు లోక గురుడవు .కనుక నాకూ గురువు నీవే .నేను తరించే శాశ్వత  సందేశాన్నిఇచ్చి ,శాశ్వత సుఖాన్ని  ప్రసాదించు .

పరబ్రహ్మ జ్ఞానోపదేశం చేసి శాశ్వత ముక్తిని ప్రసాదించమని ఆంతర్యం .

 సశేషం

 మీ-గబ్బిట దుర్గా ప్రసాద్ -24-10-17-ఉయ్యూరు    

శ్రీ శంకరుల ‘’శివానంద లహరి ‘’ఆంతర్యం -4

భక్తి ధేనువు ,రక్షా అని చెప్పిన శంకరులే భక్తిఒక తీగ ,ఒక సంకెల ,ఒక త్రాడు ,ఒక పంట అని కూడా చెప్పారు .

‘’ఆనందామృత పూరితా ,హర పదాంభోజా లవాలోద్యతా –స్థైర్యోపఘ్నముపేత్య ,భక్తిలతికా ,శాఖోపశాఖాన్వితా

ఉచ్ఛైః  మానస కాయమాన పటలీ మాక్రమ్య నిష్కల్మషా-నిత్యాభీష్ట ఫలప్రదా  భవతు మే సత్కర్మ సంవర్ధితా ‘’

భక్తి ఒక తీగ .అది ఆనందం అనే అమృతం తో ని౦పబడింది . అది పర మేశ్వరుని పాద పద్మాలు అనే పాదులో పుట్టి పెరిగింది .స్థిర చిత్తం అనే గట్టి కంప ను పట్టుకొని ,చిక్కగా అల్లుకు పోయి ,శాఖోప శాఖలుగా పెరిగి పోయింది .స్వచ్ఛ ఉన్నత మైన మనస్సు అనే పందిరిని ఆక్రమించింది .చీడ పీడలు లేకుండా పరమేశ్వర చింతనం తో ఏపుగా పెరిగి,కోరిన కోరికలను ప్రతి రోజూ ఇస్తోంది .పుణ్య కర్మలతో ఈ తీగ వృద్ధి చెందుతోంది .అంటే భక్తిఒక తీగగా ఉండి పుణ్యాలను సముపార్జించి పెడుతోంది అని ఆంతర్యం .భక్తితీగ పాకుతూ పోయి శిఖరాగ్రం చేరి కైలాస వాసి ,వాసిని అయిన ఉమా మహేశ్వరుల సన్నిధానానికి చేర్చి ,ఇక వదిలి పెట్టకుండా అక్కడే పరమేశ్వర పాద పద్మ లగ్నమై ఉండి పోతుంది అని ఆంతర్యం .

భక్తిఒక శ్రు౦ఖల అన్నారు కదా –అదెట్లాగో చూద్దాం –

‘’ధైర్యా౦కుశేన  నిభ్రుతం –రభసాదాకృష్య భక్తి శ్రుంఖలయా

పురహర ,చరణాలానే-హృదయ మదేభం బధాన చిద్యంత్రైః’’

భవానీశంకరా !నా మనసు ఒక మదపు టేనుగు .అయినా నీ చేతిలో అంకుశం ఉందికదా అనేధైర్యం తో ఉన్నాను .నన్ను నీకు బంధించుకోవాలను కొంటే  భక్తిఅనే గొలుసు ఉండనే ఉంది .మరి కట్టెయ్య టానికి ఒక గుంజకాని స్థంభం కాని కావాల౦టావా –ఉందిగా నీ పాదం.  అదే కట్టు గొయ్య .బంధించటానికి యంత్రం ఏదీ అంటావా ? అదే జ్ఞానం అనే యంత్రం .అంటే మనం భగవంతునికి జ్ఞాన యంత్రం తో బంధింపబడాలి . మదం ఉన్న ఇభం అంటే మదేభం అంటే మదించిన ఏనుగు .దీన్ని అంటే మదహంకారాన్ని తొలగించుకోవాలి అంటే భక్తిమాత్రమే సాధనం అని ఆంతర్యం .

దీని తర్వాత శ్లోకం లో కూడా మనసు మదపు టేనుగు అని దాన్ని కట్టెయ్యటానికి భక్తిత్రాడుగా ఉపయోగ పడుతుందనీ చెప్పారు –

‘’ప్రచరత్న భితః ప్రగల్భ వృత్త్యా –మదవా నేష మనః కరీ గరీయాన్

పరిగృహ్య నయేన భక్తిరజ్జ్వా –పరమ స్థాణుపదం దృఢం నయాముమ్’’

దేవాదిదేవా సర్వేశ్వరా !మదపు టేనుగు లాంటి నామనసు కు హద్దూ పొద్దూ లేదు .విశ్రు౦ఖలంగా స్వేచ్చా విహారం చేస్తోంది .నాలో భక్తికలిగించి ఆ భక్తిఅనే త్రాడుతో స్థిరమైన నీ పాదానికి కట్టేసెయ్యి .

అస్థిరమైన తమోగుణానికి ఏనుగు ప్రతి రూపం .కామ క్రోధాలకు చిహ్నం .ఇంతటి దురహ౦కారమైన నా మనసుకు నీతి బోధించి నీ పాదానికి కట్టేయ్యి. శివ పాదం అంటే స్థాణు పదం .దాన్ని పొందించు .అది మోక్షదాయకం అని, అందరూ దానినే ఆశ్రయించాలని శంకరుల ఆంతర్యం .

భక్తి త్రాడు మనసు కలశం అని మరో శ్లోకంలో అన్నారు –

‘’భక్తో భక్తిగుణావృతే ముద మృతాపూర్ణే ప్రసన్నే మనః –కుంభే సాంబ తవాంఘ్రిపల్లవ యుగం సంస్థాప్య సంవిత్రులం

సత్వం మంత్ర ముదీరియన్ నిజ శరీరా గార శుద్ధిం వహన్ –పుణ్యాహం ప్రకటీ  కరోమి రుచిరం కళ్యాణ మాపాదయన్ ‘’

సాంబ శివా !నేను మోక్షం అనే కల్యాణం చేసుకో దలచాను .దీనికి ముందు స్వస్తి పుణ్యాహవాచనం చేసుకోవాలి కదా .దాన్ని ప్రారంభిస్తూ  నా మనసును కలశం గా చేసి ,దాన్ని సంతోషం అనే అమృత జలం తో ని౦పు తున్నాను .ఇక నాకు వేరే ఆలోచనలే లేవు .భక్తిని త్రాడుగా అంటే సూత్రంగా ఆ కలశానికి చుడుతున్నా .పరమేశ్వరుని పాదాలను   మామిడి చిగుళ్ళు గా ఆ కలశం లో ఉంచుతున్నా .ఆహ౦కారం బ్రద్దలవ్వాలంటే జ్ఞానం కావాలి కదా –కనుక జ్ఞానాన్నికొబ్బరి కాయగా ఉంచుతున్నా .మరి మంత్రంఅంటావా ‘’ఓం నమశ్శివాయ ‘’అనే ప్రణవ శివ పంచాక్షరి మంత్రం  ఉండనే ఉందిగా –ఆ మంత్రాన్ని జపిస్తున్నా. వీటన్నిటితో  నా దేహం  అనే ఇంటిని ,అన్తఃకరణాలను శుభ్రం చేసి పవిత్ర వంతం చెయ్యి .ఈ ప్రక్రియ ఫలం అంతా నీకే సమర్పిస్తున్నా .దయతో గ్రహించు .ఇదే నాజీవితం లో జరిగే ఏకైక శాశ్వత మోక్ష కళ్యాణ ఘటన .

ఈ విధంగా భక్తిఅనే త్రాడుతో ప్రతి ఒక్కరూ మోక్ష కల్యాణాన్ని జరుపుకోవాలని ఆంతర్యం .

చివరగా భక్తి ఒక పంట గా ఎలా చెప్పారో చూద్దాం –

‘’ధీ యంత్రేణ,వచో ఘటేనకవితా కుల్యోప కుల్యాక్రమై –రానీతైశ్చ,సదా శివస్య ,చరితాంభో రాశి దివ్యామృతైః

హృత్కేదార యుతాశ్చ  భక్తి  కలమా స్సాఫల్య మాతన్వతే –దుర్భిక్షా న్మమ సేవకస్య భగవన్విశ్వేశ భీతిః కుతః’’

శివా ! నా హృదయం ఒక పొలం . నీ చరిత్ర ఒక సముద్రం .కాని అందులోని నీరు ఉప్పునీరుకాదు –దివ్యామృతజలం.ఈ అమృత జలాలను కవితలు అనే పంట కాలువలద్వారా ప్రవహింప జేయాలి .వాక్కులు అనే కడవలతో ఆజలాన్ని నింపాలి .బుద్ధి అనే యంత్రం తో మోటబావిలో  లాగా పైకి తోడాలి  .అలా తోడిన అమృత ధారలను నా హృదయం లో నింపితే భక్తిఅనే పంటలు పండుతాయి .

జన జీవనానికి ఆధారం పంట .అలాగే అద్వైత జీవితానికి ఆధారం భక్తి.మనసు శివ జ్ఞానం తో నిండితే భయం అనేది ఉండదు .అద్వైత సిద్ధి కలుగుతుంది , తరి౦ప జేయటానికి భక్తిమార్గం ఉత్క్రుస్టమైనది అని శ్రీ శంకరుల ఆంతర్యం .అందుకే’’ భక్తిరేవగరీయసి ‘’అన్నారు శంకరాచార్య .

సశేషం

నాగుల చవితి శుభా కాంక్షలతో

మీ- గబ్బిట దుర్గాప్రసాద్ -23-10-17- ఉయ్యూరు

శ్రీ శంకరుల ‘’శివానంద లహరి ‘’ఆంతర్యం -3

‘’అంకోలం నిజ బీజ సంతతి రాయస్కా౦తో పలం సూచికా ,-సాధ్వీ నైజవిభుం క్షితి రుహం సింధుః సరిద్వల్లభం

ప్రాప్నో తీహ యధా తధా పశుపతేః పాదార వింద ద్వయం –చేతో వ్రుత్తి రుపేత్య తిస్టతిసదా సా భక్తిరిత్యుచ్యతే ‘’

ఇందులో జీవాత్మ ,పరమాత్మలస్థితి వర్ణన ఉంది.జీవుడు పరమాత్మను చేరాలి అంటే వ్యాజ భక్తి వలన ,నిర్వ్యాజ భక్తి వలన చేరాలి . ఇందులో నిర్వ్యాజ భక్తి శ్రేస్టం . శివ సాయుజ్యానికి ఇదే మంచి మార్గం .

‘’అంకోలం’’ అంటే ఊడుగు(బూరుగు చెట్టు ) చెట్టు గింజలు . దాని కాయ పక్వమై పగలగానే  గింజలుచాలా తేలిక కనుక  గాలిలో యెగిరిపోతూ ఉంటాయి . మేఘం  ఉరమగానే భయం తో వచ్చి చెట్టు చుట్టూ పడిపోతాయి  . గుండు సూది బలమైన  అయస్కాంతానికి ఇట్టే ఆకర్షింప బడిఅతుక్కు పోతుంది .  .పతివ్రత ఎక్కడున్నా భర్తనే ప్రేమతో ఆరాధిస్తుంది .తీగ భూమిపైకి పాకి చెట్టు లాంటి ఆధారం దొరకగానే దానికేగట్టిగా  అల్లుకు పోతుంది .నదులు ప్రవహించి ప్రవహించి అలసి సొలసి చివరికి సముద్రం లో కలుస్తాయి .ఇవన్నీ ప్రకృతి సిద్ధమైన ధర్మాలు .అలాగే మానవుని చిత్త వృత్తులన్నీ  భగవంతుని పాదర వి౦దాలపై లగ్నం అవటాన్ని భక్తి అంటారు .ఈ భక్తి కలగటానికి కారణం భయం .కనుక ఇది వ్యాజ భక్తి . వ్యాజం అంటే నెపం .కాని నది సముద్రం లో కలవటం లో భక్తి పరా కాష్టకు చేరుతుంది .ఎందుకంటె ఇక్కడ నది సముద్రం లో కలవగానే దాని అస్తిత్వాన్ని కోల్పోతుంది .తానె సముద్రం అవుతుంది .దీనికి కారణం, నెపం ఉండవు.  కనుక ఇది నిర్వ్యాజ భక్తి  .మనం కూడా పరమేశ్వరుని చేరితే మన అస్తిత్వం ఇక శూన్యమే అయి మనం పరమాత్మ స్వరూపులమే అవుతాం .ఇంతటి అంతరార్ధం పై శ్లోకం లో ఇమిడ్చారు శ్రీ శంకరులు .

మరి భక్తి మనకేమైనా చేస్తుందా ?చేస్తుంది .ఇది చెప్పటానికే మరొక శ్లోకం రాశారు .

‘’ఆనదాశ్రుభిరాత నోతిపులకం ,నైర్మల్య తశ్చాదనం –వాచా శంఖ ముఖ స్థితైః చ జఠరాం

రుద్రాక్షైః భసితేవ దేవ ! వపుషోరక్షాం భవద్భావనా –పర్యం కే వినివేశ్య భక్తి జననీ భక్తార్భకం రక్షతి ‘’

భక్టి  కూడా మనకు శివ మంత్రాన్ని ఉపదేశించి ,భస్మంతో రక్ష కలిగించి, అభయ ప్రదాత్రి అవుతుంది.  అర్భకు లైన భక్తులను రక్షించే దయామయి భక్తి . అని భక్తి యొక్క పరమ పూజ్యత్వాన్ని స్పష్టంగా తెలియ జేశారు .భక్తికి అసాధ్యం అంటూ ఏదీ లేదు .

‘’ఆకీర్ణేనఖరాజి కాంతి విభవై రుద్యత్సుధా వైభవైః-రాధౌతే పి చ పద్మ రాగ లలితే హంస వ్రజై రాశ్రితే

నిత్యం భక్తివధూ గణైశ్చ రహసి స్వేచ్చావిహారం కురు –స్థిత్వా మానస రాజహంస  గిరిజా నాధా౦ఘ్రి సౌధాంతరే’’

శివుని పాద పద్మాలు ఒక భవనం లాంటిది .అది పరమ శివుని కాలి  గోళ్ళ కాంతితో ప్రకాశిస్తుంది .చంద్రుని అమృత కిరణాల వైభవం తో కడగ బడుతుంది. కనుక అత్యంత స్వచ్చంగా తెల్లగా ప్రకాశిస్తుంది . పద్మ రాగ మణుల తో కలిసి ఎర్రగా  లలితంగా శోభిస్తుంది . దేహ జ్ఞానం లేని పరమ హంసలకు అది ఆశ్రయ భూమి .ఆ సుందర రమ్య హర్మ్యం లోకి    భక్తిఅనే కొత్త పెళ్లి కూతురుతో ప్రవేశించి అన్నీ మరచి హాయిగా విహరి౦చ వే ఓ మనసా అని భావం .అంటే భక్తిని భార్యగా భావించమని ఆంతర్యం .

భక్తి ధేనువు అంటూ మరో శ్లోకమూ చెప్పారు –

‘’అమిత ముద మమృతం ముహు ర్దుహంతీ-విమల భవత్పద గోష్ట మా వసంతీం

సదయ పశుపతే సుపుణ్య పాకాం-మమ పరిపాలయ ,భక్తీ ధేను మేకాం’’

నీ పాదాలపై ఉన్న భక్తి గోవు లాంటిది .నీ పరమ పవిత్రమైన నిర్మలమైన పాదాలు అనే గోశాలలో సురక్షితంగా ఉంటోంది   . ఎన్నో జన్మల పుణ్యం వలన అది నాకు లభించింది .ఈ భక్తి గోమాత నాకు మాటి మాటికీ ఆనందామృత౦  అనే శుద్ధమైన క్షీరాన్ని హాయిగా పిండుకోనిస్తోంది. నన్నూ  ఈ భక్తి ధేనువు ను సదా రక్షించు.

గడ్డి తిని ఆవు అమృతం లాంటి పాలు ఇస్తుంది .గోవు నుండి వచ్చే ప్రతి ద్రవ్యమూ పవిత్రమైనదే .అలాగే భక్తి కూడా నిరంతరం స్రవించే తైలధార  .ఇది పరమాత్మ పాదాలు అనే  గోశాలలో సురక్షితంగా ఉంది .నన్నూ  ఆ భక్తి ధేనువును నిరంతరం రక్షించి కాపాడి,కైవల్యం ప్రసాదించు అని ఆంతర్యం .భక్తిమామూలు గోవు కాదు .కోరికలు తీర్చే కామ ధేనువు  అన్నీ అనుగ్రహించే చింతామణి ,కైవల్య  సంధాయిని అని శంకరుల ఆంతర్యం .

