రాజలక్ష్మి అంటే చాలా మంది తెలుగు ప్రేక్షకులు వెంటనే గుర్తు పట్టకపోవచ్చు. కానీ శంకరాభరణం రాజలక్ష్మి అంటే మాత్రం ప్రేక్షకులు వెంటనే గుర్తుపడతారు. సినిమా పేరును తన ఇంటి పేరుగా మార్చేసుకున్న అతి కొద్ది మంది నటీమణులలో ఒకరైన రాజలక్ష్మిని- శంకరాభరణం తమిళ అనువాదం విడుదలవుతున్న నేపథ్యంలో నవ్య పలకరించింది. ఆ విశేషాలలోకి వెళ్తే.. ‘‘మాది తెనాలి. అమ్మ సభా రంజని రంగస్థల నటి. ఒకప్పుడు తెనాలి నాటకాలకు చాలా ప్రసిద్ధి. అమ్మ కూడా ఎప్పుడూ నాటకాలలో బిజీగా ఉండేది. అమ్మను చూస్తుండటంతో నాకూ నటనపై ఆసక్తి కలిగింది. అప్పుడప్పుడు చిన్న చిన్న పాత్రలు వేసేదాన్ని. స్కూల్లో చదువుకునేటప్పుడు భరతనాట్యం నేర్చుకోవటంతో నాట్యం చేసేదాన్ని. అమ్మ నటి కావటం వల్ల అనుకుంటా- స్టేజి మీద నటించటానికి నేను ఎప్పుడూ ఇబ్బంది పడేదాన్ని కాదు. పదవ తరగతి పరీక్షలు పూర్తయిన తర్వాత సెలవల్లో- మాకు తెలిసిన వారు విశ్వనాధ్‌ గారు తన సినిమాలో ఒక పాత్రకు కొత్త అమ్మాయి కోసం వెతుకుతున్నారని చెప్పారు. అమ్మ కూడా సరేనంది. దాంతో వెళ్లి విశ్వనాధ్‌ గారిని కలిసాం. నేను చిన్నప్పటి నుంచి ఆయన సినిమాలు చూసి పెరిగాను. అలాంటి డైరక్టర్‌ దగ్గర నటించాలంటే .. చాలా భయం వేసింది. తొలిసారి కలిసినప్పుడు ఆయన నన్ను ఒక్క ప్రశ్న కూడా అడగలేదు. ఆ సమయంలో నేను లంగా, ఓణిలో పల్లెటూరి పిల్లలా ఉండేదాన్ని. బహుశా నన్ను చూడగానే ఆయనకు శారద గుర్తుకొచ్చి ఉండాలి. అంతే కాకుండా ఆయనకు తన సినిమాల్లో నటించే వారి నుంచి నటన ఎలా రాబట్టుకోవాలో ఆయనకి బాగా తెలుసు. అందుకే ఒక్క ప్రశ్న కూడా అడగలేదు. ఆ తర్వాత ఏడిద నాగేశ్వరరావు గారు కూడా నన్ను ఓకే చేశారు. దాంతో శంకరాభరణంలో శారద పాత్ర నటించే అవకాశం వచ్చింది.
విడుదల కాకముందే అవకాశాలు!
నాపై తీసిన తొలి పాట సామజ వరగమన.. మొదట్లో బెరుగ్గా ఉన్నా నెమ్మదిగా యూనిట్‌తో కలిసిపోయా. విశ్వనాధ్‌ గారు తన ఆరిస్టుల దగ్గర నుంచి నటనను రాబట్టుకోవటంలో దిట్ట. ఒకవైపు ఈ సినిమా షూటింగ్‌ జరుగుతుంటేనే మరో వైపు నాకు ఇతర చిత్రాల్లో అవకాశాలొచ్చాయి. రాఘవేంద్రరావు గారు ‘నిప్పులాంటి నిజం’లో మురళీమోహన్‌కి హీరోయిన్‌గా కొత్తమ్మాయిని వెతుకుతున్నారు. నా గురించి ఎవరో చెప్పటంతో నన్ను స్ర్కీన్‌ టెస్ట్‌ చేసి ఎంపిక చేశారు. దాంట్లో నాది పూర్తి మోడ్రన్‌ క్యారెక్టర్‌. దీంట్లో ఎంపిక అయిన వెంటనే రామారావుగారు ‘రౌడీరాముడు కొంటె కృష్ణుడు’లో బాలకృష్ణకు జోడీగా ఎంపిక చేశారు. అందులో ఎన్టీఆర్‌-శ్రీదేవి ఒక జంట అయితే బాలకృష్ణ-నేను మరో జంట. ఈ రెండూ ప్రారంభమైన తరువాతనే ‘శంకరాభరణం’ విడుదలైంది. ఇక్కడ ఇంకో విషయం కూడా చెప్పాలి. శంకరాభరణం పూర్తయిన తర్వాత విశ్వనాధ్‌ గారు – ‘కొత్తమ్మాయివి.., ధైర్యంగా చేశావు. బాగా వచ్చింది. వెరీ గుడ్‌’ అన్నారు. నాకు అదే పెద్ద అవార్డు అనిపించింది. వెనువెంటనే మరో అవార్డు కూడా దక్కింది. అది రామారావుగారి కాంప్లిమెంట్‌. ‘శంకరాభరణం’ ప్రివ్యూ అయిన మరుసటి రోజు రామారావుగారి కాళ్లకి దణ్ణం పెట్టి, ఎలా చేశానండీ ? అనడిగాను. ‘బాగా చేశావురా. నిన్నే చూశాను’ అన్నారు. నా ఆనందానికి హద్దులు లేవు.
34 ఏళ్ల తర్వాత కూడా అదే స్పందన…!
శంకరాభరణం’ సినిమాను తమిళంలోకి అనువదించారు. దాని ప్రివవ్యూకు వెళ్లాను. ఇప్పటికీ అందరూ ఆ సినిమాను ఆస్వాదించటం చూస్తుంటే చాలా ఆనందంగా అనిపించింది. 34 ఏళ్ల తరువాత కూడా అదే స్పందన. సినిమా అయిపోయాక కొందరు తమిళ డైరక్టర్లు నా దగ్గరకు వచ్చి-‘చిన్నప్పుడు ఎప్పుడో చూశాం. ఈ రోజు మళ్లీ స్వయంగా మీతోపాటు చూడడం చాలా సంతోషంగా ఉందండి’ అన్నారు. ఇన్నేళ్ల తరువాత తెరపై నన్ను నేను చూస్తుంటే నిజంగా నేనేనా అనిపించింది. కొన్ని సినిమాలు చూసినప్పుడు మా పాత్రలు ఇంకా బాగా చేసుండొచ్చేమో అనిపిస్తుంది. నేను చేసిన కొన్ని పాత సినిమాలు చూస్తున్నప్పుడు ఫీలవుతుంటాను కూడా. అయితే ‘శంకరాభరణం’ చూసినప్పుడు అటువంటి భావనే లేదు. ఆ గొప్పతనం విశ్వనాథ్‌గారిదే. శారద పాత్రకి ఎంత కావాలో అంతే చేయించుకున్నారు. అందుకే ఇప్పటికీ ఆ పాత్ర ప్రేక్షకుల మనసుల్లో సజీవంగా ఉంది. శంకరాభరణం రాజలక్ష్మి అంటే వెంటనే గుర్తుపట్టేస్తారు.