సాన పట్టిన గంధం

• – దాసోజు లలిత 8790516894
• 01/12/2014

ప్రపంచ దేశాల్లారా కండ్లు మూసుకున్నారా
నోరు సూదితో కుట్టేసుకున్నట్లు
సామ్రాజ్యాల అగ్రదేశాల ఆధిపత్యాల
స్వీయ మానసిక దాడిలో చితికిపోతున్నారా
తెగిపడుతున్న గాజా దేశాలెనె్నన్నో..

పేలల్లా ఎగిరిపడుతుంటే
పెయ్యి వెయ్యి తునకలైన అవిటితనాలు
దాపురిస్తుంటే దాక్కున్నారెక్కడ?
కచ్చగట్టి శవాల గుట్టల్ని నిర్మిస్తుంటే
పంచేంద్రియాలు మూసుకున్నారెందుకు

పేకమేడల్లా శ్వాసలు కూలిపోతున్నా
ఆసరాకోసం తడుముకుంటున్నా
కంటి రెప్పల్లేని కళ్ళలా
దిగులు పెట్టుకుంటుండ్రు వాళ్ళు
క్షణకాలం చలించని
మతి తప్పని నిఘా పెట్టాల్సిన వాళ్ళు
నిద్దుర నటిస్తున్నారు

దేశాల్లారా కాసింత ఉనికైనా చూపండి
కురుస్తున్న నిప్పుల వానలో
జడిపిస్తున్న నిస్సహాయ స్థితి!
కరుగని కరుడుగట్టిన దేశాల్లారా
నోటిలో ముప్ఫై రెండు పళ్ళమధ్య
మీ నాలుక ఏమైంది

మేం మిమ్ముల్ని చూసి జాలిపడుతున్నాం
వీధి రణాలపై మారు మాట్లాడక
ప్రపంచ బ్యాంకు రుణం కోసమేనా
ఓ అంతర్జాతీయ వాదమా
అలీనమా! మూడో ప్రపంచమా!

నేత్రాలనీ, హృదయాలనీ
ఏ జమ్మికొమ్మపై దాచారు
నిరంతరం ఒరిగే అమాయకుల
పేలిన గాయాలకు మాలామూ లేదా

రేపు నీకూ ఇదే గతి పడితే
నేను మాత్రం
అక్షరాల్ని సానబట్టి తీసిన గంధాన్ని
మీకోసం భద్రంగా దాస్తాను
కళ్ళు మూసుకున్నా మీ గుండెల్ని మాత్రం
తెరిచేట్లు చేస్తా