సశేషం

మీ- గబ్బిట దుర్గా ప్రసాద్ -22-10-17- ఉయ్యూరు

—

సరసభారతి రెండు గ్రంథాల ఆవిష్కరణ

సాహితీ బంధువులకు శుభకామనలు -నేను రాసి ,సరసభారతి ముద్రిస్తున్న రెండు అమూల్య గ్రంధాల ఆవిష్కరణ సభ గుంటూరు జిల్లా రేపల్లె లో 24-12-17 ఆదివారం మధ్యాహ్నం 3 గంటలకు జరుగుతుంది . దీనితోపాటు ప్రసిద్ధులైన 10 మంది కవులచే కవి సమ్మేళనం కూడా నిర్వహింపబడుతుంది . విశిష్టమైన అతిధులు పాల్గొనే ఈ కార్యక్రమానికి సాహిత్య సంగీత ప్రియులందరికీ ఆహ్వానం . పాల్గొని జయ ప్రదం చేయ ప్రార్ధన .

ఆవిష్కరింపబడే గ్రంధాలు

1-ఆధునిక ప్రపంచ నిర్మాతలు -జీవితాలలో చీకటి వెలుగులు

తమ సృజనాత్మక ప్రతిభతో ప్రపంచ ప్రగతిని మార్చి  మలుపు త్రిప్పి ,ఆధునిక ప్రపంచానికి దారులు వేసిన  వేదాంతం  తత్వశాస్త్రం ,కవిత్వం ,నాటకం నవల  సంగీతం నాట్యం సినిమా ,శిల్పం చిత్రకళ మొదలైన వాటిలో లబ్ధ ప్రతిష్టు లైన 91 మంది మహానుభావుల జీవిత చిత్రణ .

అంకితం – స్టాటిస్టిక్స్ లో ప్రపంచ ప్రఖ్యాతులైన గణిత శాస్త్ర వేత్త కీ శే . డా శ్రీ పరుచూరి రామకృష్ణయ్య (అమెరికా )గారికి

ప్రాయోజకులు -సరసభారతి ఆప్తులు  శ్రీ మైనేని గోపాలకృష్ణ  శ్రీమతి సత్యవతి దంపతులు (అమెరికా )

—                        (పరుచూరి వారికి బావగారు ,సోదరి )

2- గీర్వాణ కవుల కవితా గీర్వాణం -3 -మూడవ భాగం

460 మంది సంస్కృత కవుల జీవితాలు ,కవిత్వం పై వెలువడుతున్నఅపూర్వ  గ్రంధం

అంకితం – దయార్ద్ర హృదయులైన హృద్రోగ నిపుణులు శ్రీ డా .బండారు రాధా కృష్ణ మూర్తి  ,శ్రీమతి డా  సులోచన(అమెరికా ) దంపతులకు

ప్రాయోజకులు – విద్యాసంపన్నులు  వితరణ శీలి దేశభక్తి పరాయణులు

ప్రొఫెసర్ యల్లాప్రగడ రామమోహన రావు గారు(అమెరికా )

(మూర్తిగారి  వారి బావమరిది ,సులోచనగారి అన్నగారు )

ముందుమాటలు -అవధాన సరస్వతి డా శ్రీ పాపపర్తి శ్యామలానంద ప్రసాద్ గారు

మనవి -మూడవ గీర్వాణం లో స్థానం పొందిన గీర్వాణకవులు 1-డా శ్రీ గబ్బిట ఆంజనేయ శాస్త్రి 2- డా శ్రీ గబ్బిట జయమాణిక్య శాస్త్రి 3- డా శ్రీ గబ్బిట శ్రీనివాస శాస్త్రి  4- డా శ్రీ నిష్ఠల సుబ్రహ్మణ్య శాస్త్రి 5- శ్రీపరాశరం భావనారాయణా చార్యులు  6-డా శ్రీ వెంపటి కుటుంబ శాస్స్త్రి 7-డా శ్రీమతి అయ్యగారి ప్రభావతీదేవి 8-డా శ్రీ ఇనగంటి ఉమారావు 9-డా శ్రీ కె హయగ్రీవ శర్మ మొదలైన వారిని తప్పక ఈ కార్యక్రమం లో పాల్గొని వేదికను సుసంపన్నం చేయవలసినదిగా ప్రార్ధిస్తున్నాను

” వేదిక ”తో సహా అన్ని వివరాలతో కూడిన ఆహ్వాన పత్రం నవంబర్ రెండవ వారం లో అందజేస్తాం .

గబ్బిట దుర్గా ప్రసాద్ -21-10-17 -ఉయ్యూరు

21-10-17 శనివారం మా ఇంట్లో మా మద్రాస్ మేనల్లుడు శ్రీనివాస్ ,అతని కూతురు శాలిని

శ్రీ శంకరుల ‘’శివానంద లహరి ‘’ఆంతర్యం -2

‘’ఆద్యా యామిత తేజసే శ్రుతిపదైః వేద్యాయ సాధ్యాయతే –విద్యాయానంద మయాత్మనే ,త్రిజతస్సరంక్షణోద్యోగినే –

ధ్యేయాయాఖిల యోగిభిః సుర గణైః గేయాయ మాయావినే –సమ్యక్ తాండవ సంభ్రమాయ జటినే సేయం నతిఃశంభవే ‘’

సృష్టికి పూర్వమే ఉన్న పరబ్రహ్మ ప్రళయ కాలం లోనూ నిశ్చలంగా ఉండే మహా జ్యోతిర్లింగ స్వరూపుడు కనుక ఆది ,అంతం లేనివాడు .ఆయన తేజస్సు సాటిలేనిది .వేద వాక్యాలవలననే ఆయన తెలియ బడతాడు . భక్తులను అనుగ్రహించటానికి మాత్రమే లింగ రూపం లో దర్శన మిస్తాడు .జ్ఞానానంద స్వరూపుడు ,అన్ని లోకాల సంరక్షణ బాధ్యత ఉన్నవాడు .యోగి పుంగవుల ధ్యానానికి ఆయనే ధ్యేయం .దేవతల చేత కీర్తింపబడే  మాయా మయుడు .సాయం వేళ తాండవ నృత్యానికి ఇష్టపడేవాడు .అటు వంటి శంకరునికి నమస్కారం .ఈ వర్ణన అంతా నిర్గుణ పర బ్రహ్మ వర్ణనే .మరో శ్లోకం లో   సగుణ నిర్గుణ పరబ్రహ్మను  వర్ణించారు శ్రీ శంకరులు –అ వైభవం చూద్దాం –

‘’త్రయీ వేద్యం ,హృద్యం ,త్రిపుర హర మాద్యం త్రినయనం –జటా భారోదారం ,చలదురగ హారం ,మృగధరం

మహా దేవం ,దేవం ,మయి సదయ భావం ,పశుపతిం –చిదానందం ,సాంబం,శివ ,మతి విడంబం ,హృది భజే ‘’

మూడు వేదాలచే తెలియ బడే వాడు ,మనోహర రూపుడు ,త్రిపురాలను అంటే స్థూల, సూక్ష్మ ,కారణ శరీరాలను సంహారం చేసేవాడు ,లేక త్రిపురాసురుడు అనే రాక్షసుని సంహరించినవాడు ,ఆది పురుషుడు ,మూడుకన్నులున్న జటాధారి,గంభీరుడు ,కదులుతున్న సర్పాల ఆభారణాలు కలవాడు ,మృగం అంటే జింక ను చేతిలో ధరించినవాడు ,దేవ దేవుడు ,కరుణాళువు,అజ్ఞానాన్ని నిర్మూలించే జ్ఞాన స్వరూపుడు ,అసలు జ్ఞానానికే ఆధారమైన వాడు ,లోక క్షేమం కోసం కాలానికి తగిన రూపాలు ధరించేవాడు ,సాంబుడు అంటే –సా –అంబ -ఉమాదేవితో కూడిన వాడుఅయిన పరబ్రహ్మను నా మనసులో ధ్యానిస్తాను అని భావం .ఇందులోని పదాలు నిర్గుణ పరబ్రహ్మను తెలియ జేసే సార్ధకమైన పదాలు .నిర్గుణ పరబ్రహ్మను చేరాలి అంటే ముందుగా సగుణ పరబ్రహ్మపై సాధన చేయాలి . త్రయీ నయనం మొదలైనవి  సగుణ పరబ్రహ్మను తెలియ జేస్తాయి .కనుక ఈ శ్లోకం లో  సగుణ ,నిర్గుణ పరబ్రహ్మ తత్త్వం అంతా కళ్ళ ముందు ఉంచారు భగవత్పాదులు .సగుణం అంటే మనలాగా శరీర ధారణ కలవాడు అలంకారాలు,అహంకారాలు ఉండి   భార్యాపిల్లలతో ఉండేవాడు .నిర్గుణ అంటే వీటికి అతీతమైనవాడు అని భావం .

సగుణ పరబ్రహ్మ తత్వాన్ని చెప్పేమరో శ్లోకం –

‘’కరలగ్న మృగః కరీంద్ర భంగో ,ఘన శార్దూల విఖండనోస్త జంతుః-గిరిశో ,విశదాక్రుతి శ్చ చేతః కుహరే పంచముఖోస్తి మే కుతో భీః’’

చేతిలో జింక కలిగి గజాసుర సంహారం చేసిన వాడు ,వ్యాఘ్రాసురుని చంపినవాడు ,పర్వతాలలో నివాసం ఉండేవాడు ,స్వచ్చమైన అతి తెల్లని రూపం ఉన్నవాడు ,పంచ ముఖ అంటే తత్పురుష  సద్యోజాత వామదేవ ,అఘోర ,ఈశాన అనే ముఖ స్వరూపుడు ,ఊర్ధ్వంగా మరొక ముఖం ఉన్నవాడు అంటే విశ్వ వ్యాప్తుడైన పరమాత్మ నా మనస్సులో  .ఉన్నాడు.కనుక నాకింక భయం ఎందుకు ?’’చేతః ‘’పదం ఆయన మోక్ష ప్రదాత అని తెలియ జేసేది .ఆశలు నశిస్తే చేతస్సు నశిస్తుంది .చేతస్సు నశిస్తే వచ్చేది మోక్షమే .చిత్తం నాశనమవటమే ముక్తి అని అంతర్యం .

సశేషం

మీ –గబ్బిట దుర్గా ప్రసాద్ -21-10-17 –ఉయ్యూరు

శ్రీ శంకరుల ‘’శివానంద లహరి ‘’ఆంతర్యం -1

శివానంద లహరి అనటం లోనే గొప్ప ఆంతర్యం ఉంది .శివఅంటే శివుని యొక్క ,  శివా అంటే అమ్మవారి యొక్క ఆనంద ప్రవాహం అని భావం . అంటే అయ్యగారి ,అమ్మగారి ఆనంద రస ప్రవాహం అన్నమాట . దాన్ని చదువుతుంటే మనం ఆ ఆనందాన్ని సంపూర్ణంగా అనుభవిస్తామని అర్ధం .’’గుహాయాం గేహేవా బహిరపి ‘’అనే శ్లోకం లో ఎవడు తన అంతః కరణాన్నిసమర్పిస్తాడో వాడు పరమ యోగి అన్నారు శంకరులు .కీటకం అంటే పురుగు తాను మట్టి గూడులో ఉండి ,తను  తుమ్మెదగా  మారాలని మనసా వాచా కర్మణా కోరుకొంటుంది ,ఉవ్విళ్ళూరు తుంది . ఇలా తలచి తలచి చివరికి భ్రమరం గా అంటే తుమ్మెద గా మారుతుంది .దీనినే భ్రమర కీటక న్యాయం అంటారు .అసలు ఇందులో ఒక  తమాషా ఉంది .కీటకాన్ని తెచ్చి మట్టి గూడులో పెట్టేది భ్రమరమే .పెట్టి ,దాని చుట్టూ ధ్వని చేస్తూ నిరంతరం తిరుగుతూ ఉంటుంది .లోపలి కీటకం ఆశబ్దం వింటూ తానూ భ్రమరం కావాలని తహతహ లాడుతుంది .అది తాను కీటకం అనే స్ప్రుహనే కోల్పోతుంది .అప్పుడు చివరికి కీటకం ఆ భ్రమర నాదం లో లీనమై పోయి భ్రమరం గా మారుతుంది .కనుక మన సర్వ దేహ ఇంద్రియాలను కీటకంలాగా సర్వ సర్పణ చేస్తే ,అదే ధ్యాసలో ఉంటే పరమాత్మగా మారుతాం ,ఆయనలో లీనమైపోతాం .ఈ విషయాన్నే ఆది  శంకరులు మరో శ్లోకం లో

‘’ఆత్మాత్వం గిరిజా మతిః,పరిజనాః,ప్రాణాః,శరీరం ,గృహం –పూజాతే విషయోప భోగ రచనా ,నిద్రా సమాధిస్థితిః

సంచారః పదయోః ప్రదక్షిణ విధిః స్తోత్రాణి సర్వాగిరః –యద్యత్కర్మకరోమి తత్తదధికం శంభో తవారాధనం ‘’  అన్నారు

‘’నువ్వే నా ఆత్మ. ,పార్వతీ దేవి నాబుద్ధి .నా పంచ ప్రాణాలు నీ సేవకులు అంటే పరిజనాలు .నాశరీరమే నీ ఆలయం .విషయ సుఖాల కోసం నేను చేసే పనులన్నీ నీ పూజలే .నేను పోయే నిద్ర నీలో తదేకంగా పొందే సమాధి స్థితి .నాపాదాలు చేసే నడక అంతా నీకు చేసే ప్రదక్షిణాలు .నేను మాట్లాడే మాటలన్నీ నీ స్తోత్రాలే .మహేశ్వరా ! నేను చేసే ప్రతి చర్యా నీ ఆరాధనే అనుకొని  స్వీకరించు ‘’అంటూ మనలోని 24 తత్వాలూ ఈశ్వరార్పణం గా చేస్తే ,మనలోని ఇంద్రియ లోలత్వం అంటే వ్యామోహం తొలగి మన జీవాత్మ పరమాత్మలో లీనమవుతుంది అని చెప్పారు .అప్పుడు మనకు ,పరమాత్మకు భేదం ఉండదు అంటే అద్వైత స్థితి పొందుతాం .జీవన్ముముక్తులం అవుతాం అని శంకరుల ఆంతర్యం .

మరొక శ్లోకం లో –‘’నిత్యాయ త్రిగుణాత్మనే పురజితే కాత్యాయనీ శ్రేయసే –సత్యాయాది కుటుంబినే ,ముని మనః ప్రత్యక్ష చిన్మూర్తయే

మాయా సృస్ట జగత్రయాయ ,సకలామ్నాయాంత సంచారిణే-సాయం తాండవ సంభ్రమాయ జటినే సేయం నతిః శంభవే’’అని స్తుతించారు .ఈ జగత్తుకు ఆధారం కారణ భూతుడు అయిన పరబ్రహ్మ నిత్యుడు అంటే ఎప్పుడూ ఉండేవాడు .అనగా సృష్టి లయ కాలం లోనూ ఆయన ఉంటాడు .ఆయన త్రిగుణాత్ముడు అంటే స్థూల ,సూక్ష్మ  ,కారణ శరీరాలను జయించి  అంటే వాటికి లొంగకుండా ,నాలుగవది అయిన స్వస్వరూప ఆనందం లో వెలిగి పోతూ ఉంటాడు . పార్వతీ దేవి తపస్సుకు ఆయన ఫల స్వరూపుడు .అన్నికాలాలలో ఉండే సత్య స్వరూపుడు . భక్తులను అనుగ్రహించటం కోసం ఆది కుటుంబి గా అవతరించి పార్వతీ పరమేశ్వరులు గా ఆది దంపతులై అభీష్ట సిద్ధి కలిగిస్తున్నారు . మహర్షుల అంతఃకరణాలలో  అనగా మనస్సులలో మాత్రమే కనిపించే జ్ఞాన స్వరూపుడు .మాయ అనే తన శక్తితో మూడు లోకాలను సృష్టించాడు .అన్ని వేదాలలో ,వేదాంతాలలో సంచరించే బ్రాహ్మీ మయ మూర్తి ఆయన  . ప్రదోష కాలం అంటే సాయంకాల సంధ్య వేళ తాండవ నృత్యం చేసే జటాజూట దారి  .అలాంటి శుభాలనిచ్చే శివునికి నమస్కారం అని భావం .ఇందులో ప్రయోగించిన పదాలన్నీ అర్ధ వంతమైనవే .పరబ్రహ్మ తత్వాన్ని తెలియ జెప్పే పదాలే .

నిర్గుణ ,సగుణ పరబ్రహ్మ స్వరూపాలను శంకరాచార్య ఎలా వర్ణించారో తర్వాత తెలుసుకొందాం .

