‘ఒక రైతు ఆత్మహత్య చేసుకున్నాడు’
వాక్యం సరిగా లేదు
‘మరొక రైతు ఆత్మహత్య చేసుకున్నాడు’
ఈ వాక్యమూ సరిగా లేదు
‘రైతు ఆత్మహత్య చేసుకుంటూనే వున్నాడు’
వాక్యమిపుడు సరిగ్గా వుంది
వాక్యంలో శుచీశుభ్రతాలేదని ఒకరనొచ్చు
వాక్యంలో పలుకుబడి లేదని మరొకరనొచ్చు
ఎవరి సందర్భాలు వారివి!
కానీ వాక్యం సరిగ్గానే వుంది
‘రైతు ఆత్మహత్య చేసుకుంటూనే వున్నాడు’
ట్రాన్స్‌ఫార్మర్‌ మీద ఆత్మహత్య చేసుకున్న
రైతు మట్టి దేహమ్మీది నుంచి నేల మీదికి
రాలిపడ్డ వాక్యమది! సరిగ్గానే వుంది!
——-
బతుకు పండగనాడు తీరుతీరు పూలను పేర్చి
తలకెత్తుకుంటున్నాం- ట్యాంక్‌బండ్‌ సాక్షిగా సంబరమే!
కానీ యుగాలుగా రైతు పొలాల్ని
తలకెత్తుకునే వున్నాడని మనకు తెలుసా
అతన్ని మనం తలకెత్తుకోవడం లేదు సరికదా
తన పొలమ్మీద తననే బతకనివ్వడం లేదు
మనం సంబరాల్లో మునిగిపోయి అతని సాగును
మరిచాం, ఉనికిని మరిచాం
నీరందివ్వక వెల్తురునివ్వక నేల బతుకు నుంచి
అతన్ని వెలేసాం – నేల మిగలక గాల్లోకి లేచి
అతను ట్రాన్స్‌ఫార్మర్‌ మీద ప్రాణం తీసుకున్నాడు
చావు నిరసనలోనూ అతను అన్వయాన్నే
పాటించాడని మన తలకెక్కుతున్నదా
సంతాపం ప్రకటిస్తున్న ఈ నేలమీద
వేలాడుతున్న మట్టిమనిషి శవం ముందు
ఇపుడు ఏ తలల్తో నిలబడతాం మనం?