‘చాతుర్మాస దీక్ష పూర్తి అయిపోతోందంటే బాధగా ఉంది. ప్రతి రోజు గంగ స్నానాలు ఉండవని బెంగ కలుగుతోంది. పీఠాన్ని వదిలివచ్చినప్పుడు కలిగే బాధ.. ఇక్కడ నుంచి మళ్లీ తిరిగి వెళ్లేటప్పుడు కలుగుతోదంటే- గంగ గొప్పదనం అర్థం చేసుకోవచ్చు. గంగ ప్రవాహంలోనే వేద ఘోష ఉంది. ఆ నది ఒడ్డున మౌనంగా కూర్చుంటే చాలు- వేదాలన్నీ చదువుకున్నట్లే. అందుకే గంగను నా గురువుగా భావిస్తా. నా జీవితంలో అతి ముఖ్యమైన భాగం ఇక్కడే (రుషికేష్‌) చదువుకున్నా. అప్పటికీ ఇప్పటికీ అనేక తేడాలున్నాయి. సాధారణంగా కొన్ని మార్పులు మనకు ఇబ్బంది కలిగిస్తాయి. కానీ కాల ప్రవాహంలో మార్పులు తప్పనిసరి. అయితే హిందుధర్మానికి ఈ మార్పుల వల్ల మేలు జరుగుతోందా? కీడు జరుగుతోందా? అనే విషయాన్ని అందరూ ఆలోచించాల్సిన సమయం అసన్నమయింది.
ప్రస్తుతం హిందు ధర్మంపై రకరకాలుగా దాడులు జరుగుతున్నాయి. ఈ దాడులు కొన్ని అంతర్గతమైనవి. మరికొన్ని బయట నుంచి జరుగుతున్నవి. ముందు అంతర్గత సమస్యల గురించి మాట్లాడుకుందాం. హిందు మత ధర్మానికి వేదాలు, ఉపనిషత్తులు మార్గాన్ని చూపిస్తాయి. కానీ దురదృష్టమేమిటంటే- చాలా మంది ఈ మార్గాన్ని వదిలి పూజా మార్గం వైపు ప్రయాణించటం మొదలుపెట్టారు. పూజలు కేవలం మన జీవన విధానంలో ఒక భాగం మాత్రమే. ముక్తికి మార్గాలు కావు. ఈ పూజలను మన పూర్వీకులు నిర్దేశించటానికి కూడా ఒక కారణముంది. మనం సాధారణంగా పూజలను దేవుళ్లకు చేస్తాం. ఆ దేవుళ్ల వ్యక్తిత్వాన్ని ఒక్క సారి జాగ్రత్తగా పరిశీలిస్తే- అనేక విషయాలు బోధపడతాయి. వారి జీవితాల నుంచి ఏది ధర్మమో, ఏది అధర్మమో తెలుసుకోవచ్చు. కాని ఇప్పుడు మూఢ భక్తి బాగా పెరిగిపోతోంది. జీవితంలో ఎదురయ్యే ప్రతి సమస్యకు పూజల వల్లో, యాగాల వల్లో పరిష్కారం దొరుకుతుందనే భావన ప్రబలింది. రుద్రాక్షలు వేసుకుంటే పిల్లలు పుడతారని, యజ్ఞాలు చేస్తే పదోన్నతులు వస్తాయని భావిస్తున్నారు. ఈ బలహీనతను కొందరు వ్యాపారంగా మలుచుకుంటున్నారు. దీనితో మూఢభక్తి పెరిగిపోతోంది. దీని వల్ల లాభం కన్నా నష్టం ఎక్కువుంటుందనే విషయాన్ని అందరూ గ్రహించాలి.
ఇప్పటి దాకా నేను చెప్పినవి అంతర్గత సమస్యలు. ఇక సమాజంలో వస్తున్న మార్పులు, హిందు ధర్మంపై కొందరు ఇతర మత ఛాందసులు చేస్తున్న దాడుల వల్ల కొన్ని ప్రమాదాలు ఏర్పడుతున్నాయి. ఈ దాడులు కొన్ని సార్లు సమాజంలో ఐక్యతకు భంగం కలిగించే విధంగా కూడా ఉంటుంది. హిందు ధర్మం ఏ నాడు ఎవ్వరికి వ్యతిరేకం కాదు. సమాజంలో ఉన్న అన్నివర్గాలను కలుపుకుపోవటమే దానికున్న మహోన్నత లక్షణం. సమాజంలో అన్ని వర్గాలు సుఖంగా జీవించటమే దాని ప్రాతిపదిక. అందుకే హిందుధర్మంలో గిరిజనులకు, నిమ్నవర్గాలకు స్థానం ఉంటుంది. ఎన్నో ఉదాహరణలు ఉన్నా- ఒక్క దానిని పరిశీలిద్దాం. పెళ్లి చేసిన తర్వాత వధువరులకు అరుంధతి నక్షత్రాన్ని చూపిస్తారు. ఇది వివాహ వేడుకల్లో తప్పనిసరైన ప్రక్రియ. ఈ అరుంధతి ఒక గిరిజనురాలు. ఇలాగే అనేక వెనకబడిన కులాలకు చెందిన అనేక మంది రుషులు మనకు కనిపిస్తారు. కానీ ఈ విషయంలో రకరకాల దుష్ప్రచారాలు జరుగుతున్నాయి. హిందు ధర్మం నిమ్నవర్గాలకు వ్యతిరేకమనే భావన బలంగా వ్యాపింపచేయటానికి కొందరు ప్రయత్నిస్తున్నారు. వెనకబడిన గిరిజనగ్రామాల్లో మతమార్పిడిలకు జరుగుతున్న ప్రయత్నాల దగ్గర నుంచి గోదావరి పుష్కరాల గట్టులను లీజుకు తీసుకోవటానికి చేసిన యత్నాల దాకా అనేక ఉదాహరణలు ఉన్నాయి.
హిందు ధర్మంపై జరుగుతున్న దాడులపై అందరూ కలిసికట్టుగా పోరాడాల్సిన ఆవశ్యకత ఎంతైనా ఉంది. మన వేదాలే జీవన మార్గాలనే విషయాన్ని అందరికీ తెలియజేయాలి. వేదాలు ఏ ఒక్కరికి వ్యతిరేకం కాదని.. అవి సమాజ హితానికి ఉద్దేశించిన అద్భుత శాస్త్రాలనే విషయాన్ని తెలియజెప్పాలి. ఇది హిందు ధర్మ ప్రచారలకులందరి ముందు ఉన్న సమస్య. దీని పరిష్కారం కోసం పీఠాధిపతులందరూ కలిసికట్టుగా పనిచేయాలి.