సశేషం

మీ- గబ్బిట దుర్గా ప్రసాద్ -20-10-17- ఉయ్యూరు

—

20-10-17 శుక్రవారం నుండి ప్రారంభమవుతున్న పవిత్ర కార్తీక మాస శుభాకాంక్షలు –

ప్రతి సంవత్సరం లాగే ఈ  కార్తీకమాసం లో ధారావాహికగా ఏమి రాయాలో అని ఆలోచిస్తుంటే  మేము అమెరికా లో ఉన్నప్పుడు  ప్రముఖ సంస్కృతాంధ్ర విద్యావేత్త బహు గ్రంధకర్త   ఆత్మీయ మిత్రుడు శ్రీ రంగా వఝల మురళీ ధరరావు గారు ఆధరంగా  పంపిన ”శివానంద లహరి ఆంతర్యం ”ఇవాళే దృష్టిన పడింది  ఆయన చాలా లోతుగా దాన్ని చర్చించారు .నేను మాత్రం మాయాబజార్ సినిమాలో వంగర చెప్పినట్లు ”శాస్త్రం నిష్కర్ష గా కర్కశంగా చెబుతుంది మనం సౌమ్యంగా దాని సారాంశమే గ్రహించాలి  ”అన్నట్లు అందులోని ముఖ్య విశేషాలను ”శ్రీ శంకరుల శివానందలహరి ఆంతర్యం ”గా ధారావాహికం గా రేపటి నుండి  అంద  జేస్తున్నాను -దుర్గాప్రసాద్ 

—

మనవి మాటలు మూడు

మనవి-1-నేను రచించి సరసభారతి ప్రచురించిన  ‘’గీర్వాణకవుల కవితా గీర్వాణం -2 రెండవ భాగం’’ఆవిష్కరణ సందర్భంగా ‘’గీర్వాణ భాషా వైభవం ‘’శీర్షికతో 4-12-2016 న  నిర్వహించిన” పద్య కవి సమ్మేళనం” లోని కవితలను ‘’గీర్వాణ కవుల కవితా గీర్వాణం -3 మూడవ భాగం’’ లో చివర” అనుబంధం”గా  చేర్చి ముద్రిస్తున్నామని ., .కవులు తమ అమూల్య భావాలను పద్య సుమ మాలగా రూపొందించి గీర్వాణ భాషా సరస్వతి కి అమూల్యా భరణం గా సమర్పించారు . వారందరికీ సరసభారతి కృతజ్ఞతలు తెలియ జేస్తోంది .

ఈ సురభిళ సుమమాలను  సరస్వతీ  పుత్రులు ,నడయాడే దైవం  కంచి జగద్గురువులు ,పరమాచార్య శ్రీ శ్రీ చంద్ర శేఖర సరస్వతీ మహా స్వాములకు  సవినయంగా అంకితమిస్తున్నామని తెలియ జేయటానికి సంతోషంగా ఉంది .

2-సరసభారతి 26-3-17 ఆదివారం నిర్వహించిన శ్రీ హేవిళంబి ఉగాది వేడుకల సందర్భం గా””వసుధైక కుటుంబం ”శీర్షికగా  ఏర్పాటు చేసిన కవి సమ్మేళనం లోని కవితలను పుస్తకరూపం లో తెస్తున్న సంగతి మీకు తెలుసు .ఇందులో ప్రసిద్ధ అనుభూతికవి కీ శే దేవరకొండ బాలగంగాధర తిలక్ రచించిన ”వసుధైక గీతం ”కవితను కూడా చేర్చికవితా సంకలనాన్ని   శ్రీ తిలక్ కు అంకితమిస్తున్నామని తెలియజేస్తున్నందుకు ఆనందంగా ఉంది .

3– సరసభారతి అమెరికాలోని షార్లెట్ లో 1-10-17 ఆదివారం 108 వ కార్య క్రమంగానిర్వహించిన  ”దసరా సరదా సాహితీ కదంబం ”లో ఎల్లలు లేని జగతి పై శ్రీ తిలక్అద్భుతంగా రాసిన   ‘వసుధైక గీతం ”చదివి ఆయన ఫోటో ను వేదికపై అలంకరింపజేసి శ్రీ తిలక్ కు ఆ కార్యక్రమం అంకితం చేసిన  సంగతి మీకు జ్ఞాపకం ఉండేఉంటుంది . శ్రీ తిలక్ కు ఈ  రకమైన ఘన నివాళి అర్పించటం సరసభారతి అదృష్టం గా భావిస్తున్నాం  –

దీపావళి శుభాకాంక్షలతో –

దుర్గా ప్రసాద్

—

సాహితీ బంధువులకు ధన త్రయోదశి శుభాకాంక్షలు -షార్లెట్ సరస భారతి సాహితీ మితృలు 1-10-17 ఆదివారం జరిగిన సరసభారతి 108 వ సమావేశం ”దసరా సరదాసాహితీ కదంబం ” కార్య క్రమం లో  ఆత్మీయంగా అందజేసిన 1,000 డాలర్లు నగదు కానుక కు ఎక్స్చేంజ్ లో 60 000 రూపాయలు వచ్చిన సంగతి దానిని ఫిక్సెడ్ డిపాజిట్ లో వేస్తానని చెప్పిన సంగతి  ఇదివరకే తెలియ జేశాను .ఈ మొత్తాన్ని ఈ” ధన త్రయోదశి ”నాడు ఫిక్సెడ్ డిపాజిట్ చేశానని తెలియ జేస్తున్నాను. ఆర్ధికం గా ఇబ్బంది పడుతున్న విద్యార్థు లెవరైనా  మీదృష్టికి వచ్చినా ,లేక కడు  బీదరికం తో బాధ పడుతున్న వారెవరైనా మీకు తటస్థ పడితే  మాకు తెలియజేస్తే  విచారించి తగిన ఆర్ధిక సాయాన్ని ”షార్లెట్ సరసభారతి ”పేరిట  దీనిపై వచ్చే వడ్డీ తో మనం ఆర్ధిక సాయం చేద్దాము . ఒక మంచి కార్యక్రమానికి మీరు అంద  జేసిన. ఈ చేయూత చిరస్మరణీయం గా నిలిచి ఆదర్శ ప్రాయమైంది  .అందరికి ధన్యవాదాలు  .

రెండేళ్ల క్రితం ఫోన్ ద్వారా పరిచయం అయిన శ్రీమతి గబ్బిట గిరిజ తరచూ ఫోన్ చేసి మాట్లాడుతూవుండటం ,నన్ను బాబాయి గారు అనీ మా ఆవిడను పిన్ని గారూలని సంబోధించి పలకరించడం అమెరికా లో ఉన్నా రెండుమూడు సార్లు వాట్స్ అప్ లో మాట్లాడటం ఇండియా వచ్చాక మూడు సార్లు ఫోన్ చేయట0 ,తాను  ఆర్ధోపెడిక్ పేషేంట్ అవటం ,82 ఏళ్ళ అత్తగారి సేవ లో ప్రతిక్షణం ఉండటం ,మన బ్లాగులను చదువుతూ ఉండటం వలన ఆమె మా గబ్బిట వారి ఆడబడుచు అవటం కూడా కారణమై ఈ రోజు 11-10-17 బుధవారం సాయంత్రం 4-30 కు మా దంపతులం మా పెద్దకోడలు శ్రీమతి సమత కాబ్ లో నాగోలు లోని వాళ్ళ ఇంటికి వెళ్లి కాసేపు కాలక్షేపం చేసాం . ఆమె అత్తవారింటిపేరు రాయలసీమ ”గుత్తి అగ్రహారం ”. భర్త శ్రీ రిషీకేశ్ ఐబి ఏం ఉద్యోగి .  గిరిజ కృష్ణాజిల్లా గుడివాడ దగ్గరున్న యలమర్రు లేక కూరాడ కు చెందిన గబ్బిట వారి ఆడబడుచు .గుత్తి అగ్రహారం వారి కోడలు .గుడివాడ దగ్గర బేత వోలు లోని రిటైర్డ్ హెడ్ మాస్టర్ శ్రీ పచ్చళ్ళ శర్మ గారి మేనకోడలు . శర్మగారి ద్వారా నా సంగతి తెలుసుకొని  ఆయన ఎప్పుడూ నా గురించి చెపుతూ ఉండటం తో బ్లాగ్ లో గుర్తుపట్టి అభిమాని అయి తరచూ పలకరించేది . అందుకే ఇవాళ వాళ్ళ ఇంటికి ప్రత్యేకంగా వెళ్లాం ఆమె పై ఉన్న అభిమానం తో .

హైదరాబాద్ లో సోమ, మంగళవారాలు

దీనిని 8 రాత్రి 9-30 కు రాయటం ప్రారంభించి అర్ధరాత్రి 1 -45 కుదాదాపు 4 గంటలు రాసి పూర్తి చేశా .

వీక్లీ అమెరికా -27-(25-9-17 నుండి 1-10–17 వరకు )-2

 ,  30-9-17శనివారం సాయంత్రం -మా మనవళ్ళు చదివే కమ్యూనిటీ స్కూల్ లో  ఇక్కడి తెలంగాణా ప్రజలంతాకలిసి ‘’బతకమ్మ ‘’ఉత్సవం బ్రహ్మానందం గా చేశారు .చూడటానికి మేమూ వెళ్లాం .కానీ టికెట్ 5 డాలర్లు పెట్టారు  .అప్పటికే ప్రసిద్ధ తెలంగాణా కవి శ్రీ గోరటి వెంకన్న మాట్లాడుతున్నారు .వినాలని సరదాగా ఉన్నా ,వెళ్లలేక పోయాం తెలంగాణా మహిళలు సంప్రదాయ దుస్తులు ధరించి పళ్ళాలలో  బతుకమ్మను ఏర్పాటు చేసుకొని సందడి గా కనిపించా రు.వారి ఆరాధనా భావానికి ఆశ్చర్యమేసింది . దేశం మారినా సంప్రదాయం మర్చి పోనందుకు వారిని అభినందించాం  గోరెటి వెంకన్నగారు ఇక్కడ ఉన్నారని తెలిసి ఆయన సాహితీ కదంబ కార్యక్రమానికి రాగలుగుతారేమో కనుక్కోమని శ్రీగ్రంధి హరిగారికి నేనూ మా అమ్మాయి 29  సాయంత్రం  మా ఇంట్లో భజన సమయం లో చెప్పాం .ఆయన వాకబు చేసి వెంకన్నగారు 1 తేదీ తెల్లవారు ఝామున 2 గంటల ఫ్లయిట్ లో వెళ్లి పోతున్నారని 30 మధ్యాహ్నం మాకు తెలియజేశారు . అద్భుతమైన అవకాశం చే చే రిందనుకొన్నాం .

  అక్కడ నుండి మా అమ్మాయి మమ్మల్ని శ్రీ మల్లవరపు శివ కుమార్ గారింట్లో జరిగే దసరా బొమ్మల కొలువుకు ఆహ్వానం వస్తే తీసుకు వెళ్ళింది .శివగారు ప్రసిద్ధ కవి స్వాతంత్ర సమరయోధులు ,రవీంద్రుని శిష్యులేకాక శాంతి నికేతన్ విద్యార్థి ,’’రవీంద్ర వ్యాసావళి ‘’,’’మధుకీల ‘’కావ్యం మొదలైనగ్రంధకర్త ,కృష్ణ శాస్త్రికి చాలా దగ్గర బంధువు ,ఆచంట జానకి రామ్ రచనల్లో ‘’మా విశ్వం బావ ‘’అని పొగడబడిన వాడు స్వతంత్ర ఉద్యమకాలం లో తర్వాత ఎన్నో దేశభక్తి గీతాలు రాసి నిత్యం రేడియో లో గేయాలు రాసి  వినిపించిన స్వర్గీయ శ్రీ మల్లవరపు  విశ్వే శ్వరరావు గారి కుమారులు .వారింట్లో బొమ్మలకొలువు కనుల పండువుగా ఉంది .మాకు ప్రసాదంగా పులిహోర ,తాలింపు సెనగలు ,పెరుగన్నం పెట్టారు .చాలా ఆత్మీయంగా గలగలా మాట్లాడే తత్త్వం శివ గారిది . రేపు జరిగే సాహితీ కదంబం కు రమ్మని ఆహ్వానించాం తనకు మెయిల్ వచ్చిందని తప్పక వస్తానని చెప్పారు .శివ గారింట్లోనే ప్రసిద్ధ నాట్య శిక్షకురాలు దర్శకురాలు శ్రీమతి మంగళం పల్లి మహా కిఞ్చిర్త్యన్ కుటుంబం పరిచయమయ్యారు .ఆమెది హైదరాబాద్ . విదేశీయుని వివాహమాడి ఇక్కడ గొప్ప నర్తకిగా ప్రసిద్ధి చెందింది .అందరితో ఫోటోలు తీసుకొన్నాం . అవి రాత్రే అందరికి పంపాను చూసే ఉంటారు .

             శ్రీరామ్ డొక్కా గారి కవితలు

శనివారం మధ్యాహ్నం టెక్సాస్ రాష్ట్రం లో ఆస్టిన్ లో ఉంటున్న శ్రీరామ్ డొక్కా గారు తాము ఇటీవల రాసి ప్రచురించి విడుదల చేసిన రెండు కవితా సంపుటాలు ‘’ఆత్మానందం ‘’ ఆనందారామం ‘’పంపగా అందాయి .పంపుటౌన్నట్లు బుధవారమే ఫోన్ చేసి చెప్పారు .అందాయి .రాత్రి 10 గంటలకు మొదటి పుస్తకం లోని 116 కవితలు చదివి ‘’ఆత్మానందారామం ‘’అని నా అభిప్రాయంగా వ్యాసం రాసి అర్ధరాత్రి 12 గంటలకు ఆయనకూ మీకూ పంపిన సంగతి గుర్తు ఉండే ఉంటుంది .రామ్ గారు  ఎంతో ఆనందించివెంటనే  ధన్యవాదాలు రాశారు .

నిద్ర పోయేసరికి రాత్రి ఒంటిగంట అయి ఉంటుంది .వీరిదే ఇంకో పుస్తకం మిగిలింది .తెల్లవారుఝామున 4-30 కి మెలకువ వస్తే లేచి 5 గంటలకు రెండో పుస్తకమైన పద్య కవితల ‘’ఆనందారామం ‘’చదివి వెంటనే ‘’జగదానందారామం ‘’గా నా అభిప్రాయం రాసి పంపేసరికి తెల్లవారి 7 అయింది దీనిపై ఎందుకో రామ్ గారి నుంచి జవాబు రాలేదు . ఇంత  తొందర గా ఎందుకు రాశానంటే ఈ రెండిటిని సాహితీ కదంబం  లో సాహితీ అభిమానం ఉన్నవారికి వారి కానుకగా అంద  జేయటానికే .

