అందమైన కథకుడు ఎన్‌.కె. రామారావు తుది శ్వాస విడిచారు. హాస్యప్రియుడు శాశ్వత మౌనం దాల్చారు. ఆయన మిత్రులకు, కుటుంబ సభ్యులకు విషాదం మిగిల్చారు. ఎన్‌.కె. రామారావుగా ప్రాచుర్యం పొందిన నారపరాజు కోదండ రామారావు స్వగ్రామం నల్లగొండ జిల్లా హుజూర్‌నగర్‌ సమీపంలోని కందిబండ. దేశానికి స్వాతంత్య్రం రావడానికి ఆరు మాసాల ముందు ఆయన జన్మించారు. హుజూర్‌ నగర్‌, తెనాలి, విజయవాడ, నల్లగొండలలో విద్యాభ్యాసం చేశారు. న్యాయశాఖలో ఉద్యోగం చేసి తొమ్మిది సంవత్సరాల క్రితం పదవీ విరమణ చేశారు. రామారావుకు సాహిత్యం, సంగీతమంటే మక్కువ. ఆయన మంచి పాఠకుడు. మంచి శ్రోత.
సుమారు నాలుగున్నర దశాబ్దాల క్రితం నల్లగొండలో కొంతమంది రచయితలు కలసి యువ రచయితల సమితిని ఏర్పాటు చేశారు. మేరెడ్డి యాదగిరి రెడ్డి, బోయ జంగయ్యతో పాటు రామారావు కూడా ఈ సంస్థ కార్యకలాపాల్లో చురుగ్గా పాలుపంచుకున్నారు. కాంచనపల్లి చిన వెంకటరామారావు ప్రోత్సాహంతో కథలు రాయటం ప్రారంభించారు. ముప్ఫయ్‌ ఐదు కథలు రాశారు. పన్నెండు కథలతో విద్యుల్లత కథా సంపుటిని అందించారు. ఆ తర్వాత నవ్య వీక్లీ అప్పటి సంపాదకుడు శ్రీరమణ ప్రోత్సాహంతో మరిన్ని కథలు రాశారు. మా మిలట్రీ బాబాయి పేరుతో ఈ కథా సంపుటిని అందించాలనుకున్నారు. కానీ మధ్యలోనే వెళ్ళిపోయి ఆయన అభిమానులకు నిరాశను మిగిల్చారు.