గోల్కొండ సింహం బద్దం బాల్ రెడ్డి కన్నుమూత

బీజేపీ సీనియర్‌ నేత బద్దం బాల్‌రెడ్డి (73) అనారోగ్యంతో కన్ను మూశారు. గత కొంత కాలంగా బంజారా హిల్స్‌లోని కేర్‌ ఆస్పత్రిలో చికిత్స పొందుతున్న ఆయన ఆరోగ్య పరిస్థితి క్షీణించడంతో శనివారం (ఫిబ్రవరి 23) మధ్యాహ్నం తుదిశ్వాస విడిచారు. గత కొంత కాలంగా క్యాన్సర్‌తో బాధ పడుతున్న ఆయన ఆరోగ్యం విషమించడంతో ఫిబ్రవరి 10న బంజారాహిల్స్‌లోని కేర్ ఆస్పత్రిలో చేర్చించి చికిత్స అందిస్తున్నారు. బద్దం బాల్ ‌రెడ్డి మృతి వార్తతో బీజేపీ నేతలు కిషన్‌ రెడ్డి, లక్ష్మణ్‌ తదితరులు కేర్ ఆస్పత్రికి చేరుకున్నారు. ఆయన కుటుంబ సభ్యులకు ప్రగాఢ సానుభూతి తెలిపారు.

బీజేపీలో కార్యకర్తగా రాజకీయ ప్రస్థానం మొదలుపెట్టి రాష్ట్రంలో ప్రముఖ రాజకీయ నేతగా ఎదిగిన బద్దం బాల్‌రెడ్డి.. ఉమ్మడి ఆంధ్రప్రదేశ్‌లో 1985 నుంచి 1994 వరకు కార్వాన్‌ అసెంబ్లీ నియోజకవర్గం నుంచి 3 సార్లు అసెంబ్లీకి ఎన్నికయ్యారు. తెలంగాణ అసెంబ్లీకి ఇటీవల జరిగిన ఎన్నికల్లో రాజేంద్రనగర్ నుంచి బీజేపీ తరుఫున ఆయన పోటీ చేసి పరాజయం పాలయ్యారు.

కార్వాన్‌ నియోజకవర్గంలో ఆది నుంచి ఎంఐఎం ప్రభావం ఎక్కువ. ముస్లిం ఓటర్లు ఎక్కువ మంది ఉన్న నియోజక వర్గం నుంచి గెలుపొందిన బీజేపీ అభ్యర్థిగా ఆయన రికార్డు సృష్టించారు. హైదరాబాద్ పాతబస్తీలో బీజేపీ ప్రాబల్యం పెంచిన వారిలో బాల్ రెడ్డి ఒకరు. అభిమానులు ఆయణ్ని గోల్కోండ సింహంగా పిలుచుకుంటారు.