1-10-17 ఆదివారం -దసరా సరదా సాహితీ కదంబం

మేము ఏప్రిల్ మొదటి వారం లో షార్లెట్ వచ్చాము .అప్పుడు మొదటిసారిగా శ్రీ రాంకీ ఇంట్లో కార్యక్రమానికి వెళ్లాం .అక్కడ అతనితో వేలూరి ,పవన్,రాంకీ తమ్ముడు సాయి పవన్ తో షార్లెట్లో  తెలుగు సాహిత్యం మీద అభి రుచి ఉన్నవారు కనీసం పది మందితో ఇస్టా  గోష్ఠి జరుపుదాం అంటే తప్పక చేద్దామనటం ,ఆతర్వాత రాంకీ ఇంట్లోనే రెండు సరసభారతి సభలు మరొకటి శ్రీ బులుసు సాంబమూర్తిగారింట్లో స్వాతంత్ర సమరయోధులు స్వర్గీయ బులుసు సాంబమూర్తిగారి కార్యక్రం చేయటం తో అందరిలో సరసభారతిపై అభిరుచి పెరిగి చివరికి’’ దసరా సరదా సాహితీ కదంబ0  ‘’    రూపు దాల్చి అద్భుతంగా జరిగింది ‘

   మధ్యాహ్నం 1-45 కే  మేము అందరం వేలూరి పవన్  ఇంటికి  దగ్గరున్న కమ్యూనిటీ సెంటర్ కు చేరుకున్నాం అప్పటికే అక్కడ ఏర్పాట్లు జరిగి పోయాయి  నేను సాంప్రదాయంగా పంచె ,చొక్కా ఉత్తరీయం తో వెళ్లాను .రాంకీ తమ్ముడూకూడా  అదే పద్ధతిలో వచ్చారు .మా అమ్మాయి మైసూర్ పాక్ ,బ్రేడ్ బజ్జీలు తయారు చేసి తీసుకొని వచ్చింది అక్కడే టీ  కాచి  రెడీ చేశారు .ఈ కార్యక్రమ0 బాగా జరగాలని మా అబ్బాయి రమణ ఇక్కడి ‘’పవన్ ద్వయం ‘’ మా అమ్మాయి విజ్జితో తో రోజూఫోన్ కాంటాక్ట్ లో ఉంటున్నాడు దిశా నిర్దేశమూ చేశాడు .జ్ఞాపికల డిజైన్ కూడా ఉయ్యూరు లో చేయించాడట వాటిని ఇక్కడ తయారు చేయించారట ఇదాంతాః నాకు తెలియ కుండానే జరిగి పోయింది . సంతోషం

 మధ్యాహ్నం 2-30 కు అలవాటులో పొరబాటుగా కార్యక్రమం అరగంట ఆలస్యంగా మొదలైంది .ఎలా జరపాలి నేను ముందే సూచించాను దాన్ని తూచా తప్పకూండా చిన్నపవన్ బ్లు ప్రింట్ తయారు చేసి రెడీ చేశాడు .ఆదివారం ఉదయం శ్రీ మైనేని గారి మేనకోడలు ఇక్కడి కాంకర్డ్ నుంచి మా అమ్మాయికి ఫోన్ చేసి ‘’మీ నాన్నగారిని మా ఇంటికి తీసుకు వెళ్లాలని ఉంది  ‘’అని చెబితే ఈ కార్యక్రమం సంగతి చెప్పి ఆవిడనూ ఆహ్వానించింది విజ్జి .ఆమె రాలేదని కొంటా  .ఆవిడకు మైనేనిగారు ఈ విషయం చెప్పలేదా ?ఆయన ఎందుకో నెల నుంచి చాలా ఉదాసీనంగా ఉంటున్నారు .లేకపోతె ఇంత పెద్ద కార్యక్రమం ఇక్కడ జరుగుతుంటే దానీపై   ఒక్కమాటకూడా ఆయన రాయలేదు నాకు ..ఆశ్చర్యంగా ఉంది

  మా మనవళ్లు  మిగిలిన ముగ్గురు  ఆడపిల్లలు ‘’మా తెలుగు తల్లికి ‘’పాట  చాలాశ్రావ్యంగా పాడారు .వీళ్లల్లో డా శ్రావ్య గారమాయి కూడా ఉంది .తర్వాత జ్యోతి ప్రదీపనం .తర్వాత మా అల్లుడు సాంబావదాని వేద మంత్రప్రార్ధన . ఈ కార్యక్రమానికి మా అమ్మాయినే అందరూ ‘’లంగరు ‘’ వేయమంటేఅంటే యాంకరింగ్ చేయమని   యాంకర్ ను చేశారు .ఇలాంటివి మా అమ్మాయికి కొట్టినపిండి .నల్లేరుపై నడకే . తర్వాత అధ్యక్షుడిగా నన్ను ఆహ్వానించటం జరిగింది .అప్పుడు నేను సరసభారతి గురించి చెప్బుతూ ‘’అక్షరం లోక రక్షకమ్ ‘’అనేది సరసభారతి నినాదం అని మొదలు పెట్టి దాని ప్రస్తానం మజిలీలు తెలిపి   ప్రచురించిన ప్రచురించబోతున్న పుస్తకాల వివరాలు అనుభూతి కవి దేవరకొండ బాల గంగాధర తిలక్ రాసిన ‘’వసుధైక గీతం ‘’చదివి ఇంతటి విశాల దృక్పధం తో రాసిన కవి ఆనాడు లేడనీ అందుకే ఈ సభను తిలక్ కు అంకితమిస్తున్నామని చెప్పగానే హర్ష ధ్వానాలు మారు మ్రోగాయి .అంతకు రెండు రోజుల ముందే తిలక్ ఫోటో పెద్ద పవన్ కు మా ఇంట్లో చూపించి దాన్ని ప్రింట్ ఔట్ తీయించి ఫ్రెము  కట్టించమని చెప్పా . చాలా మంచి ఫోటో వచ్చింది దాన్ని వేదికపై సరస్వతీ దేవి ఫోటో ప్రక్కన పెట్టి సార్ధకత చేకూర్చాము . పవన్ అభిసన్దనీయుడు . ఇలాంటి కార్యక్రమాలలో అను  భవం వీళ్లకు లేనందున వేదికపై బానర్ తయారు చేసి ఉంచాలన్న ఆలోచన ఎవరికీ రాలేదు . నేనూ చెప్పలేదు .తెలుసుకదా ఆపని చేయకుండా ఉంటారా ,ఎన్నో సాయి సభలు చేసినవాళ్లకు నేను చెప్పాలా అనుకొన్నా ,  తీరా వచ్చి చూస్తే అప్రయత్నం జరగలేదు . అప్పటికప్పుడు మా అమ్మాయి ఇంటికి వెళ్లి బానర్ పేపర్ తెస్తే కలర్ మా ర్కింగ్ పెన్స్ తో నేనే చెప్పి శ్రీమతి పద్మశ్రీ ,లావణ్యలతో తయారు చేయించి వేదికపై పెట్టించి సార్ధకత కలిగించా . మరో సంగతి అధ్యక్షుడిని వేదిక ఎక్కించకుండా నే కొంత తంతు కూడా జరిపారు .అనుభవ రాహిత్యం ఏది జరిగినా అధ్యక్షుడి సమక్షం లో జరగాలి అదీ సంప్రదాయం .

తెలుగు కవిత్వం ఎలా ఉండాలో పెద్దన గారి ‘’పూత మెఱుంగులుం ‘’అనే 24 పాదాల ఉత్పలమాలిక చదివి  కృష్ణదేవరాయల ‘’తెలుగుగదేల యన్న దేశంబు తెలుగు యే ను తెనుగు వల్లభుండ తెలుగొ  కండ  -యెల్ల  నృపులు కొలువ యెరుగవే బాసాడి దేశ భాష లందు తెలుగు లెస్స ‘’పద్యం చదివి తెలుగు అతి ప్రాచీనమైన భాష అని 2 వేల  ఏళ్ళ క్రితమే తెలుగు ఉందని చెప్పి రాయల పద్యం ఇక్కడి తెలుగు పిల్లలకు నేర్పమని అలాగే తెలుగు తరగతులలో పిల్లలు ఒకరినొకరు ‘’అక్కా అన్నా ‘’అని సంబోధించుకొనేట్లు అలవాటు చేసి మన బాంధవ్యపదాలైన బాబాయి పిన్ని తాతగారు మామ్మగారు అమ్మమ గారు కూడా అభ్యాసం చేయించమని కోరా.  ఇవి తమ దృష్టిలోకి ఇంతవరకు రాలేదని ఇకనుండి అలానే పిలిపిస్తామని తెలుగు బోధకులుశ్రీమతి జ్యోతి  హామీ ఇచ్చారు ఆధునిక కవిత్వానికి ‘’మాగ్నాకార్టా ‘’అని ప్రశంసింపబడుతున్న శ్రీ శ్రీ ‘’కవితా ఓ కవితా ‘’కవితను తిలక్ ‘’నా అక్షరాలూ వెన్నెలలో తడిసె అందమైన ఆడ పిల్లలు ;కవిత ను చదివి తెలుగు కవిత్వమార్గ నిర్దేశం చేశాను అప్పయ్య దీక్షితులు ‘’తెలుగులో మాట్లాడటం తెలుగు వాడిగా పుట్టటం పూర్వజన్మ తపో  ఫలం అన్నాడని సుబ్రహ్మణ్య భారతి ‘’సుందర తెలుంగు ‘’అని కీర్తించాడని ,తెలుగును ఇటాలియన్ ఆఫ్ ది ఈస్ట్ అని పాశ్చాత్యులే ప్రష్మసించారని గుర్తు చేశాను .

   తర్వాత శ్రీ మల్లవరపు శివ కుమార్ మాటాడి తండ్రిగారి కవిత్వాన్ని గుర్తు చేశారు . తర్వాత శ్రీమతి పద్మశ్రీ   అపరఘంటసాల అని మా అమ్మాయి చెప్పే శ్రీ శ్రీనివాస్ కూచిపూడి నాటక నాట్యానుభవం ఉన్న శ్రీ పసుమర్తి సనత్   గరివిడి కి చెందిన సంగీతము మేష్టారు శ్రీ మోకరాల మూర్తిగారి కరుణశ్రీ గారి ‘’పుష్ప విలాపం ‘’పద్యాలు  సనత్ భార్య శ్రీమతి లావణ్య ,ముసలితనం లోనూ సాహిత్యం పై అభిరుచి తగ్గని కవిత్వం రాసి పాడే శ్రీమతి సీతమ్మగారి పాటలతో తో నా సాహితీ స్రవంతి తర్వాత సంగీత స్రవంతి ప్రవహించింది .

 తర్వాత నేనే సరదా కబుర్లు తో హాస్య వల్లరికి తెరతీశా.దీన్ని శ్రీ నాగరాజు గారు అందుకొని తన నేటివ్ హాస్యం జోడించి కడుపుబ్బా నవ్వించి అనుకొన్నది నెరవేరేట్లు చేసి సరదా పూలు పూయించారు మధ్య మధ్యలో నేను పేరడీలు అందునా మల్లవరపు వారి మధుకీలపై కృష్ణశాస్త్రి గారు రాసిన ముందుమాటలపై జలసూత్రం రుక్మిణీ నాధ శాస్త్రి అనే జరుక్ శాస్త్రి రాసిన పేరడీ చెప్పి కడుపుబ్బనవ్వించాను మల్లవరపు వారబ్బాయి శివ గారుండగానే  .

  అక్టోబర్ 8 ఆదివారం నాడు షార్లెట్ హిందూ సెంటర్ లో తమ శిష్యురాళ్ళు శ్రీమతి డా సాయి లక్ష్మి ప్రముఖ మృదంగ విద్వా0సులు శ్రీ ఎల్లా వెంకటేశ్వరరావు గారి అమ్మాయి శ్రీమతి విజయ ల కోరికపై ‘’కీచక వధ’’కూచిపూడి నృత్యాన్ని చేయబోతున్న ప్రఖ్యాత కూచిపూడి నాట్యకళాకారులు దర్శకులు శ్రీ పసుమర్తి వెంకటేశ్వర శర్మ ‘’గారు ఈ సభకు కాకతాళీయంగా రావటం తో వారిని వేదిక నలంకరింపజేసి కార్యక్రమ వారి సమక్షం లో జరిపాం .శర్మగారికి సరస భారతి తరఫున నూతన వస్త్రాలు శాలువా కప్పి 2 116 రూపాయలు అందజేశాము . దసరాలలో కళాకారులను సన్మానించటం మనకు అనుస్యూతంగా   వస్తున్న సదాచారం .దాన్ని ఇక్కడ చేయగలగడం అందులో అత్యంత సర్వ సమర్ధకునికి చేయటం మహదానందం గా ఉంది .వీరిని సత్కరించే టప్పుడు  రాంకీ అవధానులతో  వేదాశీర్వచనం  చేయించాచి .  మరింత సార్ధకత  తెచ్చాము . దీనితో సభ సాహిత్య సంగీత నృత్య త్రివేణీ సంగమమై  విరాజిల్లింది .  అందరిలో ప్రేరణ ప్రోత్సాహం స్ఫూర్తి కలిగింది .కార్యక్రమం ముగిసేముందు ప్రత్యేకంగా తయారు చేయించిన  జ్ఞాపికలు పాల్గొన్నవారికీ , సేవ చేసిన వారందరికీ ఇప్పించాం .బాగున్నాయి జ్ఞాపికలు నిజంగా కలకాలం దాచుకోదగినవిగా అసలైన జ్ఞాపికలుగా ఉన్నాయి దీని డిజైనర్ కు స్పాన్సర్ కు అభి నందనాలు .ఉయ్యూరుదగ్గర పైడి కొండలపాలెం నివాసి ఇక్కడ ఉంటున్న శ్రీ సుంకర రావు గారు చాలా చలాకీగా పాల్గొని తర్వాత కార్యక్రమానికి తానూ తనవంతు సహాయ సహకారాలు అందిస్తానని చెప్పగానే మా అమ్మాయి సుంకర వారి వితరణ గురించి  అందరికి తెలియ జేసింది ఇక్కడి తెలుగు తరగతులు నిర్వహించే శ్రీమతి జ్యోతిర్మయి పిల్లలకు చిన్న కథలు చెప్పి ఆకట్టుకున్నారు .

  నేను చివర్లో మాట్లాడుతూ ఈ కార్యక్రమం దీనితో ఆగి పోరాదని కనీసం 6 నెలలకొకసారి అయినా షార్లెట్ తెలుగువారు సరసభారతి వేదిక గా కార్యకర్మాలు నిర్వహించాలని కోరగా అందారూ ఉబ్బి తబ్బిబ్బయి తప్పకూండా చేస్తామని హామీ ఇచ్చారు .తర్వాత కార్యక్రమం ఉగాది రోజున చేయమని ఆనాడు ఉగాది పచ్చడి ,పంచాంగ శ్రవణం తో కూడిన ‘’ఉగాది విభావరి ‘’నిర్వహించమని కోరాను.  శ్రీమతి సాయి లక్ష్మిగారు ‘’బాబాయిగారూ మీరిచ్చిన ప్రోత్సాహం మమ్మల్ని పరవశుల్ని చేసింది ఉగాదినాడు నేను డాన్స్ కూడా చేస్తాను ;;అనటం , పద్మ,శ్రీ , ఉషా, రాధ, రాంకీ ,పవన్ జంట ,ఎల్లా  విజయ మొదలైనవారంతా  ఆనందం  పట్టలేక కళ్ళ వెంట ఆనంద బాష్పవాలు కారుస్తుంటే నా జీవితం ధన్యమైందని పించింది .జీవితానికి సార్ధకత చేకూరింది అనుకొన్నా .ఇంతటి హృదయ స్పందన ఉంటుందని ఊహించలేదు .మా ఈ అయిదవ అమెరికా పర్యటన సాహిత్య ఆధ్యాత్మిక ధార్మిక స్రవంతి గా జరగటం చాలా  సంతృప్తిగా  ఉంది .

 సభలో నాకూ మా శ్రీమతికి శాలువా కప్పి సన్మానం చేశారు . ఒక గడియారంబహూక రించారు . షార్లెట్  ,తెలుగు మిత్రులు అందరూ కలిసి కొంత డబ్బు పోగు చేసి ఇండియా లో సరసభారతి చేస్తున్న కార్య క్రమాల  లో భాగం గా పేద ప్రతిభగల విద్యార్థులకుప్రోత్సాహక నగదు బహుమతిగా  అందజేయమని ఒక కవర్ లో పెట్టి అందించారు .అందులో యెంత ఉందొ నేను ఇంకా చూడలేదు .ఈ సందర్భం గా నేను ‘’ఇక్కడ మా దంపతులను ఆహ్వానించి సత్కరించి రుద్రం సత్యనారాయణ వ్రతం  మొదలైన వాటిలో మాకు నగదుగా తాంబూలం లో పెట్టి,గౌరవించిన  ప్రతి డాలర్ నూ నేను లెక్క రాసుకొన్నానని దానిని ఆయా వ్యక్తుల పేరిట సరసభారతి  పుస్తక  ముద్రణ లో సహకరించిన వదాన్యుల పేర్లలో చేర్చిరాబోయే సరసభారతి గ్రంధాలలో ముద్రి0చి  కృతజ్ఞతలు తెలియజేస్తామని సరస భారతి ఎవరి వద్దా చందాలు వసూలు చేయదని ఇలా డబ్బు ఇచ్చిన వారి పేర్లూ శ్రీ సువర్చలాన్జనేయ స్వామికి కైంకర్యంగా ఇచ్చేదా న్నీ ఇలాగే మా పుస్తకాలలో ముద్రిస్తామని తెలియ జేశాను .కార్య క్రమ లో శ్రీ గ్రంధి హరి గారు ఆయన శ్రీమతి రంజని ఎంతో సేవ చేశారు .వారికి ప్రత్యేక అభినందనలు .కార్యక్రమం వేద స్వస్తి తో ముగించాం . పూర్తి అయ్యేసరికి రాత్రి 7-30 అయింది అంటే 5 గంటల నాన్ స్టాప్ కార్యక్రమం జరిపామన్నమాట . ఎవరికీ సమయమే తెలీకుండా పోయి నిమగ్నమై మరో లోకం లో తేలిపోయారు .ఇది షార్లెట్ లో సరసభారతి సాధించిన అపూర్వ అద్వితీయ  చారిత్రాత్మక ఘన ,చిరస్మరణీయ  విజయం.  ఇందులో పాల్గొన్నవారికి సహకరించిన వారికి అందరికి సరసభారతి సదా రుణ పడి కృతజ్ఞతగా ఉంటుంది .అందరూమమ్మల్ని   వదిలి వెళ్లలేక వెళ్లలేక గుడ్ల నీరు కుక్కుకొంటూ.  ‘’ సంతోషపు కన్నీళ్లు ‘’ కారుస్తూ  రాలుస్తూ’’ బాన్ వాయేజ్’’ చెబుతూ వీడ్కోలు తీసుకొన్నారు ఇదంతా ఇక్కడి వాళ్ళ సౌజన్యం సౌహార్దత మేము చేసింది ఏమీ లేదు .దోహదం చేసి మా బాధ్యత నెరవేర్చాం అంతే . కార్యక్రమమే అంటా ఫిష్ బుక్ లో లైవ్ గా వచ్చేట్లు చేశారు వీడియో తీసి యు ట్యూబ్ లో పెట్టారు చూడండి

   నేను ఈ కార్యక్రమం 3 గంటలు పెట్టారు ఎవరు వస్తారో ఎవరు ఏ ఐటెం లో ఉంటారో తెలియదు కనుక మొత్తం బాధ్యత నామీదే ఉంటుందేమో నని  అవసరమైతే ఆ మూడుగంటలూ  జోక్స్ తో సాహిత్య ప్రసంగాలతో హాస్యం తో కాలక్షేపం చేయాల్సి వస్తుందని మస్తుగా తయారై వచ్చాను .ఇంతమంది పాల్గొని భాగస్వామ్యులై  నా బరువు తగ్గించారు .అందుకని నే ను తయారు చేసుకొన్నదంతా ఇండియావెళ్ళాక వరుసగా ధారావాహికంగా రాస్తానని దీనివలన ఎంతో సాహిత్య సమాచారం అందుకొంటారని ఎవరికైనా చెప్పటానికి ఉపయోగ పడుతుందని చెప్పాను ఆపని తప్పని సరిగా చేయమని కోరారు .సరే అన్నాను

   సభానంతరం శ్రీ పసుమరి సంత్ లావణ్య దంపతుల ఇంటికి డిన్నర్ కు వెళ్లాం ఎప్పుడో ముందే  బుక్ అయినా  కార్యక్రమం ఇది .మాతో పాటు పసుమర్తి నాట్యాచార్యులు వారబ్బాయి కూడా అతిధులు . మోకారాల వారి కుటుంబమూ ఇక్కడ ఉన్నారు అందరం ఫోటోలు తీసుకొన్నాం . మోకారాలవారు గరివిడిలో మా అన్నగారమ్మాయి శ్రీ మతి వేదవల్లి రామకృష్ణ దాంపతులకు బాగా పరిచయం ఉన్నవారేనట .

