నాలుగు రాష్ర్టాల గిరిజనులు జూలై 3న చేసిన పాదయాత్రకి సంఘీభావంగా ‘పోలవరం గిరిజనుల ముంపు పరిరక్షణ కమిటీ’ తరఫున కవులు, రచయితలు ఖమ్మం జిల్లా చిడుమూరు గ్రామంలో జరిగిన సభలో పాల్గొన్నారు. ఆ సభలో ఆ ఊరి పిల్లలతో మాట్లాడిన మాటలను క్రోడీకరిస్తే రూపొందిన కవితలు ఇవి.
సేకరణ : జయధీర్‌ తిరుమలరావు

చిన్న శరీరం ఉంది నాకు, చిట్టి చీమని
వండని ఆహారాన్ని తింటాను నేను

భూమి తడైనప్పుడు ఇల్లు మొదలుపెడతాను
నా ఇంటి దారులు పైకి పెట్టాను
నా ఇంటి లోపల నేను సందులుంచాను
గాలి వెలుతురు వెన్నెలను ప్రేమిస్తాను

చిన్న సందులు పిల్లల కోసం గదులుగా కట్టాను
ఇంటి కొచ్చిన అతిథి కోసం పెద్ద గది ఒకటి ఉంచాను
క్రిమికీటకాలు కావొచ్చు, పాములూ అతిథులుగా రావచ్చు
ఇంటి కొచ్చిన అతిథికి నేను మర్యాదలిస్తాను

నాగపంచమి రోజున నా ఇంటి పూజ చేస్తాను
హిమాలయ పర్వతమని ఇంటి పేరు పెట్టుకున్నాను

నేను మీ చిట్టి చీమని
నా ఇంటికి ఆక్రమిస్తానంటే మాత్రం గండు చీమని!
– గోండీ భాషలో, గుంజాల లిపిలో : ఆత్రం విఠల్‌రావు
తెలుగు అనువాదం : కోట్నక్‌ వినాయకరావు