తెలుగు సినిమాల్లో ఓ దృశ్యకావ్యంలా నిలిచి, ఖండాతర ఖ్యాతిని పొందిన చిత్రరాజం ‘శంకరాభరణం’ (1980) 34 ఏళ్ల తర్వాత తమిళంలో విడుదల కాబోతోంది. జె.వి. సోమయాజులు, మంజుభార్గవి ప్రధాన తారలుగా కె. విశ్వనాథ్‌ రూపొందించిన ఈ సంగీత ప్రధాన చిత్రం తెలుగు ప్రేక్షకుల హృదయాల్లో చెరగని ముద్ర వేసింది. సీఎన్‌-ఐబీఎన్‌ రూపొందించిన వంద గొప్ప భారతీయ చిత్రాల్లో చోటు సంపాదించింది. అందులోని పాటలన్నీ మన నాలుకలపై ఇప్పటికీ నర్తిస్తూనే ఉన్నాయి. ఈ సినిమా తమిళంలో తొలిసారిగా డిజిటల్‌ వెర్షన్‌ రూపంలో అక్టోబర్‌ 2న విడుదల కాబోతోంది. విశేషమేమంటే తెలుగు పాటలకు శాశ్వత కీర్తి దక్కడంలో భాగస్వామ్యం ఉన్న ప్రముఖ గాయకుడు ఎస్పీ బాలసుబ్రహ్మణం తమిళంలోని పాటలనూ తాజాగా పాటడం. ఈ సినిమాలోని ‘శంకరా’ పాటతోనే ఆయన ఉత్తమ గాయకుడిగా తొలి జాతీయ అవార్డును అందుకున్నారు.

గురువారం చెన్నైలో జరిగిన ప్రెస్‌మీట్‌లో కె.విశ్వనాథ్‌, తెలుగు సినిమా నిర్మాత ఏడిద నాగేశ్వరరావు, ఎస్పీ బాల సుబ్రమణ్యం తదితరులు పాల్గొన్నారు. బాలు మాట్లాడుతూ ‘‘ఈ సినిమా నా కెరీర్‌ మొత్తానికే ప్రత్యేకమైనది. ఇందులోని పాటల కోసం దర్శకుడు విశ్వనాథ్‌ నన్ను సంప్రదించినప్పుడు శాసీ్త్రయ సంగీతంలో నిష్ణాతుణ్ణి కాననే ఉద్దేశంతో మొదట పాడేందుకు తటపటాయించాను. అయితే సంగీత దర్శకుడు కె.వి. మహదేవన్‌ సహాయకుడైన పుహళేంది సహకారంతో ఆ పాటలను ఆలపించాను. ఆయనే నాకు శాసీ్త్రయ సంగీతంలో మెళకువలు నేర్పారు’’ అని తెలిపారు బాలు.