  లావణ్య తల్లి శ్రీమతి పసుమర్తి లక్ష్మి 52 ఏళ్ళ క్రితం మోపిదేవిలో నా శిష్యురాలు ఈ మధ్యనే డా శ్రావ్యగారింట్లో పరిచయమైంది .ఆమెను చూస్తుంటే ఇదివరకు రేడియో లో వచ్చే కడుపుబ్బనవ్వించేనండూరి సుబ్బారావు నాగరత్నమ్మ ల  ‘’నాటికి నేడు’’నాటిక గుర్తుకొస్తుంది .   లక్ష్మికి ‘’శ్రీ సువర్చలా మారుతి శతకం ‘’అందజేశాను సభలో ఎల్లా విజయకు ‘’శ్రీ సువర్చ లేశ్వర  శతకం ‘’ఇచ్చాను . అలాగే ఉయ్యూరు ఊసులు ,కాళరాత్రి ,డొక్కా రామ్ గారి రెండు కవితా సంపుటాలు ఆసక్తి ఉన్నవారికి ఇచ్చేసి సార్ధకం చేశాను . లావణ్య ఇంట్లో భోజనం లో వంకాయ కూర కాబేజీ కూర టమేటా చట్నీ  సాంబారు  పెరుగు తో కమ్మని భోజనం . అన్నీ బాగానే ఉన్నాయి .సాధారణంగా నేను కాబేజీ కూరను తినను .దానికి ‘’నీచు కూర ‘’అని పేరు బెట్టాను. అలాగే బీట్ రూట్ కూర ను ‘’రక్తం కూర ‘’అంటాను . దాన్నీపెద్దగా తినను . అయితే లావణ్య ఇంట్లో మా శిష్యురాలు లక్ష్మి కాబేజీ కూర బాగా చేసింది . ఇష్టంగా తిన్నాను . సాంబారూ మహా రుచికరంగా ఉంది .మా అమ్మాయి బీట్ రూట్ కూర బాగా చేస్తుంది అప్పుడు కాస్త రుచి చూస్తా . లావణ్య మా శ్రీమతికి ,మా అమ్మాయికి చీర జాకెట్ పెట్టి ఆశీస్సులు పొందితే మా శిష్యురాలు లక్ష్మి కవర్ లో డబ్బు పెట్టి నన్ను బట్టలు కొనుక్కో మని చెప్పింది . వాళ్ళ అబ్బాయికి సంతానం కలగటానికి మా శ్రీ సువర్చలాన్జనేయ దేవాలయం లో వారి పేరుమీద అర్చన  చేయించమని  మరి కొంత డబ్బు పెట్టింది . తప్పక చేయిస్తాను అన్నాను ‘శర్మగారు ,లక్ష్మి, సనత్ లు వాళ్ళ ఫోన్ నంబర్లు నాకు ఇచ్చి నా నంబర్ నోట్ చేసుకొన్నారు .ఇంటికి చేరేసరికి రాత్రి 10-30అయింది . ఇలా మధ్యాహ్నమంతా సత్కాలక్షేపం తీపి గుర్తులు మిగిల్చింది

 ఇక్కడి వీక్లీ అమెరికా 27 దీనితో పూర్తి చేస్తున్నాను . మిగిలిన రోజు ల విశేషాలు ఇండియా వెళ్ళాక రాస్తాను .

 గాంధీ జయంతి శుభాకంక్షలతో

  మీ-గబ్బిట దుర్గాప్రసాద్ -2-9-17 -కాంప్ షార్లెట్-అమెరికా

—

— 

వీక్లీ అమెరికా -27-(25-9-17 నుండి 1-10–17 వరకు )-1

 ,లలితా పారాయణ ,సుందరకాండ పారాయణ పూర్తి ,దసరా సరదా సాహితీ కదంబ వారం -1

 25-9-17 సోమవారం -ఉదయం అమెరికాలో మా అమ్మాయిగారింట్లో చివరి మహాన్యాస పూర్వక రుద్రాభిషేకం పూర్తి చేసి,తర్వాత సుందరకాండ నాలుగవ రోజు పారాయణ పూర్తి చేశాను  శని ,ఆదివారాలలో పూర్తిగా రుద్రాభిషేకం లో మంత్రాలు చదవటం తో ‘గాత్రానికి ‘’కించిత్ అసౌకర్యం ‘’కలిగి బొంగురు మాట వచ్చింది హాల్స్ ఆరాగా ఆరాగా చప్పరించి ఉపశమనం పొందాను .. వీక్లీ అమెరికా 25 లో రెండుభాగాలు రాశాను

మంగళవారం – నిత్యపూజతో పాటు అమ్మవారి అష్టోత్తరాలూ రోజూ చేస్తున్నట్లే చేసి అయ్యవారి అష్టోత్తర సహస్ర నామ పూజ ,సుందరకాండ అయిదవ రోజు పారాయణ పూర్తి చేశాను .సరసభారతి కార్య దర్శి శ్రీమతి మాదిరాజు శివలక్ష్మి కుమార్తె చి బిందు దత్తశ్రీ బి టెక్ ఫైనల్ ఇయర్ లో టి సి ఎస్ వాళ్ళ కాంప్ సెలెక్షన్ సాధించిందని మెయిల్ పెడితే శుభాశీస్సులు పంపాను .కస్టపడి చదివి సాధించినందుకు అభినందించాను ..

బుధవారం -సరస్వతీ పూజ -పై విధంగానే పూజ అంతరం ఆరవ రోజు సుందర కాండ పారాయణ పూర్తి చేశాను .సోమవారం నుండి ఈ రోజు వరకు గొంతుకు ఇబ్బందికాకుండా చాలా సైలెంట్ గా పూజ ,,పారాయణ చేశాను . .

28-9-17 గురువారం -ఇవాళ మౌంట్ సోమాలో చండీ హోమం కు మా అల్లుడితో పాటూ మేమూ వెళ్లాలని మా అమ్మాయి చెప్పటం ,ఈ రోజుదుర్గాష్టమి నాడు  మా నాయనమ్మగారి’’  తిధి’’ అవటం వలన రాత్రి 2-30 కే  లేచికార్యక్రమాలు పూర్తి చేసి  తెల్లవారుఝామున 3 గంటలకుసంధ్యావందనం నిత్యపూజ ,7 వ రోజు సుందరకాండ పారాయణ ఉదయం 6 గంటలకు పూర్తి చేశాను .

           మా నాయనమ్మ గారి ఆబ్దికం

 6 గంటలకు నేను ఇండియానుంచి తెచ్చుకొన్న ఆబ్దిక మంత్రాల పుస్తకం తీసుకొని మంత్రాలు చదువుకొంటూ ,మానసికంగా మా మామ్మ నాగమ్మగారికి ఆబ్దిక విధి నిర్వహించాను . అన్నసూక్తం అధిశ్రవణం కూడా చదివి అంతా అయ్యేసరికి ఉదయం 7-30 అయింది .తర్వాత రామకోటి రాసి భగవద్గీత చదివి ,డైరీ రాసేసరికి 8 అయింది .మా శ్రీమతి నాతోపాటు లేచి లలితా పారాయణం చేసి రెడీ గా ఉంది .మా అమ్మాయి యధాప్రకారం వంట చేసి 8 గంటలకు ఆఫీస్ కు వెళ్ళింది.దేవుడి నైవేద్యం పెరుగులోనానేసిన అటుకులు ఫలహారంకొద్దిగా  చేసి మందులు వేసుకొని మౌంట్ సోమాకు సిద్ధంగా ఉన్నాం

          మౌంట్ సోమా లో చండీ యాగం

మేమిద్దరం మా అల్లుడూ కారులో ఉదయం 9-15 కు బయల్దేరి 12-30 కు మౌంట్ సోమా చేరాం .మేమిద్దరం మాతో తెచ్చుకొన్న కూర ,పచ్చడి అన్నం దారిలోనే కారులోనే తినేసాం . అక్కడ హోమం అక్కడిశ్రీ సోమేశ్వర  శివాలయం అర్చకులు శ్రీ గారపాటి ప్రసాదావధాని గారు ,శ్రీమతి అనసూయ దంపతులు యాగ శాలలో నిర్వహిస్తున్నారు .కార్యక్రమం వారనుకొన్న సమయానికే ఆదాయం 11-30 కు ప్రారంభించారు .మా అల్లుడిని హోమద్రవ్యాలను అగ్నిలో వ్రేల్చటానికి ,అర్చకస్వామినియోగించారు .నేను పట్టుబట్టలు కట్టుకొని ఊరికే ప్రక్కన కూర్చున్నాను . 13 ఆవృత్తాలతో హోమం జరిగింది .ప్రతిసారి గారెలు చెరుకు ముక్క చిన్న గుమ్మడికాయ దానిమ్మపండు ,పుష్పాలను తమలపాకులతో పెట్టి ఆవృత్తం అవగానే హోమ లో వేశారు .ఇలా 13 సార్లు చేశారన్నమాట చివరికి ప్రకృతిలోని మనలోనూ ఉన్న వ్యతిరేక శక్తులను కూడా శాంత పరచటానికి ‘’కూష్మా0డ బలి ‘’ఇచ్చారు. తర్వాత పూర్ణాహుతి నిర్వహించారు అంతా అయ్యేసరికి సాయంత్రం 5 అయింది ‘.ప్రసాదం గా గారెలు ,పులిహోర . దేవాలయం ప్రక్కనే శ్రీ ఆంజనేయస్వామి పెద్ద సైజు నల్లరాతి శిలా విగ్రహం ఉన్నది .దూరంగానే చూసి నమస్కరించాను

   ఈ శివాలయం నిర్మించిన అమెరికన్ దంపతులు ,మరి కొందరు స్థానిక అమెరికన్ లు ,హిందూ భక్తులు అయిదున్నర గంటలు జరిగిన హోమం లో చాలా భక్తి శ్రద్ధలతో కదలకుండా కూర్చోవటం అత్యాశ్చర్యమేసింది

 హోమం పూర్తికాగానే  మా నాయనమ్మగారిని తలచుకొని  అర్చకులు ప్రసాదావధానిగారి చేతిలో తాంబూలం దక్షిణ పండ్లు పెట్టి నమస్కరించి సంతృప్తి చెందాను .ఈ రకంగా మా నాయనమ్మ గారి ఆబ్దికం ఇక్కడ నెరవేరింది .

       తర్వాత అందరం శివాలయానికి వెళ్లాం .అర్చకస్వామి యధా విధిగా పూజ పూర్తి చేసి ఆ దంపతులు ,మా దంపతులకు దంపతి పూజగా నూతన వస్త్రాలుసమర్పించి దక్షిణ తాంబూలాలతో సత్కరించి నమస్కరించి ఆశీస్సులు అందుకొన్నారు .ఇది మేము ఊ హ్హించని విషయం .విజయదశమినాడు మా అమ్మాయి పుట్టిన రోజు కనుక మా అమ్మాయికి కొత్త చీర జాకెట్ ఇచ్చారు

 తర్వాత వారింటికి ఆహ్వానించి మా ముగ్గురకు భోజనం పెట్టారు పప్పు ,బీన్స్ కూర అల్లం చట్నీ ,పరవాన్నం పులిహోర గారే లతో భోజనం . ఏదో తిన్నానని పించాను .సాయంత్రం 6-15 కు బయల్దేరి రాత్రి 9 గంటలకు ఇంటికి చేరాం  .ఫోటోలు నెట్ లో పెట్టి నిద్రకు ఉపక్రమించాను

అలసట తో మాంచి నిద్ర పట్టింది

 29-9-17 శుక్రవారం -లలితా పారాయణ ,భజన

ఉదయం 8 వ రోజుసుందరకాండ  పారాయణ పూర్తి చేశాను .సాయంత్రం 6 గంటలకు మా అమ్మాయి సామూహిక కుంకుమ పూజ ఏర్పాటు చేసింది .నేనే అందరి చేతా చేయించాను 25 మంది మహిళలు భక్తి తో పాల్గొన్నారు . అందరికి ఒక ప్రత్యేక ప్లాస్టిక్  పెద్దపళ్లెంఅందులో ప్లాస్టిక్ భరిణె   లో కుంకుమ   మరొక దానిలో అక్షింతలు ,పూలు ఒక డాలర్ కాయిన్ ఏర్పాటు చేసింది కాయిన్ కు కుంకుమ  బొట్టు పెట్టి  ,అమ్మవారిగా భావించి పూజ జరిపించాం ,తర్వాత అందరూ కలిసి శ్రీ లలితా సహస్రనామ పారాయణ చేశారు .7గంటలకు పూజ పూర్తయింది .

  సరిగ్గా రాత్రి 7 గంటలకు భజన మొదలు పెట్టారు .గంటసేపు అమ్మవారి కీర్తనలు సాయి నామం తో కలిపి చేశారు . 8గంటలకుభజన పూర్తయింది .అక్టోబర్ 1 ఆదివారం సరసభారతి కార్యక్రమం లో నూ 8 వతేదీ ఆదివారం హిందూ సెంటర్ లో కూచిపూడి నాట్యాచార్యులు ప్రదర్శిస్తున్న ‘’కీచకవధ ‘’కార్యక్రమంలో అందరూ తప్పక పాల్గొనాలని చెప్పాం

  రేపు విజయదశమినాడు మా అమ్మాయి పుట్టిన రోజు సందర్భంగా మామమ్మాయి విజ్జికి గ్రంధి హరి గారి భార్య విజయ లక్ష్మిగారికీ జాయింట్ గా జన్మదిన శుభా కాంక్షలు అందరూ తెలియ జేశారు

 తర్వాత విందు . చపాతీ ,బంగాళాదుంప కాస్టికం కూర ,చానామసాలా కూరా రవ్వకేసరి మరొక  స్వీట్ ,చక్రపొంగలి ,పులిహార కర్వేపాకు పులిహోర ,టమాటా ఊరగాయ ,సాంబారు ,పెరుగన్నం.అన్నీ బాగానే ఉన్నాయి సుమారు 45 మందిదాకా విందు ఆరగించారు . తర్వాత నేను కట్టిన రామరాజు పంచె ఉత్తరీయం చూసి శ్రీమతి గోసుకోండ అరుణ ‘’అంకుల్ మీరు పెదరాయుడు పో జు పెట్టండి .నేను ఫోటో తీస్తా ‘’అంటే పురజనులకోరికపై  ఆ పోజు  పెట్టగా అరుణ దంపతులు ,పవన్ దంపతులు ,మాఅమ్మాయి మాతో ఫోటోలు దిగారు .’’నాకు దిష్టి తగులుతుందేమో నని అనుమానం గా ఉంది బాబూ ‘’  .

    కదంబం కు స్పందన బాగానే ఉందనిపవన్ చెప్పాడు చాలా సంతోషమేసింది .సాయి పవన్ భార్య కు ‘’మా అన్నయ్య ‘’ డాశ్రీమతి  భావన గారికివారి అమ్మగారి ద్వారా  ‘’శతకం ‘’అందజేశాను . రాత్రి 10-30 కి ప్రముఖ గాయని శ్రీమతి ఉష గారి అక్కగారు వచ్చి భక్తిగా అమ్మవారి పై పాటలు పాడారు .అదే సమయం లో ఇండియానుంచి ఉషగారు ఆమె కు ఫోన్ చేశారు ఆమెతో మా శ్రీమతి మా అమ్మాయి ఆవిడ ఫాన్ లమని గర్వం గా చెప్పారు .

