ప్రముఖ మ్యూజిక్‌ డైరెక్టర్‌ చక్రి (40) ఈరోజు ఉదయం మృతి చెందారు. గుండె పోటుతో అపోలో ఆస్పత్రిలో చికిత్స పొందుతూ చక్రి తుది శ్వాస విడిచారు. దీంతో తెలుగు చిత్ర పరిశ్రమ దిగ్ర్బాంతికి గురైంది. చక్రి అసలు పేరు చక్రధర్‌ జిల్లా. చక్రి జూన్‌ 15న 1974 వరంగల్‌ జిల్లాలోని మహబూబాబాద్‌లో జన్మించారు. పూరిజగన్నాథ్‌ దర్శకత్వంలో జగపతిబాబు హీరోగా నటించిన ‘బాచి’ సినిమాతో తెలుగు చిత్ర పరిశ్రమకు సంగీత దర్శకుడిగా పరిచయమైన చక్రి…ఎన్నో మ్యూజికల్‌ హిట్స్‌ అందించారు. ఇప్పటి వరకు చక్రి 85 సినిమాలకు మ్యూజిక్‌ అందించారు. చక్రి సంగీతం అందించిన చివరి చిత్రం దర్శకరత్న దాసరినారాయణరావు రూపొందించిన ‘ఎర్రబస్సు’ సినిమాకి చక్రి మ్యూజిక్‌ సమకూర్చారు. ఇడియట్‌, అమ్మ నాన్న ఓ తమిళ అమ్మాయి, సత్యం, శివమణి, దేశముదురు వంటి చిత్రాలను మ్యూజికల్‌ హిట్స్‌గా నిలబెట్టారు. బోయపాటి శ్రీను దర్శకత్వంలో బాలకృష్ణ నటించిన ‘సింహా’ సినిమాకుగాను చక్రి అందించిన స్వరాలకు నంది అవార్డు అందుకున్నారు. సత్యం చిత్రంలో ఆయన గాయకుడిగా పాడిన పాటకు ఫిలింఫేర్‌ అవార్డు కూడా అందుకున్నారు.

ప్రముఖ సంగీత దర్శకుడు చక్రికి చిత్ర పరిశ్రమ సంతాపం..

ప్రముఖ సంగీత దర్శకుడు చక్రికి మృతికి పలువురు సినీ ప్రముఖులు సంతాపం తెలిపారు. చక్రి మృతి పట్ల మెగాస్టార్‌ చిరంజీవి, నందమూరి బాలకృష్ణ, నిర్మాత రామానాయుడు, దర్శక రత్న దాసరి నారాయణరావు, నటులు రవితేజ, అల్లు అర్జున్‌, సాయి ధరమ్‌ తేజ్‌, దర్శకుడు మారుతి, సంగీత దర్శకురాలు శ్రీలేఖతో సహా పలువురు చిత్ర పరిశ్రమ సంతాపం వ్యక్తం చేశారు. చక్రి మరణ వార్త విని నమ్మలేకపోయానని చిరంజీవి అన్నారు. చక్రి చాలా మంచి వ్యక్తి, అలాంటి వ్యక్తి దూరం కావడం బాధకరమని నిర్మాత రామానాయుడు ఆవేదన వ్యక్తం చేశారు. చక్రి నాకు తమ్ముడు లాంటివాడని, చక్రికి నేను పెద్ద అభిమానిని, తను లేని లోటు తీర్చలేనిది అని బాలకృష్ణ సంతాపం వ్యక్తం చేశారు. చక్రి లేడనే వార్తను నేను నమ్మలేక పోతున్నానని సంగీత దర్శకురాలు శ్రీలేఖ అన్నారు. చక్రి మన మధ్య లేకపోయినా..ఆయన అందించిన పాటల్లో బతికే ఉన్నారు. ‘జగమంత కుటుంబం నాది..ఏకాకి జీవితం నాది’ అంటూ ఆయన ఎందుకు కంపోజ్‌ చేశారో తెలియదు కానీ అది సరిగ్గా ఆయనకే వర్తిస్తుందనుకుంటున్నానని శ్రీలేఖ సంతాపం తెలిపారు. చక్రి మృతి పట్ల పూరి తన ట్విట్టర్ ద్వారా స్పందిస్తూ – ”నా సోదరుడు (చక్రి)ని చాలా మిస్ అవుతున్నాను. మా ఇద్దరి కెరియర్ ఒకేసారి ఆరంభమయ్యింది, ఎన్నో అనుభూతులు పంచుకున్నాం. నా సినిమాలకు ఎన్నో మంచి పాటలిచ్చారు” అని పేర్కొన్నారు.