కరెంటు కోతా జిందాబాద్ !!  

            కరెంటుండదట యేడు దాటితే ననుకంటూ ఎగిరి లేస్తారు బ్రాహ్మీ ముహూర్తంలో !

                  మోటర్, హీటర్, గ్రైండర్, వాషర్ పనులన్నీ చేసేస్తారు – ఉషోదయానికి ముందస్తుగా!

                   సంప్రదాయాన్ని గౌరవిస్తారు – సూర్యుడు పలకరించినా ఏనాడూ లేవని సూర్యకాంతలు !

                   దృశ్య శ్రవణ  ఛానల్స్  అన్నీ నిశీధిలో కలవగా నిక్షేపంగా ఆడుకుంటారు పిల్లలు పోట్లాటలు లేకుండా-!

                అత్తాకోడళ్ళ సీరియల్సు సమీక్షణంలో భార్యామణి , అంతులేని అంతర్జాల వీక్షణంలో భర్తా మయుడు !

                 కోత సమయంలో కష్టాలు తెలుపుకుంటారు ! సుఖాలు తెలుసుకుంటారు ! నిజంగా భార్యాభర్తలవుతారు !

    ప్రభుత్వం ఏదయినా – కరెంటుకోతా జిందాబాద్ ! ఈ ధరాతలానికి క్రమ శిక్షణను నేర్పించావు !

                    కరెంటు ప్యాను లేకుంటే – దేశీ ఫ్యానుతో వ్యాయామం – సిక్స్ ప్యాకులో ఆరోగ్యం !

      డాక్టరు బిల్లుల తగ్గుబడి ! కాల్చని కరెంటుకు సర్ ఛార్జీ కట్టుబడి ! విద్యుత్  బిల్లుల సర్దుబడి !

                      కోత లేకుండా చూస్తామని ప్రభుత్వ పెద్దల ఊసుల రాశుల మ్రొక్కుబడి !

 ప్రజలు తిరస్కరించిన పక్షాల తిరుగుబడి – స్కూళ్ళన్నీ మూతబడి- జనం రోడ్ల పై కెగబడి !

                      పని చేసే వాడు లేడు,చేయమనే వాడూ లేడు ––ప్ర.తి పక్షములారా   మా అభినందనలందు కొనుడు !

            కరెంటుకోత మనం మనకు వ్రాసుకున్న మన తల వ్రాత – ధర్మల్ ప్లాంట్లు వద్దంటూ ధర్నా మనదే !

              అణు విద్యుత్ ప్లాంటు వద్దంటూ ఆందోళనా మనదే – జల విద్యుత్ ఉత్పత్తి ఊసేలేని ఉత్తుత్తి కబుర్లూ మనవే, !

                 ఉచితాలంటూ దోచి పెట్టేది మనమే! మన దళారులు నీళ్లు దోచుకుంటే చూస్తూ ఊరుకునేది మనమే !

     జండా ఏదైనై మన ఎజండా ఓటు బ్యాంకు నిక్షేపం,ఎప్పటి కెయ్యది ప్రస్తుతమో అప్పటికా మాటలాట మన  కాలక్షేపం !

కర్త , కర్మ , క్రియ మనవే ఈ ప్రజా ప్రభుతలో !   కాదా ఇది త్రికాల వేదం – ఈ బందా నాదం!!

 పరిశోధన,రచన : బందా వేంకట రామారావు, సెల్ . 9393483147.బందాభవన్,

ఇం.57-2-30, యాదవుల బజారు, పటమట సెంటరు, విజయవాడ-1