30-9-17 శనివారం -యధావిధిగా పూజ అయ్యాక 9 వ రోజు చివరి రోజు సుందరకాండ పారాయణ పూర్తి చేసి సరికిఉదయం  10-45 అయింది .  ఇది నా 57 వ్యాపారాయణ .షార్లెట్ లో 3 వ పారాయణ .

 శ్రీ డొక్కా రామ్ గారు ఆస్టిన్ నుంచి పంపిన ఆత్మానందం ఆత్మారామం పుస్తకాలు అందాయి .అందినట్లు మెయిల్ ద్వారా తెలియజేసి గీర్వాణం -2 ఆయనకు పంపిస్తున్నానని  రాశాను .

  ఇవాళ విజయ దశమి నాడు మా అమ్మాయి పుట్టిన రోజు సందర్భంగా  మా ఉయ్యూరు శ్రీ సువర్చలాన్జనేయ స్వామి వారి దేవాలయం లో ప్రత్యేక పూజ ,చక్రపొంగలి రవ్వకేసరి పులిహోర ప్రసాదాలు చేయించాడు మా అబ్బాయి రమణ . మా మూడవ అబ్బాయి మూర్తి రాణి దంపతులు కూర్చుని సాయంత్రం శమీ  పూజ నిర్వహించారు .

            సశేషం

  మీ-గబ్బిట దుర్గా ప్రసాద్ -30-9-17 -కాంప్-షార్లెట్- అమెరికా

 .

గబ్బిట దుర్గా ప్రసాద్

దశాశల  దసరా పై నీళ్ళు చల్లిన వేళ

మా బామ్మర్ది బ్రాహ్మి దిగాలుగా మొగం వేలాడేసుకొని కాళ్ళు ఈడ్చుకుంటూ వచ్చి కుర్చీలో కూలబడ్డాడు .’’ఏం వాయ్ మై డియర్ షేక్స్పియర్ –పొద్దున్న చంద్రబాబిచ్చిన ఎల్ సి డి బల్బ్ లాగా వెలిగే మొహం తో వచ్చినవాడివి ,ఇప్పుడు నిరాహార దీక్షలతో సెల్ఫ్ గోల్ చేసు కొంటున్న ‘’ఫానాయన ‘’లాగా మొహం చాటేసుకొని వచ్చినట్లు వచ్చావ్ “’అన్నాన్నేను .’’అవును బావా !దసరా రోజున ఉద్దందపాలెం లో అమరావతి శంకు స్థాపనకు  మోడీ గారు వచ్చి ,యేవో కోటాను కోట్లు రాలుస్తాడనుకొన్నా.తీరా స్థాపన మాత్రం అయిందికాని వరాల జల్లు కురవ లేదు  దశాశల  దసరా రోజున చొప్ప దంటు ఉపన్యాసం తో నీళ్ళు గార్చి వెళ్ళిపోయాడు .అందుకే జీర్ణించుకోలేక జగన్ ఫెసేసుకొనొచ్చా.’’అన్నాడు .నాకు విపరీతంగా నవ్వు వచ్చి నవ్వేశాను .వాడికి ‘’ఎక్కడో ‘’కాలింది .’’ఇక్కడ కొంపలంటుకు పోతుంటే నీ నవ్వ్వేమిటి’’ బా ‘’.అన్నాడు ఏడవ లేక నవ్వుతూ  .’’ఒరే బామ్మర్దీ ! అసలు అంతటి ఆశలెందుకు ?అవి తీరలేదను కోవటమెందుకు ?’’అన్నాను .’’గొప్ప రాజ దాని అమరావతి నిర్మిస్తున్నాం .ప్రపంచ దేశాల వారంతా వస్తున్నారు .ఆరు కోట్ల ఆంధ్రులు ఎదురు చూస్తున్నశుభ ముహూర్తం సమయం లో సాక్షాత్తు ప్రధాని స్వయం గా పాల్గొని ఒక్క మాట అంటే ఒక్కమాట స్వయం ప్రతిపత్తి విషయం కాని హోదా విషయం కాని ,ప్రత్యెక పాకేజీ కాని ఏదీ ప్రకటించ కుండా’’ మూటల సంచీ’’ కాకుండా  ‘’మాటల సంచీ దులిపేసి ’’వెళ్ళిపోయాడు .కడుపు మండి పోతోంది  .  ‘’అన్నాడు ఆవేశం గా .’’అరే బాబా ! ఇప్పుడు బీహార్ ఎన్నికలు జరుగుతున్నాయి .సభలో కే సి ఆర్ ఉన్నాడు .మొదటి ది ఎన్నికల నిబంధనలకు విరుద్ధం ,రెండోది ప్రక్క రాష్ట్ర  సి ఏం కూడా ‘’నాకేంటి ?’’అని మొహం పెడితే మోడీ పరిస్తితి ఇబ్బందికరం .ఈ మాత్రం తెలియక పొతే ఎలా ?’’అన్నా .’’బీహార్ కు రెండు లక్షల కోట్ల సంచీ దులిపినోడు మనకు సగమైనా రాల్చక పోతాడా ?నాతొ సహా అను కొన్నారందరూ . ‘’అన్నాడు కన్నీళ్లు ఒక్కటే తక్కువ వాడికి .ఎందుకైనా మంచిదని కర్చీఫ్ మొహానికి అడ్డం పెట్టు కొన్నాడు పాపం .

‘’ఏదో ఉద్ధరిద్దామని  ఉద్దండ పాలెం వెళ్లావు కదా .! దాని గోప్పతనమేమిట్రా?శంకుస్థాపన అక్కడే ఎందుకు ?’’అడిగా .’’నాకేం తెలుసు’’ బా ‘’.’’ గుంపులో గోవింద’’ లా వెళ్ళా. అందరి తో పాటూ నేనూ ఆనందిద్దామని .ఇంతకీ దాని విశేషమేమిటి ‘’బా ‘’.అని అడిగాడు .’’ఏదైనా తెలుసుకొని వెడితే మంచిది .తెలియ కుండా వెడితే ఇలానే ఉంటుంది .అయినా అడిగావు కనక చెప్పాలను కొంటున్నాను .నీకు ఎన్ని దుర్గుణాలున్నా ,తెలుసుకోవాలన్న నీ తపన నాకు నచ్చింది ‘’అన్నాను .’’సరే బావా !చెప్పు .విని సంతోషిస్తా .’’అన్నాడు అరవిరిసిన మోము తో బ్రాహ్మి బామ్మర్ది .

‘’ఆంద్ర కర్నాటక రాజ్య సార్వ భౌముడు శ్రీ కృష్ణ దేవరాయలు తన దక్షిణ దేశ జైత్ర యాత్రలో ఉద్దండ పాలెం లో బస చేయాల్సి వచ్చింది .ఆయన సేనాని’’ ఉద్దండ రాయడు ‘’ఆ గ్రామం లో ఉండటం వలన దానికి’’ఉద్దండ రాయ పాలెం ‘’అని పేరొచ్చింది .ఇక్కడే కృష్ణానది రెండుపాయలైంది .ఈ రెండిటి మధ్య రాజధాని అమరావతి వెలుస్తోంది .వాస్తు రీత్యా చాలా అనువైన స్థలం . ఉద్దండ మహోద్దండం గా అమరావతి  ‘’అమృత నగరి’’  గా వెలిగి పోతుంది .’’అన్నాను ‘.

‘’మరి తుళ్ళూరు సంగతేమిటి ?’’ప్రశ్న సంధించాడు బ్రహ్మి .’’తుళ్ళూరు పూర్వం పేరు ‘’శివ తాండవ పురి ‘’అంటే శివుడు సంధ్యా నృత్యమైన ఆనంద  తాండవ నృత్యం చేసిన చోటు .తుళ్ళూరు పేరు రావటానికీ,రాయల వారి కధకూ సంబంధం ఉంది .రాయలు కొండవీడు ,విను కొండ దుర్గాలను స్వాధీనం చేసుకొని ,కొండపల్లి ని పట్టుకోవటానికి వెడుతూ కొంతకాలం ఈ ‘’శివ తాండవ పురి’’లో మకాం పెట్టాడు .రాయలు ‘’తుళువ ‘’వంశం వాడు కదా .జనం నోళ్ళలో తుళువ పేరు నాని నాని ‘’తుళ్ళూరు’’గా  మారిపోయింది ‘’అని చెప్పాను .మా వాడి ముఖం సహస్ర దళ పద్మం లా పూర్తి వికాసం పొందింది..దిగులు స్థానం లో జ్ఞాన జ్యోతి కనిపించింది .’’తుళ్ళూరు లో పరశురాముడు ప్రతిష్టించిన ‘’శ్రీ రామ లింగేశ్వర దేవాలయం ‘’కూడా ఉండటం తో’’ యాడెడ్ అట్రాక్షన్  ‘’అయింది అన్నా .

‘’పేపర్లలో ,మీడియా లో ‘’రాయ పూడి ‘’పేరు వినిపిస్తోంది .అ కధా ‘’కమా మీషూ ‘’ఏమిటి బా!’’అడిగాడు బామ్మర్ది .’’దీనికీ రాయలవారికీ సంబంధం ఉంది .తుళ్ళూరు నుండి కృష్ణానది దాటి కొండపల్లి కోటను ఆక్రమించుకోవాలి అన్న ఆలోచనలో రాయలవారున్న సమయం లో కృష్ణానదికి’’ పూటు ‘’గా వరదలొచ్చాయి  .వరద ఉధృతిలో   నదిని దాటటం క్షేమం కాదని నిపుణులు సలహా ఇవ్వటం తో ,ఇప్పుడు రాయపూడి అనే పేరుతొ పిలుస్తున్న గ్రామం లో మకాం వేసి వరద తగ్గే దాకా నిరీక్షించాడు .రాయలున్న ఈ గ్రామం ఆయన పేరుతొ ‘’రాయ పూడి ‘’అయింది .అమరావతి ప్రభువు వాసి రెడ్డి వెంకటాద్రి  నాయుడు రాయ పూడిలో శ్రీ వేణు గోపాల స్వామి ఆలయ నిర్మాణం చేశాడు .ఈయనే అమరావతిలో అమరలింగేశ్వర దేవాలయం కట్టించాడని మనకు తెలుసు కదా ‘’అన్నాను .

‘’  అమరలి౦గేశ్వరాలయం’’విశేషాలింకా ఏమైనా  ఉన్నాయా ?’’అని అడిగాడు బ్రాహ్మి .’’అవున్రా ఉన్నాయి .ఇక్కడ పౌరాణిక ,చారిత్రిక విషయాలు రెండూ కలగలిసి ఉన్నాయి .మొదట్లో అమర లింగేశ్వర స్వామి విగ్రహం ‘’మల్కపురం ‘’అనే గ్రామం లో ‘’శివాలయం ‘’లో పడి ఉండేది .ఒక రోజు రాత్రి దొంగలు ఈ విగ్రహాన్ని దొంగిలించి పారి పోతుంటే నందీశ్వరుడు వెంబడించాడు .దొంగలు భయ పడి పారి పోతూ అమరేశ్వర లింగాన్ని కృష్ణా నదీ తీరం లో వదిలేసి పారిపోయారు. ఈ లింగాన్నేఅమరావతి లో  వాసి రెడ్డినాయుడు ప్రతిస్టించాడు..అసలీ విగ్రహాన్ని ప్రతిష్టించిన వాడు సాక్షాత్తు ఇంద్రుడే అని మనకు తెలుసు .ఇంద్ర ప్రతిష్ట కనుక అమరలి౦గేశ్వరుడైనాడు  .’’చెప్పా .

‘’బాగుంది బావా !మరిన్ని విశేషాలు చెప్పి నా షేక్స్ పియర్ మొహం లో నవ్వులు పూయించు ‘’అన్నాడు .’’సరే విను .ఈ ప్రాంతం లో శాతవాహన ,కాకతీయ ,చాళుక్య రాజుల పరిపాలనా ప్రభావమూ ఉంది .రాణి రుద్రమ దేవి తండ్రి కాకతి గణపతి దేవ చక్ర వర్తి ఎన్నో దాన ధర్మాలు చేసినట్లు చారిత్రకాధారాలున్నాయి .పైన చెప్పిన మల్క పురం గ్రామం లో అలాంటి ఒక శాసనం కనిపిస్తుంది .దీనిలో కాకతీయ వైభవాన్ని ,రుద్రమ దేవి శౌర్య పరాక్రమాలను తెలుసు కోవచ్చు .రుద్రమ దేవి మంత్రి శివ దేవయ్య ‘’మండడం ‘’గ్రామం లో శివ లింగం ప్రతిస్టించాడు .’’అన్నాను .

‘’  అమరావతి అంటే  బౌద్ధం వికసించిన చోటు ‘’అంటారు కదా బావా ?’’అన్నాడు .’’అవున్రా !క్రీ .పూ. 563-483 ప్రాంతం లో గౌతమ బుద్ధుడు బౌద్ధ మత ప్రచారం చేస్తూ ఈప్రాంతానికి వచ్చాడు .బీజాక్షరాలను ఇక్కడ నిక్షిప్తం చేయటం వలన ఇది ‘’ధరణి కటకం ‘’అయింది .అదే వాడుకలో ధాన్య కటకం అయింది .చివరికి ‘’ధరణి కోట ‘’అయింది .రాజులకు కోట ముఖ్యం .కోట ఉన్న చోట రాజధాని ఉండటం సాధారణం .కనుక నవ్యాంధ్ర రాజధాని అమరావతి లో నిర్మించటం అన్ని రకాలా సర్వోత్త్తమంగా అందరూ భావిస్తున్నారు .ఇంద్ర ,పరశురామాది పురాణ పురుషులు ,రాయలు , గణపతిదేవుడు  మొదలైన చక్ర వర్తులు ,అహింసా మూర్తి గౌతమ బుద్ధుడు నడయాడిన పవిత్ర స్థలం .కనుక సర్వ విధాలా శ్రేష్టమైన నగరం అమరావతి .’’అన్నాను ఆయాసపడుతూ .

‘’మొదట్లో తిట్టినా ,చివరికి ఏదో తాయిలం నోట్లో పెట్టి నోరు మూయిస్తావు .ఎన్నో సంగతులు తెలియ జెప్పావు బావా .ఇక బాబు ఇచ్చిన ఎల్ సి డి బల్బ్ లాగా వెలిగే ఫేస్ తో వెళ్లి పోతా.ఇన్ని విషయాలు ఎలా తెలిశాయి బావా ?’’అని బోల్డు ఆశ్చర్య పడ్డాడు .’’బ్రాహ్మీ! వీటిని పద్మశ్రీ తుర్ల పాటి కుటుంబరావు గారు సేకరించి రాస్తే బుధవారం ఆంద్ర జ్యోతి లో ప్రచురిస్తే చదివి తెలుసుకొన్నాను .నీకు చెప్పాను .నీకు చెప్పటమేకాదు ,ఆ రోజే దాన్ని సాహితీ బంధు లకు నెట్ లో పంపాను కూడా . ‘’అన్నాను .ఒక్క క్షణం ఆగకుండా మా వాడు దౌడు తీశాడు ఇంటికి .

