సరసభారతి శ్రీ జయ నామ సంవత్సర ఉగాది కవి సమ్మేళనం -4

ఉగాది కవి సమ్మేళనం వివాహం –దాంపత్యం ఫొటోస్

వివాహం –దాంపత్యం

17-వివాహం దాంపత్యం విడాకులు –శ్రీ పెదప్రోలు విజయ సారధి (ఉయ్యూరు )

మాంగల్య మంత్రం చదవకుండానే పూర్తయింది వివాహం –తెలివైన అబ్బాయికీ అమాయకుపు అమ్మాయికీ

పెద్ద మనుషుల ఆశీస్సులతో మూడడుగుల బంధం –పదుల ఏళ్ళు పరిమళించిన సహజీవన గంధం

రౌడీల గడీల పటేల్ల పట్వారీల అజమాయిషీ లో –వెట్టి చాకిరీ తో  వేదనకు గురౌతున్న అమ్మాయిని

ఆదరించి అలరించి ఆనంద పరిచాడు అబ్బాయి –అమ్మాయికి ఎన్నో ఆభరణాలు అలంకారాల సోయగాలు

హైటెక్కు నిక్కుల హారాలు స్వర్ణ చతుర్భుజాల సరాలు –ఇంద్ర భవనాలను మించిన సాధనాల సమాహారాలు

అనుకూల దాంపత్యం సోంపు –స్వార్ధ పరులకు కంట గింపు –

అమ్మాయికి ఘోర అన్యాయం అంటూ ఎంచిన లేని తప్పులు

విడదీసేందుకు కుట్రలు కుహకాలు కుతంత్రాలు –మధ్య వర్తుల ముసుగు లో పయోముఖ విష కుంభాలు

స్వప్రయోజనాల న నాశించిన గద్దలూ రా బండులూ –అరచేత ఆమలకం చూపుతూ

ముక్కలు చేశారు మూడడుగుల బంధాన్ని –ఇరు హృదయాలకు చేశారు మాయని గాయం

సమైక్య కిరణాలు రణాలు చేసినా ,సమన్యాయం అంటూ ఆక్రోశించినా దంపతుల మధ్య గీసేశారు విభజన రేఖ

విజయ చేసిన ఈ అన్యాయాన్ని జయా నువ్వైనా సరిదిద్ది ఐక్యత కూర్చి కాపురం నిల బెట్టు .

18-ఆదర్శ దాంపత్యం –డా.గుడిసేవ విష్ణు ప్రసాద్ –(అవని గడ్డ )

కం .అందరి ఎద లలరిం చుచు –చందన వ్రుక్షమ్ము పోల్కిచతురత తోడన్

సుందరమగు నడ వడికను –వందితమగునది వివాహ బంధంబనగన్ .

సీ. వినయ విదేయతల్ వెలుగొందు చుండెడి –జంట గా వర్ధిల్లి సాగునపుడు

ఆదర్శ వంతులై ఆత్మీయతను పంచి –సంసార సుఖమున సాగు నపుడు

మెచ్చగా నందరు మితమైన సంతాన –వంతులై శుభములు బడయు నపుడు

మంచి మాటలు నేర్పి మానవత్వము నింపి –బిడ్డలన్ మంచిగా పెంచు నపుడు

తే.గీ.ఇలయే స్వర్గంబు గా నిల్చి ఇంపు గొల్పు –శాంతి సౌఖ్యాలు నిండును జగతి యందు

ధర్మమిల నిల్చు నాల్గు పాదముల యందు –‘’జయ ‘’ఉగాది య చే కూర్చు జయము నెపుడు .

సీ.వాగర్ధముల వోలె వర్ధిల్ల వలయు -కలసి మెలసి యుండి కాంక్ష లూర

అర్ధ నారీశ్వర అన్యోన్య రూపమై –ఒకటిగా జీవించు డోర్పు మీర

జానకీ శ్రీరామ చంద్రులై సతతమ్ము –నీతిగా జీవించి నిలువ వలయు

తోడూ నీడగా నీడుజోడుగ నింపార –ఆదర్శ మార్గంబు నరుగ వలయు

పెండ్లి యన్నను నిండు నూరేండ్ల పంట –ఒక్క మాటగా బాటయు నొకటి కాగ

పుత్ర పౌత్రాది సంపత్ప్ర పూర్ణు లగుచు –బాధ్యతల తడ శుభములు బడయ వలయు .

సీ .సంసారమునకు నై సంస్కరించి నయట్టి –వైదిక సంస్కార విధము గనిన

స్త్రీ పురుషులకును స్థిరమైన దాంపత్య –కర్తవ్య నిష్టల కర్మ గనిన

విహరించగా విలాస విధము కాదని యేడి –విధి విధానము తెల్పు విధము గనిన

మనదైన సంస్క్రుతిన్ మకుటాయమానమౌ –మన వివాహ విదిని మైమ గనిన

సకల సౌఖ్యంబు సద్గుణ సంహితంబు –ధర్మ మార్గంబు చూపెడి దర్శనంబు

శక్తి యుక్తులు గల గృహస్తాశ్రమంబు –శుభము కూర్చును జనులకు శుభము శుభము ..

19—తిలా పాపం –శ్రీమతి కోనేరు కల్పన (విజయ వాడ )

సంసారం బండికి దంపతులే చక్రాలు –పాత చింతకాయ పద్యానికి మంచిది రోగం ఎవరికంటారా అందరికీ

అమ్మ తనం వాడి కాలి చెప్పు అయింది –అహంకారం ఉక్రోషం ,సమాన హక్కుల పోరాటం లో అమ్మతనం మరిచింది

నేటి తరాన్ని శాసిస్తోంది అవసరం అవకాశం మాత్రమె –బంధాలు కావు

డేటింగ్ వెర్రి పెరిగింది భ్రూణ హత్యలతో లోకం చెలరేగుతోంది

అమ్మతనం పోయి ఆడతనమే మిగిలింది –ఈ పాపానికి పరిష్కార మందు వేయాల్సిందే

తరువాతే పద్యం ముద్ద నోటికోచ్చేది .

20-శ్రీమతి ముది గొండ సీతారావమ్మ (మచిలీ పట్నం )

జీవాత్మల పరమాత్మల అనుబంధమే వైవాహిక  బంధం –అదేవివాహం

జన్మ జన్మ ల అందం గ మార్చుకోవాలి దంపతులు

ధర్మార్ధ కామ మొక్షాలకు తోలి మెట్టు వివాహం –అదే గృహస్తాశ్రమం

అప్పుడే మోక్షం కరతలామలకమే –అన్నిటిని సమానం గా ప్రేమించాలి

వంశాభి వృద్ధి కోసం కామం మంచిదే –అర్ధ కామాలు మంచి వైతే ధర్మ మోక్షాలు దాపునే ఉంటాయి

ఇదే సనాతన ధర్మం –అదే దాంపత్య జీవన విధానం .

సశేషం

మీ –గబ్బిట దుర్గా ప్రసాద్ -2-4-14-ఉయ్యూరు