మీ-గబ్బిట దుర్గా ప్రసాద్ -23-10-15-ఉయ్యూ

—

మా బామ్మర్ది డౌట్లు

ఒగరుస్తూ ఆపసోపాలు పడుతూ చమటలు ,నురుగులు కక్కుకుంటూ పరి  గెత్తుకొచ్చాడు మా బావమరది బ్రహ్మం .వీడేదో కంగారులో ఉన్నాడనుకొని ‘’ఏమిట్రా విశేషాలు ‘’?అడిగా .మాట్లాడకుండా లోపలికెళ్ళి వాళ్ళ అక్కయ్య   ఇచ్చిన చెంబెడు కాఫీ తాగి చొక్కాతో మూతి తుడుచుకొంటూ త్రేనుస్తూ వచ్చి నా ప్రక్కన కుర్చీలో ఆసీసునుడయ్యాడు .’’అది కాదు బావా !మోడీ నవాబ్ షరీఫ్ మీద సేక్సికల్ ఆపరేషన్ చేశాడని అందరూ కోడై కూస్తుంటే ఇంత నిబ్బరంగా ఎలా ఉన్నావు ‘’?అన్నాడు  .తెల్లబోయా .సేక్సికల్  ఆపరేషన్  ఏమిటో అని గాబరా పడ్డాను .కాసేపు వితర్కిన్చుకొని ‘’ఒరే ఫూలా !అది సర్జికల్ ఆపరేషన్ .దానికీ సెక్స్ కూ ఏమీ సంబంధం లేదు .సగం సగం విని వచ్చి నోటికొచ్చింది కూసి చివాట్లు తింటావు ‘’అన్నాను .’’ఏదో అదే అయి ఉంటుంది .ఎందుకు చేశాడు బావా ?అడిగాడు .’’మన సరిహద్దు దాటి పాక్ ఉగ్ర వాదులు అర్ధ రాత్రి మనమీద బాంబు లేసి మన జవాన్లను చంపి పారిపోయారు .ఊరు కొంటె ఇంతే అవుతుందని సైన్యం మనమేమిటో ,మనసత్తా ఏమిటో చూపించ టానికి అకస్మాత్తుగా వాళ్ళున్న ప్రాంతంలోకి వెళ్లి ఉగ్రముఠాను చంపి పబ్లిగ్గా  మన వాళ్ళు  చేసిన సాంపిల్ ఆపరేషన్ నే సర్జికల్ ఆపరేషన్ అన్నారు .అంటే శస్త్ర చికిత్స . దుస్టాంగాన్ని ఖండించి ,శేషాంగాన్ని కాపాడటం అన్నమాట .’’అబ్బే వాళ్ళు మా మీదికి రానూ లేదు ,సరిహద్దు దాటనూ లేదు  మా వాళ్ళు అసలు ఎవరూ చావనూ లేదు ‘’అని బుకాయి౦ఛా డటగా నవాబ్ షరీఫ్ ‘’బామ్మర్ది ప్రశ్న .’’అరె నీకూ విషయాలు తెలుసు  నన్ను ఎందుకు మళ్ళీ వాయించటం ‘’అన్నాన్నేను .’’తెలుసనుకో బా .నీ నోటి నుంచి వింటే క్లియర్ కట్ గా ఉంటుందని నా ఏడుపు ‘’అన్నాడు .’’నిజమే .కాని వాళ్ళ సైనికాధికారి  నాలుగు రోజులక్రితం మన సర్జికల్ ఆపరేషన్ నూటికి రెండువందల శాతం నిజంగా జరిగిందని చెప్పేశాడు .పాక్ మీడియా  అంతకు ముందే చానళ్ళలో అన్నీ స్పష్టంగా చూపింది .మన దేశం లోనూ లెఫ్ట్ పార్టీలు ,వాళ్ళ తోక రాహుల్ కూడా పాక్ కే వంత పాడినా సోనియా నిక్కచ్చిగా మోడీని అభి నంది౦చి౦ది .’’అన్నాను .

‘’మన రాజకీయ నాయకులూ ఇలాంటి ఆపరేషన్లు చేస్తూనే ఉన్నారు కదా బావా ‘’?బ్రహ్మం మళ్ళీ ప్రశ్న .’’అవున్రా .కె సి ఆర్ జిల్లాలు పెంచటానికి సర్జికల్ ఆపరేషన్ చేస్తున్నాడు .అది అతి రహస్యం .ఏ జిల్లా పెరుగుతుందో ఏది తగ్గుతుందో తెలీని పరిస్థితి .అక్కడ మామా అల్లుడు కొడుకు కూతుళ్ళకు తప్ప బ్రహ్మ దేవుడికి కూడా ఆఆపరేషన్  రహస్యం తెలియదు ‘’అన్నా .’’మరి బాబు ఏమీ ఆపరేషన్ చేయటం లేదా “మరో లకోటా ప్రశ్న .’నెలకు మూడు సార్లు ధిల్లీ చుట్టూ తిరిగి శాలువాలు బొకేలతో ప్రసన్నం చేసుకొనే ప్రయత్నం చేసినా బిగుసుకు కూర్చున్న కేంద్రాన్ని ‘’మీతో కటీఫ్ ‘’అని సర్జికల్ ఆపరేషన్ చేశాడుకనుకనే ప్రతి పత్తి పక్కకు పెట్టి ‘’పాకేజీ అంటూ ఏదో ప్రకటించారు కదా .దీనికీ రఘువీర జగన్ లు వీరంగం వేశారు కాని ప్రస్తుత పరిస్తితులలో అంత కంటే ఊరట ఉండదుఅని బాబూ సర్దుకోవాల్సి వచ్చింది .’’చెప్పాను .’’సరే బావా ! చంద్ర బాబు ఎప్పుడూ టెలి కాన్ఫరెన్స్ లంటూ హడా విడి చేస్తాడు .వాళ్లకు విసుగు అని పించదా’’మళ్ళీ ప్రశ్న దాడి .’’కనకనే  ఆ వీడియో కాన్ఫరెన్స్ లో ప్రజాప్రతినిధులు ,ఆఫీసర్లు హాయిగా సైలెంట్ గా నిద్ర అనే సర్జికల్  ఆపరేషన్ లో ఉంటున్నారని వీడియో క్లిప్పింగ్ లు ,పేపర్లు చూపిస్తున్నాయి .రుద్దుడు ఎక్కువైతే బోర్ కొట్టదా .కొంతకాలమైనా వాళ్ళు ఆలోచించుకొని పని చేయాలి కదా .ఎప్పుడూ కొరడా ఝపిస్తే తిరుగుబాటు సర్జికల్ ఆపరేషనో,సైలెంట్ నిద్ర ఆపరేష నే  ఫలితం అవుతుంది  .’’అన్నాను .’’ఎన్ని విషయాలు నీకడుపులో ఉన్నాయి బావా ‘’అన్నాడు అరగుండు బ్రహ్మానందం లాంటి మా బామ్మర్ది బ్రహ్మం .

‘’జగన్ సంగతేమిటి “”?మరో ప్రశ్న సంధించాడు .’’ఇమడలేక పోతున్నాడు .అయిన దానికీ కాని దానికి నిరశన ,వాకౌట్ ,బూతుల సర్జికల్ ఆపరేషన్ నిరంతరం చేస్తూనే ఉన్నాడు కదా .కావలి౦తల ముద్దుల ఆపరేషన్ లో దిట్ట ,పలకరింపుల ,ఓదార్పులసర్జికల్ ఆపరేషన్  సెంచరి పూర్తీ చేశాడు .కాని ఆపరేషన్  సక్సెస్ పేషెంట్ డైడ్ పరిస్థితి అతనిది ‘’అన్నాను .’’బావా క్రికెట్ —‘’అన్నాడు నెమ్మదిగా .’’దానిదేమున్దిరా .కోహ్లీ వచ్చాక సెంచరీల సర్జికలపరేషణ్ తో క్లీన్ స్వీప్ విజయాలిస్తున్నాడు కదరా ‘’అన్నా.’’అడగచ్చో లేదో తెలీదుకాని తమిళ నాడు సంగతేంది బావా ?’’’’ఏముంది రా .ఆవిడకు ఆరోగ్యం బాగా లేకపోతే ,హాస్పిటల్ లో చేరి చికిత్స చేయి౦చు కొంటుంటే కళ్ళ జోడు ముసలాయన విమర్శల సర్జికల్ ఆపరేషన్ మొదలెట్టాడు .ఇప్పుడు పరిస్థితి కుదుట బడింది .’’చెప్పా . ‘’బావా !అమరావతి నిర్మాణం ఆపరేషన్ సంగతేమిటి ?’’మరో బాణం .’’ప్లాన్ల మీద ప్లాన్లు మారుస్తున్నారు .అయినా పట్టు వదలని విక్రమాదిత్యుడు బాబు ‘’అల్టిమేటం అనే సర్జికల్ ఆపరేషన్ చేయగానే అందరూ బిలబిల మంటూ వచ్చి చేరి పని చేసుకొంటున్నారు .పిల్లి మెత్తనిదైతే ఎలుక ఏదో చేసిందని సామెత తెలుసుగా నీకు “.అన్నాను .’’చివరగా దసరా విషయం చెప్పు బావా ?’’అడిగాడు ఫైనల్ గా .’’ఒక రకం గా దసరా మామూలు అనే సర్జికల్ ఆప రేషన్ చేసే జేబుకు చిల్లి పడేసే జనం తగ్గి పోయారు ఈ సేవా మీ సేవా లవలన.అడిగే వాడూ లేడూ ఇచ్చే వాడూ లేక దసరా దేవాలయాలలో భక్తుల దర్శన సర్జికల్ ,అమ్మవారి అలంకార ఆపరేషన్ లతో మూడు పూలు ఆరు కాయలలాగా వర్ధిల్లు తోంది .’’అన్నాను .వెళ్ళొస్తా బావా ‘’అంటూ తుర్రుమన్నాడు బామ్మర్ది బ్రహ్మ౦.

మీ-గబ్బిట దుర్గా ప్రసాద్ -10-10-16 –ఉయ్యూరు

—

అమెరికాలో తెలుగు యువ అవధాన తేజం————————-
పక్కనే పారుతున్న గోదావరి గలగలతో పోటీ పడి అమెరికాలో ప్రవహిస్తున్న అవధాన చమక్కులు.
దత్తపదిలోపృచ్ఛకు లెవరో బాలు, కాలు, చాలు, పాలు పదాలతో భారత్,పాకిస్థాన్ క్రికెట్ మ్యాచ్ ని వర్ణించమని అడిగితే మరుక్షణంలో సమాధానం వచ్చేసింది తేటగీతిలో
బాలు వేసిన వెంటనే బ్యాటునూప
కాలుతగులునో యనుచు ప్రేక్షకులు చూడ
జయము పొందిన జనులు వాచాలులైరి
భరతమాతకు మురిపాలు సరణి మెఱసి

గణపతిని స్తుతించ మన్నారు మరో పృచ్ఛకుడు నిషిద్ధాక్షరిలో. వెంటనే కందము లో వందనమన్నాడు పదహారేళ్ళ ఆ అవధాని.

దేహీ యంచున్ శ్రీలన్
భీహారీ ధీర కాచు వేనన్ గ్లౌభా
నీహార రదన భాసా
పాహీయని వేడుచుంటి భద్రే౦దుముఖా!

సభాప్రాంగణమంతా ఒకటే చప్పట్లు. ఆ బాల అవధాని ప్రతిభకు ప్రశంసలు అంతకుమించి సభాసదులు మోముల్లో ఆశ్చర్యానందాలు.

తెలుగునాడుకు వేల మైళ్ళ దూరంలో వున్న అమెరికాలో పుట్టి అమెరికాలో పెరిగి కనెక్టికట్ లో పన్నెండో తరగతి చదువుతున్న గన్నవరపు లలిత్.
16 ఏళ్ళ వయసులోనే అవధానాలు చేస్తున్నాడు . ఇంత చక్కగా పద్యాలెలా చెప్తున్నావని అడిగితే యిలా చెప్పుకొచ్చాడు.

మా అమ్మ శైలజ, మానాన్న మారుతి శ్రీధర్. హైదరాబాద్ నుంచి 1996 లో ఉద్యోగ రీత్యా న్యూ యార్క్ వెళ్లి అక్కడే స్థిరపడ్డారు. నేను అక్కడే సెప్టెంబర్ 23 , 2000 లో పుట్టాను.
మా తాతల కాలం నుంచీ సాహిత్యం మీద ఆసక్తి, ప్రవేశం కలిగిన కుటుంబం మాది.
ఇంట్లో అమ్మా, నాన్న ఎప్పుడూ తెలుగులోనే మాట్లాడే వారు.అలా నా చిన్నతనం నుంచీ
మనభాష అలవాటైంది. బడిలో ఆంగ్లం. యింటికి వచ్చాక తేట తెలుగు.అప్పుడప్పుడూ మనదేశానికి వచ్చినప్పుడు బంధువుల దగ్గరికి వచ్చి పోతుండడం తో భాష మీద పట్టు యింకా పెరిగింది. మా నాన్నకు తెలుగు పద్యాలంటే చాలా యిష్టం. నాకు మూడేళ్ళ వయసునుంచే సుమతి శతకం, వేమన పద్యాలు నేర్పించేవారు.అమ్మ ఇతిహాసాలు చెబుతుండేది.
చిన్నప్పటినుంచీ యింట్లో వుండే భారత రామాయణాలు చదివేవాడిని. సుందరకాండ
చదువుతున్నప్పుడు కలిగే ఆనందం వర్ణనకు అందదు. భారతం లో ఆది, విరాటపర్వాలు చదివాను. పోతన పద్యాలు నేర్చుకుంటూ భాగవత మాధుర్యాన్ని ఆస్వాదించాను.
మనుచరిత్ర, మొల్లరామాయణం, కరుణశ్రీ కవితా సంపుటాలు చదివాను. శ్రీనాథుడు నాకు చాలా ఇష్టమైన కవి.ఆయన శైలి విశ్వనాథగారి పద్యాల్లోనూ కనిపిస్తుంది.

జాషువా, శ్రీ శ్రీ సాహిత్యాలతోనూ, పరిచయం వుంది.పాఠశాల చదువు, సాహితీ సాధన, మధ్య ఎలాంటి ఇబ్బందీ కలుగకుండా ప్రణాళిక వేసుకొని చదువుకునే వాడిని.పైగా ఏకాగ్రతతో చదవడం అలవాటైంది.
సాహిత్యము కాకుండా వీణ నేర్చుకుంటున్నాను.
టెన్నిస్, బ్యాడ్మింటన్ కూడా ఆడతాను.

ఎనిమిదో తరగతి చదువుతున్నప్పుడు సంస్కృత వ్యాకరణం, కావ్య పాఠాలూ నేర్చుకోవాలనిపించింది. గురువు కోసం ఆన్ లైన్లో వెదికాను.రాజమహేంద్ర వరానికి చెందిన కామేశ్వరరావు గారు పరిచయమయ్యారు.
నా ఆసక్తిని చూసి ఆయన ఆన్ లైన్లోనే పాఠాలు చెప్పడం ప్రారంభించారు. 2013 లో
అలా ఆయనతో ఏర్పడిన పరిచయం కుటుంబ స్నేహంగా మారింది.గురువుగారి దగ్గర
రఘువంశం లో మొదటి సర్గ, లఘు సిద్ధాంత కౌముదిలో సంజ్ఞాప్రకరణాలు, పంచ సంధులు నేర్చుకున్నాను. అలాగే అమెరికాలోనే మల్లాప్రగడ శ్రీనివాస్ గారి దగర వేదంలో శిక్షణ తీసుకున్నాను. పంచసూక్తాలు,నమక,చమకాలు, తైత్తిరీయోపనిషత్తు,
మహానారాయణోపనిషత్తు, మహన్యాసం, అరుణం అభ్యసించాను. అలా సంస్కృతంలో పట్టు వచ్చింది. మా యింటికి సమీపంలో వున్న సరస్వతీదేవి ఆలయంలో రోజూ ఆసక్తి వున్నవారికి ఆ భాషను నేర్పుతున్నాను.నా దగ్గరికి వచ్చే వాళ్లంతా నలభై ఏళ్లకు పైబడినవారే. వారంతా నన్ను తమ బిడ్డ లాగే చూసుకుంటారు.

అంతకుముందే నేను గరికిపాటినరసింహారావు, గారి అవధానాలు చూశాను. ఆయన చమత్కారం చాలా నచ్చింది.అలాగే మేడసాని మోహన్ గారి పద్యధార కూడా.వాళ్ళ ప్రేరణతో నేనూ అవధానం చేయాలనుకున్నా. నా విద్యార్థులలో ఒకరితో ఈ విషయం గురించి మాట్లాడినప్పుడు, ఆయన రాజమహేంద్రవరం లోని తన మామగారితో మాట్లాడించారు.అలా అవధానగురువు ధూళిపాళ మహాదేవమణి గారితో పరిచయం కలిగింది. ఈ ఏడాది మార్చి నుంచీ ఆయన ద్వారా వాట్స్ ఆప్ లో అవధానం నేర్చుకోవడం మొదులు పెట్టాను, వాట్స్ ఆప్ లోనే సమస్యలు, యిచ్చి పద్య౦ పూరించమనేవారు. నేను వ్రాసిన వాటిని సరిదిద్దుతూ,సమాధానం పంపేవారు. అలా అవధానం లో పట్టు సాధించాను.
సంస్కృత గురువు కామేశ్వరశర్మ గారింటికి గతం లో వచ్చాను.అయితే మహాదేవమణి
గారిని నేరుగా ఎప్పుడూ కలవలేదు. ఎలాంటి విద్యయైనా గురుముఖంగా నేర్చుకోవడం ఉత్తమ లక్షణం. ఇటీవల అమ్మా,నాన్నలతో హైదరాబాద్ వచ్చినప్పుడు యిద్దరు గురువులతో మాట్లాడి రాజమహేంద్రవరానికి వచ్చాను. వాళ్ళిద్దరినీ కలిసి మాట్లాడి, నా సందేహాలను నివృత్తి చేసుకున్నాను. ఇప్పుడు వారి సమక్షంలో అవధానం చేయటం చాలా సంతోషాన్ని కలిగించింది. పృచ్ఛకులు అడిగిన ప్రశ్నలకు సమాధానాలు చెబుతూ, వారి ప్రశంసలు పొందిన ప్రతిసారీ ఉత్సాహం ఉప్పొంగేది.
ఇప్పటికి రెండు అవధానాలు చేశాను. అంతగా యిబ్బంది అనిపించలేదు. ఒకదాంట్లో
‘వారిణీతం తానమాడ పాపంబోవున్’ అన్న సమస్య యిచ్చారు. ‘వరి’ని ‘త్రోవరి’ చేశాను.
దాంతో తేలికై పోయింది. ‘డీ మహనీయమూర్తి’ అన్న సమస్య యిస్తే ‘మోడీ మహనీయ మూర్తి’ అని పూర్తి చేశాను. సాధనా సమయం లో మాత్రం ఒకసారి కష్టంగా అనిపించింది.

‘పిల్లిని పెండ్లియాడి శరభీశ్వరుడంతట బ్రహ్మసాక్షిగా’ సమస్య దీన్నెలా పూరించాలో తోచలేదు. కాసేపటికి ఆలోచన తట్టింది. ఈశ్వరుడు అమ్మవారిని పెళ్లాడినప్పుడు ఆమె ఎలా ఉందంటే, రూపంలో మెరుపుతీగె,గమనంలో గజగమని లా, పరిమళంతో పునుగుపిల్లిలా అని పూరించాను. అవధానం లో దత్తపది ఇంకేవైనా పృచ్ఛకులు ప్రశ్నించి ఊరుకుంటారు. అదే ‘నిషిద్ధాక్షరి’ అయితే ముఖాముఖి స్పర్థలా ఉంటుంది.
అందుకే ‘నిషిద్ధాక్షరి’ అంటే నా కిష్టం.

నా పద్య ధారణ చూసి స్నేహితులు ముచ్చట పడుతుండేవారు. ఇంట్లోవాళ్ల మాటైతే చెప్పనక్కరలేదు. తెలుగు,సంస్కృత సాహిత్యాలను యింకా అధ్యయనం చెయ్యాలి.

ఎప్పటికైనా ఒక మంచి పుస్తకం వ్రాయాలనేది నా కోరిక

తెలుగు కీర్తి దేశదేశాల చాటి౦చి
రాణకెక్కినట్టి రస విలాసి
తెలుగు మహిమ లెల్ల తేజరిల్లగ జేయు
తెలుగుతల్లి వెలుగు తెలుగు వెలుగు.

చిరంజీవి గన్నవరపు లలిత్ !
చిరంజీవ! సుఖీభవ! సుఖీభవ!
(తెలుగువెలుగు మాసపత్రిక సౌజన్యముతో)

  వీక్లీ  అమెరికా -26 (18-9-17 నుండి 24-9-17 వరకు )-2

57 వ సుందరకాండ ,3 రుద్రాభిషేకాలు 4 భోజనాల వారం -2

24-9-17 ఆదివారం -సాయి పవన్ పద్మశ్రీ దంపతుల ఇంట్లో రుద్రాభిషేకం

 శ్రీ కృష్ణాష్టమి నాడు మా ఇంట్లోభజన రోజునే సాయి తో  వీలున్నరోజు ఉదయమే మహాన్యాసం తో దశశాంతులు సామ్రాజ్య పట్టాభిషేకం తో రుద్రాభిషేకం జరిపి అష్టోత్తర సహస్ర శివ పూజ ,బిల్వాష్టోత్తరం తో మనం నలుగు రైదుగురం ఒకరి ఇంట్లో ‘’మోడల్ రుద్రాభిషేకం ‘’చేసుకొందాం ‘’అన్నాను క్షణం ఆలోచించకుండా ‘’మా ఇంట్లోనే చేద్దాం .అన్నయ్య రాంకీని వేలూరి పవన్ ను కూడా సంప్రదించి డేట్ ఫిక్స్ చేస్తాను అసలు నా మనసులో ఉన్న మాట మీరే ముందు చెప్పేశారు ‘’అన్నాడు సంతోషమేసింది .సుమారు 15 రోజులక్రితం వాళ్ళఇంటికి మా మనవళ్లను సంగీతం క్లాస్ కు తీసుకు వెళ్ళినప్పుడు అతనే ఈ విషయం మళ్ళీ ప్రస్తావించి తన ఇంట్లోనే 24-9-17 ఆదివారం ఉదయం 7-30 కే   ఏర్పాటు చేశానని  చెప్పాడు సరే అన్నాను . ఆ తర్వాత మెయిల్ లో మళ్ళీ తెలియ జేస్తాడేమోనని అనుకొన్నా  .నేను నవరాత్రి సందర్భం ఉదయం మా ఇంట్లో   21-9-17 గురువారం 25-9-17 సోమవారం మహాన్యాసం తో అభిషేకం  22-9-17 శుక్రవారం నుండి 30-9-17  శనివారం ఉదయం నా 57  వ (షార్లెట్ లో 3 వ)శ్రీ సుందరకాండ పారాయణ చేస్తున్నట్లు అందరికి తెలియ జేశాను . సాయి ఇంట్లో ఉదయం 7-30కి అభిషేకం కనుక ఆ రోజు ఆదివారం నా కార్యక్రమం తెల్లవారుఝామున 4 గంటలకే అనీ ముందే అందులో రాశాను . సాయి నుంచి కన్ఫర్మేషన్ వస్తుందనుకున్నాను .మా అమ్మాయికి మెసేజ్ వచ్చినట్లు చెప్పింది సరే .

       అందుకని ఈ ఆదివారం ఉదయం 4 గంటలకే ప్రారంభించాలనుకొని ,శనివారం రాత్రి ఇంటికొచ్చేసరికి 11 దాటటం ఫోటోలు పంపటం తో 12 -30 దాకా నిద్ర లేదు . కలత నిద్ర కొంత సేపు పోయా .మూడింటికి అలారం పెట్టుకున్నా .సుందరానికి తొందరెక్కువ ‘’అన్నట్లు ‘’మాసుందరికి’’నిద్రరాక అర్ధరాత్రి 2 గంటలకే లేచి కాఫీ ఏర్పాటు చేసింది . నేనూ 3 గంటలకే లేచి స్నానాదికాలు పూర్తి చేసి 3-30 కు కూర్చుని నిత్యపూజ శ్రీ ఆంజనేయ అష్టోత్తర సహస్రనామ పూజ శ్రీ లలితా అష్టోత్తర ,దుర్గా సరస్వతీ ,గౌరీ గాయత్రీ అన్నపూర్ణా అష్టోత్తరాలతో శ్రీసూక్తం గా నిత్యం చేస్తున్నట్లే చేసి ,సుందరకాండ మూడవ రోజు పారాయణ చేసి శతకం చదివి పూర్తి చేసేసరికి ఉదయం 6 అయింది . టాప్ గా హాయిగా సంతృప్తిగా చేసుకొన్నాను రోజూ ఏదో ఒక ప్రసాదం మా శ్రీమతి చేస్తే నైవేద్యం పెడుతున్నా. .ఇవాళ పాలలో అటుకులు నానేసి ఇచ్చింది .  రామకోటి రాసి భగవద్గీత చదివి డైరీ రాసి  పాలటు కుల నైవేద్యం తిని మందులు వేసుకొని సాయి వాళ్ళ ఇంటికి వెళ్ళటానికి నేను 6 -30 కె రెడీ అయ్యానన్నమాట  .మా రైడర్ అంటే మా అమ్మాయి విజ్జి లేచి కాఫీ తాగేసరికి ఏడున్నర దాటింది .రెండోసారికాఫీ తాగి ఆ మేము ముగ్గురం కారెక్కేసరికి 7-53 .సాయి వాళ్ళ ఇంటికి 8-15 కు చేరాం .అప్పటికే రాంకీ  సాయిలు అభిషేకం డ్రెస్ లో తయారు గా ఉన్నారు ఏర్పాట్లు కూడా పూర్తయ్యాయి .వంటలు కూడా  చేస్తున్నారు  మాకు కాఫీ ఇచ్చారు ,ప్రభల ప్రభాకర్ గారూ వచ్చే ఉన్నారు .అంతా సరి చేసుకొని పూజ అభిషేకం ప్రారంభించేసరికి ఉదయం 9 అయింది . నేను కూడా కూర్చుని అభిషేకం చేసుకొందామన్న ఉద్దేశ్యం తో వచ్చాను వాళ్ళు అన్నీ గురుముఖతా నేర్చినవారు ,ఇలాంటి అభిషేకాలు వాళ్లకు కొట్టిన పిండి వారి తండ్రిగారు తాతగారు వీరి సోదరులను ఇందులో తీర్చి దిద్దారు కనుక వాళ్ళ ఆధ్వర్యం లో నేను మనస్ఫూర్తిగా అభిషేకం చేసుకొనే భాగ్యం కలిగిందికదా అని సంబరపడ్డాను .కానీ సాయి బాంబు పేల్చాడు ‘’మీరే మాతో చేయించాలి మీ ఆధ్వర్యం లోనే జరగాలని మా కోరిక అన్నాడు ‘’రోట్లో తలపెట్టి రోకటి పోటుకు వెరవనట్లు అయిష్టంగానే సరే అన్నాను .అలామొదలైంది ఇక్కడి రుద్రం .అందరం కలిసి మంత్రాలు చదువుతూ గణపతి పూజ ప్రారంభించాం.  సాయి పద్మశ్రీ దంపతులు కూర్చుని పూజ చేశారు .పద్మశ్రీ పట్టుబట్ట కాషాయ బోస్ గా కట్టి సంప్రదాయంగా పెద్ద ముత్తైదువగా వ్యవహరించింది . ప్రభాకర్ ,వేలూరి పవన్  సాయి వాళ్ళ ఇంటి పక్కనున్న తమిళ దంపతులతో భర్త కూడా అభిషేకం లో కూర్చున్నారు బులుసు సాంబమూర్తి గారు పద్మజ  దంపతులు వచ్చారు .సాయికి బంధువుతో స్నేహితుడా శ్రీమతి విద్యుల్లత  భర్త  కూడామాతో పట్టుబట్టలతో కూర్చున్నారు .బులుసువారు ‘’సివిల్ డ్రెస్  ‘’లో ఉండటం ,పిల్లల డ్రాపింగ్ పికప్ డ్యూటీ ఉండటం తో మాతో కూర్చోలేదు వాతావరణం  చాలా బాగాపవిత్రంగా  సెట్ అయింది

 .సాయి ఇంట్లో అభిషేకానికి కావాల్సిన సామగ్రి అంతా ఉంది .అందరికి రాగి పంచ పాత్ర ఉద్దరిణె  రాగి పాత్రలున్నాయి అభిషేకం చేయటానికి  అనువైనఇత్తడి వేదిక ఉంది  .దానిపై శివలింగాలను వాళ్ళు తమ విధానం లో చక్కగా అమర్చాడు సాయి .నా సాలగ్రామాలు ఆంజనేయ విగ్రహం ,స్పటిక లింగాన్ని కూడా అమర్చాడు . పంచామృతాలతో అభిషేకానికి ఏర్పాట్లు జరిగాయి . ఆవాహన అయ్యాక మహాన్యాసం ప్రారంభించాం రాంకీ సోదరులు నేనూ ,ప్రభాకర్ చదివాము . కనుక మూడు సార్లు చేస్తే 11 ఆవర్తనాలు పూర్తి అవుతాయని మొదటి నమకం తర్వాత నాలుగు చమక అనువాకాలు ,రెండో నమ్మకం తర్వాత మరో నాలుగు చమక అనువాలాలు మూడో నమకమ్ తర్వాత 3 చమకానువాకాలతో ఏకాదశ రుద్రాభిషేకం  తర్వాత వాళ్ళపద్ధతిలో పంచసూక్తాలు  నా పద్ధతిలో దశ శాంతులు సామ్రాజ్య పట్టాభిషేకం ,శివాష్టోత్తర సహస్రనామ బిల్వాష్టోత్తర పూజ చేసాం పుష్పాలంకారం సాయి చాలా ముచ్చటగా చేశాడు బాగా ఆకర్షణీయంగా ఉంది . అంతా అయ్యేసరికి నాలుగున్నర గంటల సమయం పట్టి మధ్యాహ్నం 1-30 అయింది .ఆరగా ఆరగా ‘’అరకొడుతూ’’అంటే కాఫీ తాగుతూ ఉచ్చై శ్వరం తో జరిపాం  ఆతర్వాత ఉద్వాసన .సాయి దంపతులకు ‘’గీర్వాణ కవుల కవితా గీర్వాణం -1 మొదటిభాగం కానుకగా ఇచ్చాము .తర్వాత భోజనాలు . ఆరవ దంపతుల తండ్రి మద్రాస్ లో కేటరింగ్ ఎక్స్పర్ట్ పేరు పద్మనాభన్ .చెన్నై అన్నా నగర్ లో ఉంటారట అడ్రస్ ఇచ్చి వచ్చినప్పుడు తప్పక రమ్మన్నారు .ఆయన ,కూతురు ఇక్కడ సాయి వాళ్ళ ఇంట్లో వంట చేశారు . నాకోసం వంకాయ కూర అందరికోసం దొండకాయ కూర ,పప్పు వడ పులిహోర  కరివేపాకు పులిహోర  అల్లం చట్నీ సాంబారు పెరుగన్నం తో భోజనం  .నేను ఒకటిన్నర వడ  కొద్దిగా పప్పన్నం  పులిహోర ,కొంచెం సాంబారన్నం ,పులిహోరలో పెరుగు తో లాగించాను .అల్లం చట్నీ బాగా ఉంది .  సుమారు 30 మంది దాకా వచ్చారు .

  అందరి భోజనాలఏ సరికి 3 అయింది .సాయి దంపతులు మా ఇద్దరికీ నూతనవస్త్రాలు కట్టబెట్టి  దక్షిణ తాంబూలం ఇచ్చి ఆశీర్వాదం పొందారు . అయిదేళ్లక్రితం అంటే 2017 లో ఇక్కడికి వచ్చినప్పుడు ఇక్కడినుంచి ఇండియా వెళ్లేముందు రాంకీ ఇంట్లో నాతో సత్యనారాయణ వ్రతం చేయించుకున్నారు అప్పుడు అతని అత్తగారూ మామగారు కూడా ఉన్నారు  .దానికి వాళ్ళందరూ చాలా సంతోషించారు   సాయివాళ్ళు ఇక్కడ అప్పుడు లేరు  5 ఏళ్లతర్వాత మళ్ళీ రాంకీ తమ్ముడు సాయి ఇంట్లో నే చివరి కార్యక్రమంగా ఈ రుద్రం . తమాషా అని పిస్తుంది ఏమైనా నాలుగున్నర గంటలు వేద మంత్రాలు ఇక్కడ ప్రతిధ్వనించటం మహదానందం  కార్యక్రమాన్ని వీడియో తీసి ‘’గొట్టం ‘’లో పెట్టారు .అందరి దగ్గర వీడ్కోలు తీసుకొని ఇంటికి చేరే సరికి సాయంకాలం 4 అయింది .మంచం మీద కాసేపు అటూ ఇటూ దొర్లా,కానీ నిద్ర పట్టలేదు ఫోటోలు అందరికి పంపాను .

   ప్రక్కివారింట్లో డిన్నర్

శ్రీ ప్రక్కి రమణ శ్రీమతి అరుణ దంపతుల ఇంట్లో ఈ రోజు రాత్రి భోజనం మా కుటుంబం పవన్ కుటుంబం పంచాగం ఆయనా ,పిల్లలు అతిధులం .షువర్చలేశ్వర శతకం ఆ దంపతులకు ఇచ్చాము .తర్వాత భోజనం.పప్పు ,వంకాయ కూర ,అల్లం చట్నీ బజ్జీలు ,పులిహోర మినపసున్ని ఉండ  ఉప్మా,  ముక్కల పులుసు ,తియ్యని గడ్డ  పెరుగు .అన్నీ చాలా రుచికరం గా ఉన్నాయి  ఇష్టంగా ఆనందంగా అన్నీ తిన్నాను . కొసరి కొసరి వడ్డించింది అరుణ . అయిదేళ్లక్రితం రెండు సార్లు శ్రావణ మాసం లో మమ్మల్ని అరుణ భోజనానికి పిలిస్తే వెళ్లాం మంఛీ  మర్యాదా పధ్ధతి ఉన్న అమ్మాయి  భక్తి కూడా ఎక్కువే .మా అమ్మాయికి మంచి స్నేహితురాలు  .ఇంటికి చేరే సరికి రాత్రి 11 అయింది .రెండు రోజులు వరుస రుద్రాలు ఇంట్లో పారాయణ తో గొంతు బొంగురు పోయింది .హాల్స్ చప్పరిస్తూ ఉపశమనం పొందాను .ఇబ్బందేమీ లేదు

ఈ వీక్లీ ఇంతటితో సమాప్తం .

      మీ -గబ్బిట దుర్గాప్రసాద్ -25-9-17-కాంప్-షార్లెట్-అమెరికా